←  John (20/21)  →
1. Chawlkar ni hmasa takahv,khuo a la'n thim laiin Mari Magdalin chu thlanah a fe a, thlan lungkhar chu lak sonin a hmu a.
2. Chuongchun, Simon Peter le zirtir dang, Isun a hmangai kuom tieng chun tlanin, "Thlana inthokin Lalpa an lak hmang a, khaw lam an sie kan hriet nawh" tiin a va hril a.
3. Chuongchun, Peter le zirtir dang chu thlan tieng panin an suok a.
4. An pahni chun an tlan a, zirtir dang chu Peter nekin a tlan hrat lem leiin thlan a tlung hmasa a.
5. Kunin a zuk bi a, puon zai inhmi chu a hmu a, a sunga ruok chu a lut nawh.
6. A hnunga hung Simon Peter khom chu a hung tlung ve a, thlan sungah a zu lut a, tuonga puon zai inhmi chu a hmu a,
7. a lu tuomna, inhrukna puon khom chu inziel a, puon zai inhmi lai um loa a hrana um chu a hmu bok a.
8. Zirtir dang, thlan tlung hmasa khom chu a lut ve a, a hmu a, a ring a.
9. Mithi laia inthokin a tho nawk ding a nih ti Pathien Lekha thu kha an la hriet thiem phak hri si nawh.
10. Chuongchun, zirtirhai chu mani in sengah an kir nawk tah a.
11. Mari ruok chu thlan puo tieng tap pumin a ngir zing a, mitthli sur hnuoiah a kun a, thlan sung a zuk bi a.
12. Isu ruong zalna, a lu le ke bul ve vea chun thuom var inbel vantirko pahnih thung a hmu a.
13. Anni chun, " Nuhmei, ieng dinga i tap am? an ta. Ama chun, "Ka Lalpa an lak hmang a, an siena chin hrim ka hriet naw lei a nih" a ta.
14. A hril zo chun a hang ngha kir a, Isu ngir chu a hmu a, Isu a nih ti ruok chu a hriet nawh.
15. Ama chun, "Nuhmei, iem a ta i tap? Tum i zong a?" a ta. Mari chun huon enkoltu amanih a sawn a, a kuomah, "Pu, ama hi i lak hmang a ni chun i siena hmun mi hril ta la; chuongchun ka lak ding annawm" a ta.
16. Isun, "Mari" a hei ta. Ama tieng chu a hung ngha a, Aramik tongin, "Rabboni" tiin a khek suok ta phong a (Rabboni chu Zirtirtu tina a nih).
17. Isun, "Mi chel naw rawh, P� kuom tieng ka la kir hri naw hi. Amiruokchu, i unauhai kuomah fe la, an kuomah, 'Ka P�, in Pa, ka Pathien, in Pathien kuomah ka kir ta ding a nih' a tih ti va hril rawh" a ta.
18. Mari Magdalin chu zirtirhai kuomah a fe a, Lalpa a hmu thu le a kuoma a hrilhai chu a hril tawl a.
19. Chu ni, Pathienni zan tieng, Judahai an ti leia zirtirhaiin an umna in kotkhar an khar hnung chun an kuomah Isu a hung a, anni lai a hung ngir a, "Thlamuongna in chungah um raw se"w a ta.
20. A hril zo chun a kut le a nak a'n entir a, Lalpa an hmu chun a zirtirhai chu an lawm hle a.
21. An kuomah, "Thlamuongna in chungah um raw se. Pain a mi tir ang bokin kei khomin ka tir cheu hi" a ta.
22. Chu zoah anni chu a'n thuok khum a, "Thlarau Thienghlim nei ro.
23. Tu suol khom in ngaidam chun ngaidam ning a ta, in ngaidam naw chun ngaidam ni naw nih" a ta.
24. Sawmpahnihai laia pakhat Thoma Didum (Phira an ti chu), Isu a hung laiin anni lai a um ve naw a.
25. Zirtir danghai chun a kuomah, "Lalpa chu kan hmu tah" an ta. Ama chun, "A kut thirkila an kil dena ser hmu a, kutparin a hliemna ser ngei tawk a, a nak ka them ngei naw chun ka awi thei nawh" a ta.
26. Ni riet hnunga chun a zirtirhai chu in sungah an um khawm nawk a, Thoma khom a thang ve ta a. Kotkharhai chu khar vong ni sienkhom Isu a hung a, anni lai a hung ngir a, "Thlamuongna in chungah um raw se" a ta.
27. Thoma kuoma chun, "I kutpar khan mi hang them vel la, ka kuthai hi en rawh, i kutin hang ban la, ka nak them rawh; ringhla loin awi el rawh" a ta.
28. Thoma chun a kuomah, "Ka Lalpa le ka Pathien" a ta.
29. Isun a kuomah, "Nangin kei i mi hmu leiin i ring a; hmu bok si loa ringhai chu an hamtha" a ta.
30. Zirtirhai hmuah inchikna thilmak dang tamtak Isun a thaw a, chuonghai chu hi lekhabua hin ziek sa a ni nawh.
31. Hieng zieka umhai hi, Isu chu Krista, Pathien Naupa a nih ti in ringna ding le in ring leia ama hminga hringna in neina dinga ziek a nih.
←  John (20/21)  →