←  John (8/21)  →
1. Isu ruok chu Oliv tlangah a fe a.
2. A zing vartienin tempulah a lut nawk a, chu taka mi um po po chun an hung bawr a, a thung a, anni chu a zirtir a.
3. Dan zirtirtuhai le Farisaihai chun nuhmei, a uire laia man,k an hung thuoi a, a laiah an inngirtir a.
4. Isu kuoma chun, "Zirtirtu, hi nu hi a uire lai taka man a ni a.
5. Mosie mi pek Dan ang chun hieng ang nuhmei hi lunga deng hlum ding a na, nangin iengtin am i ngai a?" an ta.
6. Chu chu a hekna ding an hmu theina dinga khal awk an tumna a nih. Sienkhom, Isu chu a kun a, a kutparin hnuoiah thil a ziek a.
7. Chuonga an hnaw sek sek lei chun a hang dak a, an kuomah, "Nangni lai suol nei lo in um chun deng hmasa raw se" a ta.
8. A kun a, hnuoi a ziek nawk a.l
9. A thu hril an hrietin, a upa taka inthoka tanin pakhat khatin an inrel hmang a, a tawpah Isu le nuhmei ngir chauh chu an um tah a.
10. Isu chu a hang dak a, "Nuhmei, khaw lai am an um zo ta a? Thiem naw inchangtir che tu khom an um naw a ni maw?" a ta.
11. Ama chun, "Pu, an um nawh" a ta. Isu chun, "Kei khomin thiem naw ka'n changtir naw che. Fe la, suol nawk ta ngai naw rawh" a ta.m
12. Isun an kuomah thu a hril nawk a. "Kei hi khawvel entu ka nih, tu khom a mi zui chu inthimah leng top naw ni a, hringna var nei lem a tih" a ta.
13. Farisaihai chun, " Mani thu a nih i hril hi, i thu hril a'n dik nawh" an ta.
14. Isun, "Keima thu inhriettir lang khom ka thu inhriettir chu thu dik a nih, ka hung suokna le ka fena ding ka hriet si a; nangni chun ka hung suokna le ka fena ding chin in hriet nawh.
15. Nangni chun mihriem dan hmangin thu in rel a, kei ruok chun tu chung thu khom ka rel nawh.
16. Lo rel khom ni ta lang, ka thu rel chu indik a tih, a reltu chu keima el ni loin kei le mi tirtu Pa kan ni si a.
17. In Dana ngei khom, hrepuitu mi pahni thu chu pom tlak a nih ti ziek a um.
18. Keiin ka thu ka'n hriettir a, a mi hrepuitu chu mi tirtu Pa a nih" a ta.
19. Anni chun "Khaw lam i pa chu?" an ta. Isun, "Nangnin in mi hriet nawh, ka Pa khom in hriet nawh. Kei mi hrie ni unla chu, ka Pa khom in hriet ta ding bah" a ta.
20. Chuong thu chu tempul thawlawm bawm siena bula a zirtir laia a hril a nih. Tu khomin an la man chuong nawh, a hun a la tlung naw leiin.
21. Isun an kuomah, "Ka fe hmang ding a na, nangnin mi zong in ta, in suolna leh thi'ng in tih; ka fena dingah nangni hung thei naw ti niu" a ti nawk a.
22. Judahai chun, " 'Ka fena dingah nangni hung thei naw ti niu' a ti hi ama le ama inthat a tum ning a ti?" tiin an indon tuo a.
23. Isu chun hril zom peiin, "Nangni chu hnuoi tienga inthoka hung suok in na, kei chu chung tienga inthoka hung thla ka nih; nangni chu hi khawvela mi in ni a, kei chu hi khawvela mi hi ka ni nawh.
24. Chu lei chu annawm, 'In suolna leh thing in tih' ka ti kha; Keima chu ka nih ka ti hi in awi si naw chun in suolna leh thi hrim in tih" a ta.
25. Anni chun, "Tu'm i na ?" an ta. Isun, "A tirin ka hril ta cheu an naw maw?
26. In chungchang thua hin hril le rel ding tam tak ka nei; ieng po khom ni sien, a mi tirtu chu mi indik tak a na, a kuoma inthoka ka hriet chauh khawvel kuomah ka hril hlak" a ta.
27. An kuomah Pa thu a hril a nih ti an hriet si nawh.
28. Isu bokin an kuomah, "Mihriem Naupa hi in khai kang pha leh Keima chu ka nih ti le keima thuin thil ieng khom ka thaw naw a, Pain a mi hril ang peiin ka hril chauh a nih ti hung hre tang in tih.
29. A mi tirtu chu ka kuomah a um a, makhata um dingin a mi thlathlam ngai nawh, a lawmzawng ka thaw pei hlak leiin" a ta.
30. Chuong thu chu a hril lai zingin mi tam takin ama chu an ring tah a.
31. Ama ringtu Judahai kuoma chun Isun, "Ka thuah in um zing chun ka zirtirhai ni takzet in tih.
32. Thutak hrieng in ta, thutak chun inzalentir a ti cheu" a ta.
33. Anni chun, "Abraham thlahai kan nih, tu bawia khom kan la um ngai nawh. Iengti leia 'Inzalentir a ti cheu' dam chu i ti am a na?" an ta.
34. Isun an kuomah, "Thu dik tak ka hril cheu hi, tu khom suol thawtu chu suol bawi a nih.
35. Bawi chu sungkuoah a thang zing nawh, naupa ruok chu kumkhuoin nau a ni zing.
36. Chuleiin, Naupain a'n zalentir cheu chun zalen tak tak tang in tih.
37. Abraham thlahai in nih ti ka hriet. Amiruokchu, mi that in tum si, ka thuin nangniah hmun a chang naw leiin.
38. Keiin ka Pa kuoma thil ka hmu chu ka hril hlak; nangni ruok chun in paa inthoka in hriet chu in thaw hlak" a ta.
39. Anni chun, "Kan pa Abraham a nih" an ta. Isun, "Abraham nauhai in ni chun Abraham thaw ang thawng in tih.
40. Tu ruok hin chu, Pathien kuoma inthoka thutak hretu le hriltu cheu hi, mi that in tum si! Abrahamin hieng thil hi a thaw ngai nawh.
41. In pa thaw ang in thaw ve a ni hi" a ta. Anni chun, "Sawn kan ni nawh, pa pakhat chauh kan nei, Pathien ngei chu" tiin thang an khaw a.
42. Isu chun an kuomah, "In pa chu Pathien ni sien, mi hmangai in tih, Pathiena inthoka hung ka ni si a. Hi taka ka um hi ka thua hung ka ni naw a, amain a mi tir lei a nih.
43. Ka thu hril hi ieng leia in hriet thiem naw? Ka thu in man fuk thei naw lei a nih.
44. In pa Diebol nauhai in ni a, in pa lawmzawng thaw in nuom hlak. Ama chu a tira inthokin tuoltthattu a nih; thutakah a ngir ngai naw a, amaah thutak a um bok nawh. Khelhril hi a piengpui tong hrim a ni a, a khelhlip a, khel po po pa a nih.
45. Thutak ka hril lei cheuin in mi ring naw a ni hi.
46. Ka suolna hrie nangni lai tu'm in um? Thutak ka hril cheu hi, ieng leia in mi ring naw?
47. Pathien mi chun Pathien thu a ngaithlak hlak; nangni ruok chun ka thu in ngaithlak nawh, Pathiena inthoka suok in ni naw leiin" a ta.
48. Judahai chun, "Nang hi Samari mi, ramhuoi zawl kan ti che kha kan lo ti indik hle an naw maw?" an ta.
49. Isu chun, "Ramhuoi zawl ka ni nawh, ka Pa ka chawimawi a ni lem; nangni ruok chun in mi sukpawi si.
50. Mani ropuina ka zong nawh, sienkhom a zongtu pakhat a um a, ama chu roreltu a nih.
51. Thudik ka hril cheu hi, tu khom ka thu vongtu chun kumkhuoin thina intem ngai naw nih" a ta.
52. Chu zet chun Judahaiin, "Tuhin chu ramhuoi zawl i ni takzetzie kan hriet chieng tah. Abraham a thi tah a, zawlneihai khom an thi tah a, nang hlakin, 'Tu khom ka thu vongtu chun kumkhuoin thina intem ngai naw nih' dam i ti vel a.
53. Kan thlatu Abraham nekin i ropui lem am a ni? Ama khom a thi tah, zawlneihai khom an thi tah. Nang, a tua inruot reng reng che?" an ta.
54. Isun a don a, "Mani inchawimawi ni lang, ka mawiin thu fun naw nih. 'Kan Pathien' in ti ve, ka Pa chu mi chawimawitu a nih.
55. Nangnin ama chu in hriet si nawh, kei chun ama ka hriet. 'Ama chu ka hriet nawh' ti lang, nangni ang boka khelhlip ning ka tih. Ama ka hriet a, a thu ka vong hlak.
56. In thlatu Abraham kha ka ni hmu ding a ni leiin a hlim em em a, a hmu ta ngei a, a lawm hrim a nih" a ta.
57. Judahai chun, "Nang kum sawmnga khom la tling lo che, Abraham i hmua maw?" an ta.
58. Isun, "Thudik tak ka hril cheu hi, Abraham pieng hma khomin ka um tah" a ta.
59. Ama dengna dingin lung an rut a, sienkhom Isu an bi a, tempula inthok chun an rel suok tah a.
←  John (8/21)  →