←  Joshua (10/24)  →
1. Josuan Ai khuo a lak a, a suksiet vong thu le Jeriko khuo le an lal chunga a thaw ang boka Ai khaw lal chunga khom a thaw thu dam, Gibeon khuoa mihaiin Israelhai chu inremna an siempui a, anni lai an cheng ve tah ti thu dam Jerusalem khaw lal Adoni Zedek-in a lo hriet a.
2. Chu thu lei chun ama le a mipuihai chu nasa takin an ti a. Gibeon chu khaw poimaw le lal khawpui a na, Ai khuo nekin a lien lem a, a sunga chenghai chu raldo thiem vong an ni si a.
3. Jerusalem lal Adoni Zedek chun Hebron khaw lal Hoham hai, Jarmut khaw lal Piram hai, Lakis khaw lal Jafia hai le Eglon khaw lal Debir hai chu inpunin,
4. "Gibeon khuoin Josua le Israel thlahai inremna a siempui leiin hung unla, va bei hron ei tiu" tiin a'n cha khawm a.
5. Chuongchun, Amor mihai lal panga- Jerusalem lal, Hebron lal, Jarmut lal, Lakis lal le Eglon lal- hai chu an pung khawm a, an sipaihai po po leh an inthok suok a, Gibeon khaw epah thanghmun an khaw a, an bei ta mup mup el a.
6. Gibeon-hai chun Gilgala an riekhmuna um Josua kuoma chun mi an tir a, "Tlang rama cheng Amor lal po po inthuruolin mi bei hron dingin an hung pung khawm a nih. I siehlawhai hi hung thlathlam naw la, inrang takin hung la, mi hung san suok rawh, san kan ngai a ni hi" tiin thu an thon a.
7. Chuongchun, Josua le a kuoma um ral kap mi le pasaltha po po chu Gilgala inthok chun an inthok suok a.
8. LALPA chun Josua kuomah, "Ti tawl der naw rawh; anni chu i kutah ka pek ta che. Anni lai tu khom a ngam ding che an um nawh" a ta.
9. Zan khuoa Gilgala inthoka fein Josua chun a hang bei thut a.
10. Israelhai hmaa chun anni rawi chu LALPAN a sukchi-ai a, an buoi ta nuoi nuoi a, Gibeon-a chun Israelhaiin hnena ropui tak an chang a, Bet Horon panna lam tunga chun Azeka le Makeda chen an hnot a, lampui intluonin an sat hlum pei a.
11. Chun, hieng hi a na, Israelhai hmaa tlansiehai chu Bet Horon-a inthoka Azek khuo panna tieng an liem thlak laiin an chungah vana inthokin LALPAN riel lien tak tak a'n surtir a, riel deng hlum chu Israelhaiin kawlhnama an sat hlum nekin an tam lem.
12. LALPAN Israelhai kuta Amor mihai a pek ni chun, Israelhai po po hmaah Josua chun LALPA kuomah,"Aw, turnipui,Gibeon chungah ngir zing la,Aw, sorthlapui,Aijalon Ruom chungah ngir zing rawh"tiin thu a'n sam a.
13. Chuongchun, Israelhaiin an hmelmahai chunga phuba an lak zo hma khat chun nisa chu ni khat pum hlum inson loin van laizawlah a ngir zing a. Chu thu chu Jasar Bu-ah an ziek naw am a ni?
14. Chuong ang ni, LALPAN mihriem rawl a ngaithlak ni ang hrim hrim chu a hma khomin, a hnung khomin, a la um ngai nawh. Israelhai chu LALPAN a dopui takzet si a.
15. Chuongchun, Josua chu Israelhai po po leh an riekhmun Gilgala chun a kir nawk ta a.
16. Chun, lal pangahai chu an tlan hmang a, Makeda pukah an inbi a.
17. Makeda pukah lal pangahai an inbi ti an hriet chun Josua an hung hril a.
18. Ama chun, "Puk baua chun lung lien tak tak inhlum lut unla, a vengtu ding mi sie nghal bok ro.
19. Nangni ruok chu um ve naw ro. In hmelmahai chu hnot pei unla, an hnung tienga inthokin bei unla, an khuoah inluttir hrim hrim naw ro. Anni chu LALPA in Pathienin in kuta a pek ta sa a nih" a ta.
20. Josua le Israelhai chun anni chu an suksiet vong a, an khaw kula tlan tlung hman mi tlawmte ti chau naw chu an that fai vong a nih.
21. Chuongchun, an sipai po po chu Josua rawia an inkulna Makeda riekhmuna chun him takin an hung kir a, tu khom Israelhai kal zawnga bau phong ngam hrim an um ta nawh.
22. Josua chun, "Puk bau kha hong unla, lal pangahai kha ka kuomah hung thuoi ro" a ta.
23. Puka inthokin lal panga- Jerusalem lal, Hebron lal, Jarmut lal, Lakis lal le Eglon lal- hai chu an hung thuoi suok a.
24. Josua kuomah an hung thuoi chun Israel thlahai po po chu a ko khawm a, ama le hung sipai kawmandarhai kuoma chun, "Hung unla, hieng lalhai ring hi hung sir de ro" a ta. Chuongchun an hung hnai a, an ringa chun an sir de a.
25. Josua chun, "Ti naw unla, zam bok naw ro. Hrat tak le huoisen takin um ro. Hieng ang bok hin hmelma indo dinghai chunga khom LALPAN a thaw pei ding a nih" a ta.
26. Chu zoa chun Josuan lalhai chu a sat hlum vong a, thing kung panga lerah an ruong chu zan tieng chen a'n khaitir a.
27. Josua thupek angin, an ruong chu ni tlak tawmin an lak thlak a, an inbikrukna puka chun an pei lut a, puk bau chu lung lien tak takin an sin khum a, chu chu tu chen khom hin a la um.
28. Chu ni chun Josuan Makeda khuo chu a lak a, an lal chopin kawlhnamin a sat hlum a, iengkim a suksiet vong a, pakhat khom a hringa hla a nei nawh. Jeriko lal chunga a thaw ang bokin Makeda lal chunga khom a thaw a nih.
29. Josua chun Israelhai po po leh Makeda khuoa inthokin Libna khuo a va bei a,
30. chu khuo chu LALPAN an lal chopin Israelhai kuta chun a pek nawk a. Josua chun chu khuo le a sunga um po po chu kawlhnamin a that vong a, a sunga um tu khom hla hrim hrim an nei nawh. Jeriko lal chunga a thaw ang bokin chu khaw lal chunga khom chun a thaw a nih.
31. Josua le a kuoma um Israelhai po po chun Libnaa inthokin Lakis khuo tieng an pan a, thanghmun an khaw a, an bei a.
32. Lakis khuo khom chu LALPAN Israelhai kutah a pek a, a ni hninain an lak a, chu khuo le a sunga um po po chu kawlhnamin an sukhlum vong a, Libna khaw chunga an thaw ang bok khan an thaw ve a nih.
33. Chun, Gezer khaw lal Horam chu Lakis khuo thangpui dingin a hang fe a, ama le a rawihai chu pakhat khom hla nei der loin Josua chun a lo that vong a.
34. Josua le a kuoma um Israelhai po po chun Lakis khuoa inthokin Eglon khuo tieng an pan a, thanghmun an khaw a, an bei a.
35. Chu ni chun chu khuo chu an lak a, chu ni vek chun khuo chu an sam a, a sunga um po po chu an sukhlum vong a, Lakis khaw chunga an thaw ang bok khan an thaw ve a nih.
36. Josua le a kuoma um Israelhai po po chu Eglon-a inthokin Hebron an kai tung a, an bei a.
37. A khawpui chu an lak a, a sunga um po po le an khawper po po chu kawlhnamin an bei a, an lal chopin an sukhlum vong a. Eglon an thaw ang bokin a khuo le a sunga umhai chu an inram fai thak a nih.
38. Chu zoah Josua le a kuoma um Israel thlahai po po chu kir letin Debir khuo an bei a.
39. A khuo chu an lak a, an khawperhai khom, a sunga um po po leh, kawlhnamin an bei a, an lal chopin an that vong a, pakhat khom hla an nei nawh. Hebron khaw chunga an thaw ang khan Debir khuo le an lal chungah khom an thaw a nih, Libna khuo le an lalhai chunga an thaw ang bok khan.
40. Chuongchun, Josua chun chuong lai biel po po chu, tlang ram hai, sim tieng ram hai, tlak tieng tlang thuta um phai ram hai le tlang pangpera um khuohai le an lalhai po po thang sain, a tukdol vong a, tu khom dama a hla an um nawh. LALPA, Israelhai Pathienin thu a pek angin, a'n thuok thei taphot chu a that fai thak a nih.
41. Kades-barnea inthoka Gaza chenin, Gosen ram po po le Gibeon chenin a tukdol vong a.
42. Tum khata hieng lalhai po po hi Josuan hnea an ramhai a lak vong theina san chu LALPA, Israelhai Pathienin Israelhai chu a dopui lei a nih.
43. Chuongchun, Josua le a kuoma um Israelhai po po chu an riekhmun Gilgal tieng chun an kir nawk ta vong a.
←  Joshua (10/24)  →