←  John (21/21)    
1. Chu hnung chun Isu chu Tiberi dilahx a zirtirhai lai a'n lar nawk a, hieng ang hin a'n lar a.
2. Simon Peter hai, Thoma, Phira an ti bok hai, Galili ram Kana khuoa mi Nathanael hai, Zebedai nauhai pahni le zirtir dang pahni an um khawm a.
3. Simon Peter chun an kuomah, " Nga manin ka fe ding a nih" a ta. Anni chun, "Keini khom hung veng kan tih" an ta. Chuongchun, an inthok suok a, longah an chuong a, sienkhom chu zan chun an man der nawh.
4. A zing vartien chun Isu chu va kamah a ngir a, sienkhom Isu a nih ti zirtirhai chun an hriet nawh.
5. Ama chun, "Ruolhai, in man am?" a ta. Anni chun, "Kan man der nawh" an ta.
6. Isu chun, "Long sir chang tieng khan deng unla, man in tih" a ta. Chuongchun an hang deng a, nga an inkhum rawn leiin an hnuk suok zo tah naw a.
7. Isun a hmangai zirtir khan Peter kuomah, "Lalpa a ni saw" a ta. Simon Peterin Lalpa a nih ti a hril a hriet charin, saruoka um a ni leiin zakuo a hak sok sok a, dila chun a'n chawm thla a.
8. Zirtir danghai ruok chu longa chuongin, len sip pur nga chu hnukin va kam an hung panpui a, khawmuola inthoka hnai te, tong zahni vel chauha hlaa um an nih.
9. Khawmuol an kai chun meihola mei insem, a chunga nga le beiphek um chu an hmu a.
10. Isun an kuomah, "Tuhin in nga man kha a then hung la ro le" a ta.
11. Simon Peter chu longah a va fe a, len chu va kamah an hnuk suok a, nga lien tak tak za le sawmnga pathum zet inhnaw bit hai sienkhom len chu a'n ek der nawh.
12. Isun an kuomah, "Zingbu hung fa ta ro" a ta. Zirtirhai laia tu khomin "Tu am i na?" ti an indon ngam nawh, Lalpa a nih ti an hriet si a.
13. Isu chu a hung a, bei chu a lak a, a pek tawl a, chuong ang bokin nga khom a pek tawl a.
14. Mithi laia inthoka a tho nawk hnunga Isu a'n lar voi thumna a nih.
15. Zingbu an fak khop chun Isun Simon Peter kuomah, "Simon, Johan naupa, hienghai nek hin nangin kei i mi hmangai lem am? a ta. Ama chun, "Aw Lalpa, ka ngaina che ti i hriet" a ta. Isun a kuomah, "Ka beramhai chawm rawh" a ta.
16. A voi hninaa chun Isun a kuomah, "Simon, Johan naupa, nangin i mi hmangai tak zet am?" a ti nawk a. Ama chun, "Aw Lalpa, ka ngaina che ti i hriet" a ti nawk a. Isun, "Ka beramtehai chawm rawh" a ta.
17. A voi thumnaa chun, "Simon, Johan naupa, nangin kei i mi ngaina am?" a ta. A voi thumnaah, "Nangin kei i mi ngaina am?" a ti lei chun Peter lungril a na hle a, "Lalpa, iengkim i hriet a, ka ngaina che ti i hriet annawm" a ta. Isun a kuomah, "Ka beramhai chawm rawh.
18. Thu dik tak ka hril che hi, i naupang lai chun i kawng i khit a, i nuomna tieng tieng i fe hlak a; i hung upat hnung chun i kut phar i ta, mi dangin i kawng hrenpek an ti che a, i nuom nawna tieng tieng thuoi an ti che" a ta.
19. Ieng ang thina am tuokin Pathien a la chawimawi ding ti kawk hmuna dingin chuong thu chu a hril a nih. Chu chu a hril zoin, "Mi zui rawh" a ta.
20. Peter chu a hang ngha kir a, Isun zirtir a hmangai, zanbu fak laia a awm hnenga hung thle a, "A'n mantirtu ding che chu tu tak am ning a ta?" titu khan a hung zui a hmu a.
21. Peterin a hmu chun Isu kuomah, "Lalpa, ama saw teh?" tiin a'n don a.
22. Isun a kuomah, "Ka hung nawk chena um dingin ka dit khom ni sien, chu chu nangma ta dingin iem a tangkai a? Mi zui el rawh" a ta.
23. Chuonga a ti lei chun chu zirtir chu thi lo dingin a unauhai lai a'n thang vel a. Amiruokchu, a thi naw ding thu Isun ieng khom a kuomah a hril naw a, "Ka hung nawk chena um dingin ka dit khom ni sien, chu chu nanga dingin iem a tangkai a?" a ti a ni lem chauh.
24. Chu zirtir chu hieng thu hretu le ziektu hi a na, a thu inhriettir hi a'n dik a nih ti ei hriet.
25. Hieng naw khom hi thil dang tam tak Isun a thaw a. A kip a kawiin ziek vong ding ni inla, chu lekhabu chu khawvel khom hin a keng ka ring nawh.
←  John (21/21)