←  Joshua (11/24)  →
1. Hazor khaw lal Jabin-in chu chu a lo hrietin Madon khaw lal Jobab dam, Simron khaw lal dam, Aksaf khaw lal dam,
2. hmar tieng tlang rama lal, Kinneret sim tienga Araba lal dam, khawthlang tieng tlang thuta lalhai dam, Kinneret sim tieng Arabaa lal dam, tlak tienga tlang thuta umhai le Dor khaw zoa lalhai dam,
3. sak tieng le thlang tienga um Kanan mihai dam, tlang rama um Amor hai, Hit hai, Periz hai, Jebu hai dam, Mizpa biel Hermon tlang hnuoia um Hiv hai kuomah mi a tir a.
4. An sipai po po, tam tak el, tuifinriet kama tieu zat zet el chu sakor le tawlailir tam tak leh an hung inthok ta rup el a.
5. Chuong lalhai po po chu an intuok khawm a, Israelhai chu bei dingin Merom tuihmunahe an inkul a.
6. LALPA chun Josua kuomah, "Ti tawl der naw rawh. Zingah tuta huna hin that dingin Israel kutah ka pek suok tawl ding a nih. An sakor zaper tha sat unla, an tawlailir raw vong bok ro" a ta.
7. Chuongchun, Josua le ral kap mi po po chun Merom tuihmunah an bei thut a.
8. LALPA chun Israelhai kutah a pek a, an hne a, Sidon khaw lien lem chen dam, Misrefot Maim chen dam le suo tieng pangah Mizpa Ruom chen an hnot a, pakhat khom hla nei der loin an that vong a.
9. LALPAN thaw dinga Josua a hril angin, an sakor zaper thahai an satpek a, an tawlailirhai an rawpek bok a.
10. Chuong lai chun Josua chu a kir nawk a, Hazor khuo a lak a, an lal chu kawlhnamin a that a. Hazor chu chuong lai vel rama khaw poimaw tak a nih.
11. A sunga cheng po po chu kawlhnamin a that vong a. A'n thuok thei taphot chu hla nei loa a rawt chimit zoin Hazor khuo chu a raw a.
12. Josua chun chu biela lal khuohai chu a lak a, an lalhai a man khawm a, kawlhnamin a sukhlum vong a. LALPA siehlaw Mosien thu a pek angin, a sukchimit tawl vong a nih.
13. Chuong chu a ni lai zingin, Hazor khuo ti chauh naw chu, muolpawnga khuo an lo indin ta sa hai ruok chu pakhat khom an raw nawh.
14. Chuong khawpuia inthoka an rallak le ranhai chu Israelhaiin an puola dingin an lak a, mihriem ruok chu an sukbohmang vong hma khat chu kawlhnamin an that pei a, a'n thuok taphot chu hla an nei nawh.
15. LALPAN a siehlaw Mosie thu a pek angin, Mosie khomin Josua chu thu a pek a, chu chu Josua-in a hlen a nih; LALPAN Mosie kuoma thu a pek po po chu hlen naw hrim a nei nawh.
16. Chuongchun, Josua chun hieng ram po po hi a lak a: sim tieng ram po po, Gosen ram po po, tlak tieng panga tlang thut po po, Araba le Israelhai tlangram po po,
17. Seir tlang hang zomtu Halak tlanga inthoka Hermon tlang hnuoi, Lebanon phairuoma um Baal Gad chenin a lak a, an lalhai po po a man a, a vuok thluk a, a that a.
18. Chuong lalhai chu Josuan hun sawt tak a'n dopui tawl a nih.
19. Gibeon khuoa um Hiv mihai ti chauh naw chu Israelhai le inremna siem khuo hrim hrim an um naw a, indoa a lak vong a nih.
20. LALPAN Mosie thu a lo pek tah ang khan, anni rawi chu lunginsietna nei der loa suksea a sukchimit tawl vongna dingin, LALPA ngei chun an lungril a sukkhau a, Israelhai chu a'n dotir a nih.
21. Chuong lai hun bok chun Josua chu a'n thok suok a, Hebron dam, Debir dam, Anab dam, Judai tlangram dam le Israel tlang rama um Anakhai chu an khawpuihai leh a sukchimit vong a.
22. Chuongchun, Gaza, Gath le Asdod khuoa a dam sun tlawmte la um ti naw chu Israelhai ramah Anakhai tu khom an um ta nawh.
23. LALPAN Mosie kuoma a hril ang khan, Josua chun a ram pumpui a lak a, Israelhai chu an hnam inthe dan ang peiin an rochan dingin a pek a, a ram chu a hung ralmuong ta a.
←  Joshua (11/24)  →