←  Jonah (4/4)

---

1.

Jona ruok chu a lawm naw hlea, a lung a sen a.

2.

LALPA kuomah, "Aw LALPA, hi hi an naw maw ina ka um laia ka hril ta kha? Hi lei hi annawm Tarsis tieng inrang taka ka tlan hmang kha. Nang chu Pathien, mi lainatu le lunginsiettu, lung inuoi le hmangainaa sip, sietna intlungtir ding laka kut kei kir hlak mi i nih ti ka hriet annawm.

3.

Tu hin LALPA, ka hringna hi la el rawh, ka ta dingin hring nekin thi a tha lem" a ta.

4.

LALPA chun, "Lungsen theina san ding iem i nei hrim hrim a?" a ta.

5.

Jona chu khawpuia inthokin a suok a, khawpui sak tieng panga chun a'n thung a, chu taka chun sawlbuk a bawl a, khawpui chunga thil hung tlung ding chu hmu tumin sawlbuk hlima chun a nghak ta zing a.

6.

LALPA chun Jona lu zar hlie a, a rinumnaa inthoka sukhadam dingin um a'n zamtir a, um hlim lei chun Jona chu a lawm hle a.

7.

Amiruokchu, a tuk khawfingchat laiin Pathienin um zung fatu dingin thil nge a ruot a, chu chun um zung chu a ret a, a hung vuoi ta a.

8.

Ni a hung insang chun Pathienin khawsak thli lum tak el a hung tir a. Jona lu chu ni intengin a em a, luhaiin a chau a. Thi hiel nuomin Pathien kuomah, "Ka ta ding chun dam nekin thi a tha lem" a ta.

9.

Sienkhom Pathien chun Jona kuomah, "um zam thuah lungsen theina san i nei hrim hrim am a ni?" a ta. Jona chun, "Nei e, thi pha hiel khopin ka lung a sen a nih" a ta.

10.

LALPA ruok chun, "Hi um, nangma inrimpui le chawm lien khom ni lo, zan khat thila hung uma zan khat thila bo nawk el hi i lainat a.

11.

Ninevi khuo, khaw ropui tak, a sunga mani voi le chang khom la hre thei lo mi nuoi khat le singhni chuong le ran ruol tam tak umna hi, ka lunginsiet naw ding am a ni?" a ta.

---

←  Jonah (4/4)