←  John (9/21)  →
1. Isu chun a fe malamin mitdel saa pieng mi pakhat a hmu a.
2. A zirtirhai chun, "Zirtirtu, mit indel saa pieng hi ama suol lei a ni, a nu le pa suolna lei?" tiin an indon a.
3. Isun a don a, "Hi pa hin suol a thaw nawh, a nu le pa khomin an thaw bok nawh, amaah Pathien sinthaw a'n lang theina ding a ni lem.
4. Sun a ni lai hin a mi tirtu sin ei thaw ding a nih. Tu khomin sin an thaw thei naw hun zan a hung tlung ding a nih.
5. Khawvela ka cham sungin khawvel entu ka nih" a ta.
6. Chuonga a hril zo chun hnuoiah chil a sak a, a chilin pilpok a siem a, mitdel mita chun a bel a,
7. "Siloam dilah va sawp rawh" a ta. Siloam chu 'Tir' tina a nih. Chuongchun a fe a, a va sawp a, mit varin a hung kir tah a.
8. An tuolbawmhai le kha hmaa a kutdaw lo hmu hlak hai chun, "Hi pa hi kutdawa thung hlak kha a ni nawm a ni?" an ta.
9. Thenkhatin, "Kha pa kha ni e" an ta, mi dangin, "An nawh ie, a angpui a ni lem" an ti bok a. Ama chun, "Kha pa kha ka nih" a ta.
10. Anni chun, "Anleh, ieng tin am i mit a hung var leh?" an ta.
11. Ama chun, "Mi pakhat Isu an ti khan pilpok a siem a, ka mitah a bel a, 'Siloam dilah va sawp rawh' a ta, ka va sawp a, ka hmu thei el a nih" a ta.
12. Anni chun, "Ama chu khaw la'm a um?" an ta. Ama chun, "Ka hriet nawh" a ta.
13. Chuongchun, mitdel ni hlak kha Farisaihai kuomah an thuoi a.
14. Isun pilpok siema a mit a sukvar ni kha Sabat a nih.
15. Farisaihai chun mit varna a hmu dan chu an indon a. Ama chun, "Ka mitah pilpok a bel a, ka phi fai a, ka hmu thei el a nih" a ta.
16. Farisai thenkhat chun, "Chu pa chun Sabat an ser naw leiin Pathien kuoma inthoka suok ni naw nih" an ta. Thenkhat ruok chun, "Misuolin ieng tin am hieng ang thilmak hi thaw thei a ta?" an ti bok a, anni rawi inkarah inthena a hung suok ta a.
17. "Ama chu ieng angin am i ngai, i mit a sukvarpek si che a?" tiin mitdel chu an indon nawk a. Ama chun, "Zawlnei a nih" a ta.
18. A nu le pa an ko hma chun mitvarna changtu chu kha hmaa mitdel ngei a ni thu le mitvarna a hmu thu chu Judahai chun an awi nuom tlat naw a.
19. A nu le pa kuoma chun, "Hi pa hi in naupa, mitdel sa hrima pieng in ti kha a ni? Iengtin am tuhin a hung hmu thei ta a?" tiin an indon a.
20. Anni chun, "Hi pa hi kan naupa a nih ti kan hriet. Mitdel sain a pieng ti khom kan hriet.
21. Nisienlakhom, iengtin am tuhin a hung hmu thei tah ti kan hriet naw a, a mit sukvartu khom kan hriet bok nawh; ama kha indon ro, puitling a ni ve tah annawm, aman ama chungthu chu hril raw se" an ta.
22. Judahai an ti leiin a nu le pa chun chuong ang chun an ti a nih; Judahai chun, "Ama chu Krista a nih" tia pom taphot chu sunagoga inthoka hnawl ding tia thu an lo rel ta sa a ni si a.
23. Chu lei chun a nih a nu le pain "ama kha indon ro, puitling a ni ve tah annawm" an ti chu ni.
24. Chuongchun, mitdel ni hlak chu an ko nawk a, "Pathien chawimawi rawh.n Hi mipa hi misuol a nih ti kan hriet" an ta.
25. Ama chun, "Misuol a ni le ni naw ka hriet nawh, thil pakhat ka hriet, mitdel ka ni hlak a, tuhin chu ka hmu thei tah" a ta.
26. Anni chun, "Iengtin am a thaw chea i mit a hung var el chu?" tiin an indon nawk a.
27. Ama chun, " Ka hril vong ta cheu annawm, in hriet nuom si nawh; Ieng dinga tuta in hriet nuom nawk tlat? Nangni khom a zirtir ni ve in nuom a ni?" a ta.
28. Anni chun an hal a, "Nanga phiengsen hi ama zirtir i na, keini chu Mosie zirtirhai kan nih.
29. Pathienin Mosie a biek ti kan hriet, hi pa ve hi khaw laia mi am a na ti kan hriet hrep nawh" an ta.
30. Ama chun a don a, "Chu tak chu a nih a makna chu! Khaw lai mi am a nih ti in hriet naw a, sienkhom ka mit a sukvar tlat si.
31. Pathienin mi suol thu a ngaithlak ngai nawh ti ei hriet; Pathien ngaisaktu, a ditzawng thawtuhai thu ruok chu a ngaithlak hlak.
32. Khawvel insieng tira inthokin mitdel saa pieng mit an sukvar nawk ti tu khomin an hriet ngai nawh.
33. Hi pa hi Pathien kuoma inthoka suok ni naw sien chu ieng khom thaw thei naw nih" a ta.
34. Anni chun, "Nang, suol letdera piengin keini i mi hril vei maw!" an ta. Chuongchun, an hnot suok tah a.
35. An hnot suok ti Isun a lo hriet chun a zong suok a, "Pathien Naupa i ring am?" a ta.
36. Ama chun, "Pu, ama chu tu am a na? Ring ka tih" a ta.
37. Isun a kuomah, "Ama chu i hmu zing tah, a betu che hi a nih" a ta.
38. "Lalpa ka ring ie" tiin a chawibiek nghal a.
39. Isun a kuomah, "Rorel dinga hi khawvela hung ka nih, mitdelhai mit a hung varna ding le mitvarhai mit a hung indelna dingin" a ta.
40. An bula um Farisaihaiin chu thu chu an hrietin, "Keini khom mitdel kan ni ve a ni?" an ta.
41. Isu chun, "Mitdel in ni chun suol leia inthiem nawna lungril nei naw ti niu; tuhin chu 'Kan hmu thei' in ti tlat leiin inthiem nawna suol chu nangniah a um zing a nih" a ta.
←  John (9/21)  →