John (5/21)

← John (5/21) →

Chu hnung chun Judahai kut pakhat a um a, Isu khom Jerusalemah a hang fe a.

Jerusalema Beram Kotkhar an ti bula chun dil a um a, chu dil chu Aramik tongin Bethesda an ta, tuolpuk panga a nei a.

Chu taka chun tui hung phul hun inchanin damnaw mitdel, kebai le zeng tam tak an zal khup a.

A chang changin Lalpa vantirko a hung tum a, dil tui chu a chokphul a, damnaw tu khom tui phul laia dila inchawm thla hmasa tak chu ieng ang natna nei khom an dam pei hlak a.i

Chu taka chun kum sawmthum pariet zet zeng tah mi pakhat a um a.

Isun a zal lai a hmu a, chuong ang chun sawt tak a um tah ti a hriet a, "Dam i nuom am?" a ta.

Zeng chun, "Pu, tui a hung phul pha dila mi sietu ding mi ka nei si naw a, lut ka tum sungin mi dangin an mi lut khal nawk pei hlak annawm" a ta.

Isun a kuomah, "Tho la, i puonpha la la, lawn ta rawh" a ta.

Zeng chu a dam ta nghal a, a puonpha a lak a, a lawn el tah a. Chu ni chu Sabat a nih.

10.

A dampa kuoma chun Judahaiin, "Sabat a ni hi, i puonpha i chawi a thieng nawh" an ta.

11.

Ama chun, "A mi sukdamtuin 'I puonpha la la, lawn ta rawh' a mi tih annawm" tiin a don tawl a.

12.

Anni chun, " 'I puonpha la la, lawn ta rawh' titu che chu tu'm a na?" an ta.

13.

Ama chun tu'm a nih ti a hriet der si nawh, Isu hlak mipui inzi nuoi nuoi lai chun a pil hmang ta dai si.

14.

Chu hnung chun Isun ama chu tempulah a hmu a, a kuomah "Ngai rawh, i lo dam tah hi, suol nawk ta ngai naw rawh, chuong naw chun i chungah thil tha naw nawk zuol hung tlung rawi a tih" a ta.

15.

Ama chu a fe a, a sukdamtu chu Isu a nih ti Judahai chu a va hril a.

16.

Sabat nia chuong ang thil a thaw lei chun Judahaiin Isu chu an sukduda tah a.

17.

Isu chun anni chu a don a, "Ka Pain tu chen hin sin a thaw zing a, kei khomin ka thaw a nih" a ta.

18.

Chuleiin Judahaiin ama chu sukhlum an tum nawk zuol a, Sabat a bawsiet lei chauh khom ni loa Pathien a Paah inbuk a, Pathien tluka a'n sie leiin.

19.

Isun anni chu a don a, "Thu dik tak ka hril cheu hi. Naupa hin Pain a thaw a hmu chauh naw chu ama khatin ieng khom a thaw thei naw a, Pain a thaw ang ang chu Naupa khomin a thaw a nih.

20.

Pain Naupa a hmangai a, a thilthaw iengkim a'n entir a, mak in ti dingin hieng neka thil ropui lem khom hi la'n entir a tih.

21.

Pain mithi keithoa a sukhring nawk angin, Naupa khomin a nuom nuom a sukhring el a nih.

22.

Pain tu chungthu khom a relpek naw a, Naupa kuomah rorelna a pek vong a nih;

23.

mi po poin Pa an inza anga Naupa an inzana dingin. Tu khom Naupa inza naw chun ama tirtu Pa an inza naw a nih.

24.

"Thudik tak ka hril cheu hi, tu khom ka thu hrea a mi tirtu ring chun chatuon hringna a nei a, thiem naw a chang ta naw a, thinaa inthoka suokin hringnaah a lut ta lem a nih.

25.

Thudik ka hril cheu hi, a hun a hung tlung ding a na, tu khom hin a tlung ta mek a; mithihaiin Pathien Naupa rawl hrieng an ta, a hre taphot hring an tih.

26.

Pa chu amaa hringna hnar a ni angin Naupa khom amaa hringna hnar nina a pek.

27.

Mihriem Naupa a ni leiin a kuomah rorel theina thu a pek bok.

28.

"Hieng hi makti naw ro, mithi lo zal ta po poin a rawl an hriet hun la tlung a ta,

29.

thlana inthokin hung suok vong an ta, thil tha thawtuhai chu hringna chang dingin tho nawk an ta, thil suol thawtuhai ruok chu thiem naw chang dingin tho nawk an tih.

30.

Keima khatin ieng khom ka thaw thei nawh, hrila ka um ang peiin ro ka rel a, ka rorel khom a'n dik a nih, keima ditzawnga thaw tum loa a mi tirtu ditzawng chauh thaw ka tum leiin.

31.

"Mani chanchin inhriettir ni lang chu, ka thu inhriettir chu ringsan tlak ni naw nih.

32.

Amiruokchu, mi dang ka thu inhriettirtu a um a, ka thu a'n hriettir chu a'n dik ti ka hriet.

33.

Johan kuomah mi in tir a, ama chun thutak a lo hril tah cheu kha.

34.

Mihriem hrietpuina ka pom lei ni loin, sandama in um theina dingin chuong chu ka hril a ni lem.

35.

Johan chu khawnvar var tak a na, a varah hlim taka cheng hri khom in nuom a.

36.

Sienkhom, Johan thu hrietpuina neka poimaw lem hrepuitu ka nei. Pain hlen dinga sin a mi pekhai, tuta ka thaw lai mek hin Pain kei a mi tir ngei a nih ti a'n hriettir a nih.

37.

A mi tirtu Pa ngei chun ka thu a'n hriettir bok a nih. A rawl iengtik lai khom in hriet ngai naw a, a hmel in hmu ngai bok nawh.

38.

A thu khom lungrilah in pai zing nawh, a tir hi in ring naw leiin.

39.

Pathien lekha thuhai ngun takin in inchuk hlak, chuonghai chun chatuon hringna pe thei cheua in ngai leiin. Chuong lekha thuhai chu ka aia ka thu inhrietirtu an nih.

40.

Chuong sa khom chun hringna nei dingin ka kuomah in hung nuom si nawh.

41.

"Mihriem inpak hlaw hi ka thil hnot a ni nawh.

42.

Nangni ka hriet cheu. In lungrilin Pathien in hmangai nawh ti ka hriet.

43.

Ka Pa hmingin ka hung a, in mi lo pom si nawh; mi dang mani hmingin hung sien, ama chu lo pom in tih.

44.

Pathien tak um sun chawimawi hlaw tuma thang la si loa nangni inchawimawi ton ringot in lawm hin iengtin am ring thei in ta?

45.

Pa kuomah keiin ka hek cheu ring naw ro, nangni hektu chu in beisei innghatna Mosie a nih.

46.

Mosie in ring dam chu ni sien, kei khom mi ring in tih, ama chun ka chanchin a nih a ziek.

47.

A thu ziek in ring si naw chun iengtin am ka thu hril ring hrim in ta?" a ta.

← John (5/21) →