←  Joshua (13/24)  →
1. Josua chu a hung upa a, a kum a tam ta hle hnung chun LALPAN a kuomah, "I lo upa ta a, ram lak ding hlak chu a la tam hle si.
2. Hieng ramhai hi a nih la lak lohai chu: Filistin ram po po le Gesur-hai ram po po;
3. sim tienga Avithai ram po po (Aigupta ramria um Sihor vadunga inthoka hmar tieng panga Ekron ramri chen hi Kanan mihai rama ngai a na, Filistin mi lal pangahai chu Gaza, Ashdod, Askelon, Gat le Ekron-ah an um a);
4. Kanan mihai ram bok, Sidon mihai umna Meara-a inthoka Amorhai ramri Afek chen; le
5. Gebalhai chengna biel; sak tieng Lebanon ram, Hermon tlang hnuoi Baal Gad-a inthoka Hamat Kawn chen.
6. Lebanona inthoka Misrefot-maim chenin, tlang rama cheng po po le Sidon mi po pohai chu Israel thlahai hmaa hin hnot suok ka ta, thu ka pek che ang khan, Israelhai rochanah siempek ngei ngei rawh.
7. Chuong ang chun, hi ram hi hnam kuo hai le Manase hnam zatvehai rochanah sempek rawh" a ta.
8. Reuben hnam le Gad hnam le Manase hnam zatve chun Jordan sak tieng ram, LALPA siehlaw Mosien a pek chu, an lo chang ta a.
9. Chu ram chu Arnon Ruom sira um Aroer khuoa inthoka ruom lailung taka khawpui le Medeba phai ram po po, Dibon chen;
10. Amorhai lal Hesbon khuoa lal Sihon khawpui po po, Amon thlahai ramri chen;
11. Gilead ram le Gesurhai le Makathai ramri chen le Hermon tlang po po, Basan ram po po, Salka khuo chen;
12. Astarot le Edrei khuoa lala inthung Basan ram lal Oga ram po po, Refaim hnam la um sunhai Mosien beia a lo hnot suok tawlna ram chenin a nih.
13. Amiruokchu, Gesurhai le Makathai chu Israel thlahai chun an hnot suok naw a, Israel thlahai lai tu chen hin an la cheng ta zing lem a nih.
14. Rochan ding a pek ve naw chu Levi hnamhai chauh an nih; an kuoma a lo hril tah ang khan anni rochan chu LALPA, Israelhai Pathien ta dinga meia thilhlanhai chu a ni lem si a.
15. Reuben thlahai chu an sungkuo ang peiin Mosien ram a lo pek ta a.
16. An ram chun Arnon Ruom sira um Aroer khuoa inthoka ruom lailunga khawpui le Medeba phaizawl po po,
17. Hesbon le chu phai rama khawpui po po Dibon hai, Bamot Baal hai, Bet Baal Meon hai;
18. Jahaz hai, Kedemot hai, Mefat hai,
19. Kiriathaim hai, Sibma hai, ruom khoa um Zeret Shahar hai;
20. Behpeor hai, Pisga tlang pangper hai, Bet-jesimot hai;
21. tlang zawla khawpui po po hai, Amor mi, Hesbona lal Sihon lalram po po khom a huom a nih. Sihon chu Mosien a hne a, chu ruol chun chuong lai rama Sihon lo thangpuitu Midian lal Evi hai, Rekem hai, Zur hai, Hur hai le Reba hai chu a tukdol vong bok a nih.
22. Chuong lal a thathai baka chun Israelhai chun Beor naupa Balaam, aienthiem chu kawlhnamin an that sa bok a.
23. Chuongchun, Reuben thlahai ramri chin chu Jordan le a kam po po chu a nih. Hieng khawpuihai le khawtehai hi Reuben thlahai ta dinga an sungkuo zir ang peia rochana an ruot chu a nih.
24. Gad thlahai chu an sungkuo zir ang peiin Mosien ram a lo pek a.
25. An ramri chu Jazer khuo le Gilead rama khawpui po po le Amon thlahai ram zatve, Raba khaw depa um Aroer khuo chen;
26. Hesbona inthoka Ramat-mitzpe le Betonim chen; Mahanaim-a inthoka Debir ramri chen;
27. ruom tieng chu Bet-haram hai, Bet-nimra hai, Sukot hai, Zafon hai, Hesbona lal Sihon ram la sem lo, Jordan sak tienga a ram, Galili dil chen chu a nih.
28. Hienghai hi, a khawpui le a khawtehai po po leh, Gad thlahai ta dinga an sungkuo zir peia an rochan dinga an ruot chu a nih.
29. Mosien Manase hnam zatve, Manase thlahai laia a zatve ta dinga an sungkuo zir ang peia ram a lo pek chu hieng ang hin a nih.
30. An ramri chu Mahanaim-a inthokin Basan ram po po, Basan ram lal Oga ram po po le Basan rama Jair khawpui khaw sawmruk leh;
31. Gilead ram zatve le Basan ram lal Oga rama Astarot Edrei khuo hai leh; chuong chu Manase naupa Makira thla, Makira naupahai a zatvehai ta dinga an sungkuo zir ang peia an rochana ruot chu a nih.
32. Hienghai hi a nih Moab phai, Jeriko zawn, Jordan ral sak tieng Mosien an rochan dinga a lo sem chu.
33. Levi chihai ruok chu Mosien rochan ding a pek ve nawh. An kuoma a lo hril tah ang khan, LALPA Israel Pathien chu an rochan a ni lem.
←  Joshua (13/24)  →