Jonah (1/4)  →
1. Amitai naupa Jona kuomah LALPA thu a hung tlung a:
2. "Tho la, khaw ropui tak Nenevi-ah fe la, an chungthu ding tlang insampui rawh, an ritlona chu ka hmaah a hung tlung ta si a" tiin.
3. Nisienlakhom, Jona chu Pathien hmaa inthoka tlan hmang dingin Tarsis tieng a pan a. Jopa khuoah a fe thlak a, Tarsis pan ding long a hmu a, kal man ding a pek a, longah a lut a, LALPA hmaa inthoka tlan hmang dingin Tarsis tieng a pan a.
4. Chu phing leh LALPAN thlipui hrat tak el tuipuia chun a tir a, long chu mut koi thei hiel khopa nain a hrang a.
5. Longpuhai chu an ti hle a, mani pathien seng koin an khek a. Long sukzangna dingin long thuomhnawhai chu tuiah an pei thawl bok a. Jona ruok chu long sunga chun a fe a, a zal a, a in bor bor a.
6. Long kapten chu a kuomah a fe a, "Iengtia in am i na? Tho la, i Pathien ko ve rawh, aman mi ngaisak a, ei bohmang nawna dingin" a ta.
7. Chun, longpuhai chun, "Hi sietna hi tu leia hung tlung am a nih ti hrietna dingin thum vawr ei tiu" an ta. Chuongchun, thum an vawr a, Jona chungah a tla a.
8. Anni chun a kuomah, "Buoina ei chunga hung tlung hi ieng lei am a na ti mi hril raw khai. I sinthaw iem a na? Khaw laia inthoka hung am i na? Khaw lai ram mi am i na? Ieng hnam am i na?" tiin an indon a.
9. Ama chun, "Hebrai mi ka ni a, LALPA, van Pathien, hnuoi le tuipuihai siemtu betu ka nih" a ta.
10. Mihai chu a sukthlabar zuol a, a kuomah, "Ieng top am i thaw an ta maw!" an ta (LALPA a tlan hmangsan thu chu a hril tawl tah leiin an hriet a)
11. Tui chu a fawn zuol deu deu a. Chuongchun a kuomah, "Tuipui fawn hi a re theina dingin i chungah iem thaw tang kan ta?" an ta.
12. Ama chun, "Mi chawi kang unla, tuipuiah mi pei unla, tui fawn chu re el tih. Keima indik nawna leiin thlipui na tak hi in chungah a hung hrang a nih ti ka hriet" a ta.
13. Chuonga thaw el loin, longpuhai chun khawmuol tieng kir nawk tumin theitawpin long chu an kar ngat ngat a, sienkhom an thaw thei naw a, a hma nekin tuipui chu a'n sok nasa zuol sau a.
14. Chuleiin, LALPA chu an ko a, "Aw LALPA, hi mipa hringna lei hin mi sukbohmang naw la, poi tawk lo thisen maw chu kan chungah innghat lo dingin kan ngen che; nang chu aw LALPA, i dit ang anga thil thaw hlaktu i ni si a" tiin an ngen a.
15. Chuongchun Jona chu an chawi kang a, tuipuia chun an pei a, tuipui fawn insok buon buon chu a re ta a.
16. Chu chu an hmuin mihai chun nasa takin LALPA chu an ti a, LALPA kuomah inthawina an inhlan a, thu an intiemkam a.
17. LALPA ruok chun Jona lemtu ding ngapui a lo ruot diem a, ngapui sunga chun Jona chu ni thum le zan thum a um a.
      Jonah (1/4)  →