Joshua (1/24)  →
1. LALPA siehlaw Mosie thi hnungin, LALPA chun Mosie kaiza vengtu Nuna naupa Josua kuomah,
2. "Ka siehlaw Mosie chu a thi ta a. Tuhin Israel mi po po hi ka pek ding rama fe dingin inpuocha hai sien, Jordan vadung kanpui rawh.
3. Mosie kuoma ka hril tah ang khan, kea in sirna taphot chu pe vong ka ti cheu.
4. In ram chu Lebanon thlalera inthoka vadungpui Eufretis chena Hit mihai ram po po le thlang tieng Tuipui Liena chen ning a tih.
5. I dam sung tu khomin hne thei nawng an ti che. Mosie kuoma ka um ang khan i kuoma khom um ka ta, thlathlam ngai nawng ka ti che a, zamsan ngai bok nawng ka ti che.
6. Hrat tak le huoisen takin hma tawn la, in pi le puhai kuoma inkham meua pek ka tiem rama chun hieng mihai hi thuoi lut la, inhluotir rawh.
7. Hrat tak le huoisen takin hma la rawh. In fena taphotah in dingchang theina dingin ka siehlaw Mosie pek cheu dan po po kha fimkhur takin zawm unla, chang tieng amanih voi tieng amanih petsan naw ro.
8. Hi Dan Bu hi tiem zing hlak la, zieka um iengkim chu fimkhur taka i zawm theina dingin a sun a zanin dawnkhawl hlak rawh. Chuongchun, kong iengkimah hmuingilin hung hlawtling i tih.
9. Hrat tak le huoisen taka um dinga ka ti che kha hre zing la, thlabar naw la, zam bok naw rawh, kei LALPA hin i fena taphotah umpui zing ka ti che" a ta.
10. Chuongchun, Josua chun Israel mipui thuoituhai chu thu a pek a,
11. "Riebuk fang unla, mipuihai kuomah, 'In rawsot chawi ding inpei ro, tuta inthoka ni thumnaah hi taka inthok hin Jordan vadung kan ei ta, LALPA in Pathienin in ta dinga a pek cheu ram chu lutin ei va hluo ding a nih' tiin hril ro" a ta.
12. Reuben hnam hai, Gad hnam hai le Manase hnam zatve hai kuoma ruok chu Josua chun,
13. "LALPA Pathienin nangni chengna dinga Jordan vadung sak tieng ram a pek cheu thu LALPA siehlaw Mosien a hril cheu kha hre zing ro.
14. Nunau le ran ruolhai chu Jordan vadung sak tienga Mosien ram a pek cheua hin lo um an ta, nangni laia ral do thei chinhai ruok chu inralthuomin, in unauhai hmaah Jordan vadung hi in lo kai hmasa ding a nih.
15. Nangni ang boka anni khom LALPAN chawlna hmun pe a, LALPA in Pathienin a pek ram an hluo ve hma khat chun in unauhai chu in thangpui ding a nih. Chu zoa chun LALPA siehlaw Mosie pek cheu Jordan vadung ral sak tieng, nisa suokna tieng chun hung kir nawk in ta, in la hluo ding a nih" tiin a hril a.
16. Anni chun Josua kuomah, "Thu i mi pek taphot chu thaw pei kan ta, fe dinga i mi tirna taphota khom fe pei kan tih.
17. Kong iengkima Mosie thu kan zawm pei hlak ang khan, i thu khom zawm pei kan tih. LALPA i Pathien chu Mosie kuoma a um hlak ang khan i kuoma khom um ve phot el raw se.
18. Tu khom i thu kal a, i hril ieng khom zawm nuom lo chu sukhlumin um a tih. Hrat tak le huoisen takin hma la sau sauh rawh" tiin an hril a.
      Joshua (1/24)  →