← John (19/21) → |
1. | Chun, Pilatin Isu chu a thuoi a, a'n vuoktir a. |
2. | Sipaihai chun lukhum dingin hling an inkuol a, an inkhumtir a, korfuol senduk an inhaktir bok a, |
3. | Inzur zuta panin "Chibai, Judahai lal!" tiin a hmaiah an ben a. |
4. | Pilat chu tuolah a va suok nawk a, an kuomah, " En ta u, a chungah thu poi ieng khom ka hmu nawh ti hrietna dingin in kuomah ka hung thuoi suok a ni hi" a ta. |
5. | Hling lukhum khum le korfuol senduk haka Isu a hung suok chun Pilatin, "En ta u, hi pa hi a ni hih" a ta. |
6. | Thiempu lalhai le an thuoihruoihaiin an hmu chun, "Kraws-ah hemde rawh, kraws-ah hemde rawh" tiin an khek a. Pilat chun, "Nangnin thuoi unla, kraws-ah hemde ro chu, kei chun a chungah thil poi ka hmu nawh" a ta. |
7. | Judahai chun, "Dan kan nei a, chu dan ang chun a thi ding a nih, Pathien Naupaa a'n sal leiin" an ta. |
8. | Pilatin chu thu a hriet chun a ti zuol a. |
9. | Insungah a lut nawk a, Isu kuomah, "Khaw laia inthoka hung che?" tiin a'n don a, sienkhom Isun a don nawh. |
10. | Pilat bokin, "I mi don nuom naw vei a ni maw? Insuo thei che ka na, kraws-a hemde thei che ka ni bok ti i hriet naw maw? a ta. |
11. | Isun a don a, "Chung tienga inthoka pek i ni naw chun ka chungah ieng khom thaw thei nei naw ti nih. Chuleiin, i kuta kei mi hung pe suoktu khan suol a phur nasa lem a nih" a ta. |
12. | Chu taka inthok chun Pilatin ama chu insuo dan kong a zong a, sienkhom Judahai chun, "Hi pa hi i'n suo vai chun Kaisar ruolpa ni naw ti nih. Tu khom lala insiem chu Kaisar khingtu a nih" tiin an khek a. |
13. | Chuong thu chu Pilatin a hrietin Isu chu a hung thuoi suok a. Lungrem (Aramik tonga Gabbatha an ti) a chun a rorelna thungphaah a thung a. |
14. | Fekan Kut urlawk ni sun chang vel lai a na, Judahai kuoma chun, "En ta u, in lal hi" a ta. |
15. | Anni chun, "Sukbohmang rawh, sukbohmang rawh, kraws-ah hemde rawh" tiin an khek a. Pilat chun, "In lal hi hemdeng ka ti maw?" a ta. Thiempu lalhai chun, "Kaisar naw chu lal dang kan nei nawh" tiin an don a. |
16. | Chuongchun, hemde dingin an kuomah Pilatin a pek suok a, Isu chu sipaihaiin an thuoi tah a. |
17. | Mani kraws putin, 'Luru Hmun', Aramik tonga 'Golgotha' an ti chu panin a suok a. |
18. | Chu taka chun an hemde a, mi pahni dang leh, a sir tuokah pakhat ve ve, a laiah Isu. |
19. | Pilatin tar dinga a ziek, 'NAZARET ISU, JUDAHAI LAL' ti chu kraws lera chun an tar a. |
20. | Thil tar chu Aramik, Latin le Grik tongin an ziek a, an hemdena hmun chu khawpui bul a ni leiin Juda mi tam takin an tiem a, |
21. | Judahai thiempu lalhai chun Pilat kuomah, "Judahai lal' tiin ziek naw rawh. 'Judahai lal ka nih a tih' tiin ziek lem rawh" an ta. |
22. | Pilat chun, "Ka ziek kha ka ziek zo tah" a ta. |
23. | Kraws-a Isu an hemde chun sipaihaiin a silfen an hlip a, sipai pakhatin chan khat senga an chang theina dingin chan liin an insem a. A korfuol an lak bok a, chu chu thui lo zakuo, a ringa inthoka a hmawr chena pum khawng a nih. |
24. | Anni chun, "Hi chu pot thler loin, a changtu ding enna dingin thum vawr ei tiu" an ta. Pathien thua Ka silfenhai an insem a,Ka zakuo dingin thum an vawrti kha a hung tlungna dingin a nih. Chu chu a nih sipaihaiin an thaw chu. |
25. | Isu kraws bula chun a nu le a nu zuorpuinu dam, Klopa nuhmei Mari dam, Mari Magdalin hai dam chu an ngir a. |
26. | Isun a nu le a bula ngir zirtir a hmangai chu a hmuin a nu kuomah, "Nu, en ta, i naupa kha" a ta; |
27. | zirtir kuoma khom chun, "En ta, i nu kha" a ti bok a. Chu taka inthok chun chu zirtir chun ama inah a thuoi tah a. |
28. | Thil po po a tlung kim tah ti Isun a hriet chun Pathien Lekha thu a tlung kimna dingin, "Ka dang a char" a ta. |
29. | Bel, uoiin thura sip a um a, chu taka chun sipon an inchie a, hmol lerah an tar a, a hmur leh an hang chuktuo a. |
30. | Uoiin thur an pek zo chun, Isun "A kin tah"u a ta, a lu a kun a, a thlarau an thla tah a. |
31. | Judahai Sabat urlawk ni a na, a zing chu Sabat an hmang ursun ni ding a nih. Sabat laia ruong kraws-a a um zing nawna dingin, an mi hemdehai ke chu vaw tliek a, an ruong lak phalna Pilat kuomah an hni a. |
32. | Chuongchun, sipaihai chu an hung a, Isu ruola an hemde pakhat ke chu an hang vuok tliek phot a, pakhat dang ke khom chu an vuok tliek nawk a. |
33. | Isu bul an tlung chun a thi tah ti an hriet a, a ke chu an vuok tliek ve nawh. |
34. | Amiruokchu, sipai laia pakhat chun a nakah feiin a sun a, thisen le tui a hung inbaw ta huk a. |
35. | Hi hi mit ngeia hmutu hril a na, a hril chu a'n dik a nih. Thu dik a hril ti a hriet a, nangni khoma in ring theina dingin a hril a nih. |
36. | Pathien Lekha thua "A ru pakhat khom suktliek ni naw nih" ti kha a hung tlung kimna dinga hieng thil hi a hung tlung a nih. |
37. | Pathien Lekhabu danga chun "An sunpa ngei chu la en an tih" a ti bok. |
38. | Chu hnung chun Arimathai khuoa mi Josefa, Judahai a ti leia a ruka Isu zuitu chun Isu ruong inhlawm phalna chu Pilat a hni a, a lo phalpek a, a ruong chu a lak a. |
39. | Nikodem, kha hmaa zana Isu hung pantu khom kha rimtui murra le aloi chokpol, kilogram sawmthum le pali lai chawiin a hung ve a. |
40. | An pahni chun Isu ruong chu an lak a, Judahai inphum dan angin a ruong chu rimtui leh puon zai inhmiin an zem a. |
41. | An hemdena hmuna hin huon a um a, chu taka chun tu khom la zal ngai nawna thlan thar a um a. |
42. | Judahai Sabat Urlawk ni a ni lei le thlan chu a bul ela um a ni leiin, chu taka chun Isu chu an inzal tah a. |
← John (19/21) → |