←  Joshua (14/24)  →
1. Thiempu Eleazar le Nuna naupa Josua le Israel pahnam tina luhaiin Israel thlahai kuoma an rochan dinga Kanan ram an sempek dan chu hieng ang hin a nih.
2. Mosie kuoma LALPAN thu a lo pek tah angin, hnam kuohai rochan ding seng chu thum vawrin an sem a.
3. Mosie chun hnam hni le hnam zatve ta dingin Jordan suo tiengah rochan a lo pek ta a, Levi chihai ruok chu anni lai chun rochan ding a pek ve nawh.
4. Josefa nauhai chu hnam hniin an hung um ta a, chu chu Manase le Efraim an nih. Khawpuia umhmun khuorna ding le khaw kawla an ran tlatna ding hmun ti chauh naw chu Levi chihai chun rochan an nei ve nawh.
5. LALPAN thu Mosie a pek ang tak khan Israel thlahai chun ram chu an insem a nih.
6. Chun, Juda thlahai chu Gilgal khuoah Josua kuomah an fe a. Keniz mi, Jefune naupa Kaleb chun a kuomah, "Kades-Barnea LALPAN Pathien mi Mosie kuoma eini pahni chungchang a hril kha i hriet a.
7. LALPA siehlaw Mosien Kades-barnea inthoka ram enthla dinga a mi tir khan kum sawmli mi ka ni ta a, ka lungril char chu a kuomah ka hril a.
8. Amiruokchu, ka fepui ka unau danghai khan mipui lungril an sukzam a, kei ruok chun LALPA ka Pathien chu lungril takin ka pom tlat a.
9. Kha ni khan inkham meuin Mosie chun ka kuomah, 'LALPA ka Pathien chu lungril taka i zui leiin, i kea i sir ram taphot chu kumkhuoa nang le i nauhai rochan ni ngei ngei a tih' tiin a mi hril a.
10. "Ngai ta, hi thu hi Mosie kuoma a hril hnungin, thlalera Israelhai an invak sung po po khan LALPA chun thu a tiem angin, kum sawmli le panga damin a mi la hla a, tu hin kum sawmriet pangaa upa ka lo ni ta hi.
11. Chuong sa khom chun, Mosien a mi tir suok ni ang khan voisun khom hin ka la hrat zing a, ral beia suok ding khomin kha hma ang bok khan thahrui ka la nei zing a nih.
12. Kha nia LALPAN pek a mi tiem, hi tlangram hi tu hin mi pe ta la. Nang khoma kha tuma i hriet ang ngei khan, an khawpuihai chu Anakhai chengna, kul ropui taka inhuon khup a ni kha. Amiruokchu, aman a ti angin, LALPA thangpuinain anni chu hnot suok ka tih" a ta.
13. Josua chun Jefune naupa Kaleb chu mal a sawm a, Hebron khuo chu a rochanah a pek a.
14. Chuongchun, Keniz mi Jefune naupa Kaleb chun LALPA, Israel Pathien chu lungril taka a zui tlat leiin, chu nia inthok chun Hebron khuo chu a rochan a hung ni tah a nih.
15. Hebron chu Anak mihai laia mi ropui tak Arba hming chawiin Kiriat Arba ti a ni hlak. Chu taka inthok chun a ram chu indona laka inthokin a hung ralmuong ta a.
←  Joshua (14/24)  →