| ← Joshua (16/24) → |
| 1. | Josefa thlahai chanpuol chu Jeriko zawn, Jordan vadunga inthoka thlaler hnai tieng, sak tieng Jeriko tuihmunah a suok a, Jerikoa inthok chun tlang ramah Bethel (chu chu Luz) chenin a kai tung a, |
| 2. | Bethela inthok chun Atarot-a Ark-hai ram a fe thleng a, |
| 3. | chu taka inthok chun Jaflet-hai ram tieng panin thlang tieng an her thla a, Bet Horon chuonhnuoi chen a fe a, chu zoah Gezer tieng a fe a, tuifinrietah a suok a. |
| 4. | Chu po chu Manase le Efraim, Josefa thlahai chanpuol chu a nih. |
| 5. | An sungkuo zir peia Efraim thlahai ramri chu hieng ang hi a nih: sak tienga an chanpuol ramri chu Astarot Adar-a inthokin Bet Horon chuonchungah, |
| 6. | tuifinriet chen a fe a. Chu taka inthok chun Mikmethat hmar tieng fein, Tanat Silo panin sak tieng an her a, Janoa chu a tan tlang a. |
| 7. | Janoat-a inthok chun Atarot le Naara-ah a fe thlak a, Jeriko a hraw a, Jordan vadungah a suok a. |
| 8. | Tapua-a inthokin ramri chu thlang tieng Kana vadung ruom a zui a, tuifinrietah a suok a. Chu chu an sungkuo zir ang peia Efraim thlahai chanpuol ram chu a nih. |
| 9. | Chun, Manase thlahai chanpuol sunga Efraim thlahai chanpuol dinga ruot hrang khawpuihai le an khawperhai khom chu a thang sa bok a nih. |
| 10. | Chun, Gezer-a um Kanan mihai chu an hnot suok vong naw leiin, tu chen hin Kanan mihai chu sinthawa sor lui dingin Efraim mihai lai an la um a nih. |
| ← Joshua (16/24) → |