←  John (4/21)  →
1. Johan nekin Isun zirtir tam lem a siem ti le a baptis rawn lem ti Farisaihaiin an hriet ti Isun a hriet chun
2. (Ama Isu chun a baptis naw a, a zirtirhaiin an baptis lem a nih),
3. Judai ram suoksanin Galili tieng a kir nawk a.
4. Samari ram a fe thleng a ngai a.
5. Samari rama khaw pakhat Sikar an ti chu a hung tlung a, chu chu Jakobin a naupa Josefa hmun a pek kawla um a nih.
6. Jakob tuikul khom chu taka chun a um a. Isu chu an inzin sawl leiin tuikul sira chun a thung chot a, sunbu fak hun vel a nih.
7. Tui chawi dingin Samari nu pakhat a hung a. Isun a kuomah, "Dawn ding mi pe rawh" a ta.
8. A zirtirhai hlak chu fak ding inchaw dingin khuoah an fe ta si a.
9. Samari nu chun, "Nang Juda mi i na, kei Samari nu ka ni si a, iengtiziea dawn ding i mi hni am a na?" a ta. (Judahai le Samari mihai chun ieng khom an hmang intawm ngai si nawh).g
10. Isun a don a, "Pathien thilpek le 'Dawn ding mi pe rawh' titu hi hre la chu, nangin a kuomah i hni lem ding bah; ama chun hringna tui a pek ding che a nih" a ta.
11. Nuhmei chun, "Pu, tui khai suokna ding ieng khom i nei si naw a, tuikul hi a'n thuk vei leh, khaw laia inthokin am hringna tui chu i nei thei a?
12. Kan pu Jakob nekin i ropui lem am a nih? Ama chun tuikul hi a mi pek a, ama le a nauhai le a ran ruolhai khomin hi tui hi an dawn hlak" a ta.
13. Isu chun, "Tu khom hi tui dawntu chu a dang char nawk a ta;
14. tu khom ka pek tui dawn taphot chu a dang char ta ngai naw nih. Tui ka pek chu a sungah chatuon chena kang thei lo hringna tuihnarin hung put suok a tih" a ta.
15. Nuhmei chun, "Pu, chu tui chu mi pe rawh, ka dang a char ta nawna ding le hi chen chena tui chawia ka hung ta nawna dingin" a ta.
16. Isun, "I pasal va ko la, hung nawk rawh" a ta.
17. Nuhmei chun, "Pasal ka nei lem!" a ta. Isun " 'Pasal ka nei nawh' i ti hi i hril indik.
18. Pasal panga i nei tah a, tuta i kol lai hi i pasal a ni naw hrim a nih. I hril indik ngot el" a ta.
19. Nuhmei chun, "Pu, zawlnei i nih ti ka hriet tah.
20. Kan pi le puhai chun hi tlanga hin Pathien an chawibiek hlak a, nangni Judahai ruok chun 'Jerusalema ngei mihaiin Pathien an chawibiek ding a nih' in ti hlak" a ta.
21. Isu chun, "Nuhmei, ka hril hi awi rawh, hi tlanga kher naw khom, Jerusalema kher naw khom Pathien an chawibiek hun a tlung ding a ni tah.
22. Nangnin in hriet naw in chawibiek hlak a, keini chun kan hriet chu kan chawibiek hlak; sandamna chu Judahaia inthoka hung suok a ni si a.
23. Pathien chawibiektu tak tak haiin thlarau le thutaka Pa an chawibiek hun chu a tlung ding a ni tah, tu khom hin a tlung mek zing. Chuong ang mi chu ama chawibiektu dingin Pain a zong hrim a nih.
24. Pathien chu Thlarau a na, ama chawibiektuhaiin thlarau le thutakin an chawibiek ding a nih" a ta.
25. Nuhmei chun, Mesia, Krista an ti chu a hung ding a nih ti ka hriet a, a hung pha iengkim mi la hril a tih" a ta.
26. Isun a kuomah, " Kei, a betu che hi ama chu ka nih" a ta.
27. Chuong lai tak chun a zirtirhai chu an hung tlung a, nuhmei a lo biek chu mak an ti hle a. Amiruokchu, tu khomin, "Ieng am i du?" amanih "Ieng dinga nuhmei i biek?" khom an ti chuong nawh.
28. Nuhmei chun a tuibel a maksan a, khuo tieng a kir a, mihai kuoma chun,
29. "Ka thilthaw taphot mi hril vong theitu mi pakhat a um a, hung unla, hung en hrim ta u, Krista a ni thei awm am?" a ta.
30. Anni chu khuoa inthok chun an suok a, a kuom tieng an pan tah a.
31. Chu kar chun zirtirhaiin, "Zirtirtu, fa rawh" tiin an ngen a.
32. Ama hlak chun, "In hriet naw bu fak ding ka nei" a ta.
33. Zirtirhai chun, "Tuhaiin am bu an hung pek a ni ding aw?" tiin an indon tuo a.
34. Isun an kuomah, "A mi tirtu ditzawng thaw le a sin hlen hi ka bu a nih.
35. Nangni chun, 'Busikna ding thla li a la um' in ti hlak an naw? Ngai ro, ka hril cheu hi, dak suok unla, lohai thlir ro, buhai chu sik el theiin a hmin tah hi.
36. Bu siktu chun hlaw a hmu ta nghal a, chatuon hringna dingin a sik khawm mek a, a phuntu le a siktu chu an hlim tlang theina dingin.
37. Mi pakhatin a tu a, mi dangin a sik' ti thu hi a'n dik a nih.
38. In inrimpui ra ni lo sik dingin ka tir cheu hi, mi dangin an inrimpui a, an inrimna ra chu nangnin in sik a ni hi" a ta.
39. Nuhmeiin, "Ka thilthaw taphot a mi hril thei vong" a ti lei khan chu khuoa Samari mi tam tak chun an ring tah a.
40. Samari mihaiin Isu kuom an hung tlung chun an khuoa cham dingin an ngen a, ni hni zet a cham a.
41. A thu an hang hriet chun mi dang tam tak khomin an ring ta a.
42. Anni chun nuhmei kuomah, "Tuhin chu i thu mi hril leia ring kan ni naw a, keini ngeiin a thu hril kan ngaithlak a, ama hi khawvel Sandamtu ngei chu a nih ti kan hriet tah" an ta.
43. Ni hni hnungah chu taka inthok chun Galili ramah a fe a.
44. Isu ngeiin, 'Zawlnei chu ama ramah chawimawiin a um ngai nawh" a lo ti ta hrim a.
45. Galili ram a zuk tlung chun Galili mihai, Jerusalema kut hmanga hang fe ve haiin a thilthaw iengkim an hmu tah leiin, an lo lawm hle a.
46. Isu chun tui, uoiin a'n changtirna Galili rama Kana khuo chu a hung tlung nawk a. Kapernauma sorkar mi lien pakhath naupa chu damnaw a um a.
47. Judai rama inthokin Galili ramah Isu a hung kir nawk tah ti a hriet charin a hang fe a, Kapernaumah hung thla a, a naupa thi vang vang chu sukdam dingin a ngen a.
48. Isun a kuomah, "Nangni rawi hin inchikna le thilmak thaw in hmu naw chun in ring naw top ding a lo ni hi tie!" a ta.
49. Chu pa chun, "Pu, ka naupa a thi hman hmain hung thla hram rawh" a ta.
50. Isun, "Kir ta rawh, i naupa chu a dam tah" a ta. Isu thu hril chu a ring a, a kir tah a.
51. A kir thlak chu lampuiah a siehlawhaiin an lo tuok a, "I naupa a dam tah" tiin an hril a.
52. Ama chun a hung dam hun lai chu a'n don a.
53. Anni chun, "Zani chawhnung dar khat velah a khawsik a re tah" an ta. Chu hun tak chu Isun "I naupa a dam tah" a ti lai kha a nih ti a pa chun a hriet suok a, chuongchun ama le a sungkuoin Isu an ring tah a.
54. Chu chu Judai rama inthoka Galili rama Isu a kir nawk hnunga inchikna thilmak a thaw voi hnina a nih.
←  John (4/21)  →