← John (7/21) → |
1. | Chu zoa chun Isun Galili ram a fang vel a; Judahaiin that tuma remchang an zong leiin Judai ram ruok chu a fang nuom nawh. |
2. | Judahai Bawkte Kutj chu a hnai tah a. |
3. | Isu unauhai chun a kuomah, "Hi hmun hi suoksan la, Judai ramah fe rawh, i zirtirhaiin i thilthaw hi an hmu theina dingin. |
4. | Hmingthang nuom siin tu khomin a rukin thil an thaw ngai nawh. Hieng thil hi i thaw rau rau si chun khawvel hrietah intar lang ta la" an ta. |
5. | A unauhai ngei khomin ama chu an ring si nawh. |
6. | Isu chun, "Ka hun a la tlung nawh, nangni hun ruok chu a tlung zing a nih. |
7. | Khawvelin nangni a theida thei naw cheu, kei ruok chu a mi theida a, a thil suol thaw kan hriettir hlak leiin. |
8. | Kuta chun hang fe unla, kei chu la hung hri naw phot ka tih, ka hun a la tlung naw leiin" a ta. |
9. | Chuong thu chu an kuomah a hril a, Galili ramah a la cham zing a. |
10. | Kut hmang dinga a unauhai an fe hnungin ama khom tlang hriet loin a rukin a hang fe a. |
11. | Kut lai chun ama chu Judahaiin an zong a, "Khaw lam a um?" tiin an indon a. |
12. | Mipui chun a chanchin an hril sup sup a. Thenkhatin "Mi tha a nih" an ta, a thenin "Teu lo e, mipui hlemtu a nih" an ti bok a. |
13. | Judahai an ti leiin tu khomin a chungchang thu uolau takin an hril ngam nawh. |
14. | Kut vanglai takin Isu chu tempulah a hang fe a, a zirtir a. |
15. | Judahaiin, " Hi pa hin inchukna nei si loin iengti lawm lawma hienga a hriet?" tiin makti takin an indon tuo a. |
16. | Isu chun, "Ka thu inchuktir hi keima awm thu suok el a ni naw a, a mi tirtu zirtirna a ni lem. |
17. | Tu khom Pathien ditzawng thaw nuomtu chun ka thu inchuktir hi Pathiena inthoka suok am ka phuokfawm ti hrieng an tih. |
18. | Tu khom mani phuokfawm thu hriltu chun mani ropuina a zong a nih. A tirtu ropuina zongtu ruok chu mi thutak a na, amaa chun indik nawna hrim a um nawh. |
19. | Mosien Dan a pek cheu an naw maw? Sienkhom tu khomin in zawm nuom bok si nawh. Ieng leia mi that in tum?" a ta. |
20. | Mipui chun, "Ramhuoi zawl i ni hi; tuin am that a tum reng reng che leh?" an ta. |
21. | Isu chun, "Thil mak pakhat ka thaw a, inrengin mak in ti a. |
22. | Mosien sertan thu a pek lei cheuin (Mosie thaw tan ni loin in thlatuhai ching tan a ni lem kha), Sabat ni khomin ser in tan hlak. |
23. | Mosie Dan bawsiet nawna dinga Sabat ni khoma naupang ser in tan hlak si chun, ieng dinga Sabat nia mi ka sukdam lei ela ka chungah in lung a sen bik? |
24. | Puo tieng inlang dan ringot thlir loin, indik takin thu rel ro" a ta. |
25. | Jerusalema mi thenkhatin, "Hi pa hi that an tum kha a ni naw am a nih? |
26. | En ta u, tlang hrietin thu a hril a, tu khomin an kal si naw hi! Ama hi hotuhaiin Krista chu ni ngeiin an hriet tah tina am a ni ding? |
27. | Hi pa hi khaw lai mi am a nih ti ei hriet si a; Krista chu a hung pha chun a hungna chin tu khomin an hriet awm top si nawh" an ta. |
28. | Tempula a zirtir lai chun Isun rawl inring takin, "Nangnin in mi hriet, khaw lai mi am ka nih ti khom in hriet. Nisienlakhom, keima thua hung ka ni nawh. A mi tirtu hi mi indik tak a na, ama chu in hriet nawh. |
29. | Kei ruok chun ama chu ka hriet; a kuoma inthoka hung ka na, ama mi tir ka nih" a ta. |
30. | Chuongchun, ama chu man an tum a, sienkhom a hun a la tlung naw leiin tu khomin a chungah kut an thlak hri nawh. |
31. | Mipui laia tam tak ruok chun ama chu an ring a. "Mesia khom hung sien la, ama nek hin inchikna thil mak a thaw rawn bik chuong ding am a nih?" an ti tawl a. |
32. | A chungthua mipui titi ruk chu Farisaihaiin an hrietin, thiempu lalhai le Farisaihai chun Isu man dingin tempul pulis an tir a. |
33. | Isun an kuomah, "Sawtnawte in kuomah la um hring ka ta, chu zoah a mi tirtu kuomah feng ka tih. |
34. | Nangnin mi zong in ta, mi hmu naw ti niu; ka umna dinga khom hung thei naw ti niu" a ta. |
35. | Judahai chun, "Ei hmu thei naw dingin hi pa hi khaw lai am fe a tum a ni ding aw? Grikhai laia eini mi inpem darhai lai fein Grikhai chu zirtir a tum am a ni ding? |
36. | Nangnin mi zong in ta, mi hmu si naw ti niu, ka umna dinga khom hung thei naw ti niu' a ti hi ieng tina am ning a ta?" an ti tawl a. |
37. | Kut tumtiek ni ding, a nipui ni tak chun Isu a ngir a, inring takin a khek a, "Tu khom dangchar chu ka kuomah hung sien, dawn raw se. |
38. | Pathien lekha thuin a hril angin, tu khom kei mi ring chu a sunga inthokin hringna tui hung luong suok a tih" a ta. |
39. | Chu chu ama ringtuhaiin Thlarau an la chang ding thu a hrilna a nih. Thlarau chu pek a la ni hri nawh, Isu chu chawimawia a la um si naw leiin. |
40. | Chuong thu chu an hrietin mipui lai thenkhatin, "Hi pa hi zawlnei chu a ni ngei hi" an ti a. |
41. | Mi dangin, "Hi pa hi Krista chu a nih" an ti bok a. Thenkhatin, "Krista chu Galili rama inthokin a hung suok ding maw? |
42. | Pathien thuin, 'Krista chu Davida thla, Davida khuo Bethlehema hung pieng ding a nih' a ti an naw maw?" an ta. |
43. | Chuongchun, ama leiin mipui lai inthena a suok a. |
44. | Anni laia thenkhat chun man an nuom a, sienkhom tu khomin an tawk nawh. |
45. | Tempul pulishai chu thiempu lalhai le Farisaihai kuoma chun an kir nawk a, anni chun, "Ieng dinga in hung thuoi naw?" an lo ti a. |
46. | Tempul pulishai chun, "Hi mipa ang hrim hin tu khomin thu an la hril ngai nawh" tiin an don a. |
47. | Farisaihai chun, "Nangni khom a lo hlem hman ve cheu a ni maw? |
48. | Hotuhai le Farisaihai laia mi tu khom ama ring an um nawh ti in hriet naw maw? |
49. | Dan hre lo mipuihai hi tongsephur an nih" tiin an khak a. |
50. | Anni laia pakhat Nikodem, kha hmaa Isu kuoma leng tah khan, |
51. | "Ei Dan ang chun, miin a thiem thu a hril ngaithlak zet hma le iem a thaw ti hriet chieng zet hma chun thiem naw inchangtir thei a ni'm a ni?" a ta. |
52. | Anni chun, "Nang khom Galili mi i ni ve am an tah? Pathien lekha thu ngun takin bi la, Galili rama inthokin zawlnei an suok ngai nawh ti hmung i tih" an ta. |
53. | Chuongchun, mi tin mani inah an inlawi ta seng a. |
← John (7/21) → |