←  John (18/21)  →
1. Chuong thu chu Isun a hril zoin a zirtirhai leh an suok a, Kidron vadung an kan a, va rala oliv huona chun a zirtirhai leh an lut a.
2. Chu hmuna chun a zirtirhai leh Isu a leng rop hlak leiin a'n mantirtu ding Juda khomin chu hmun chu a hriet a.
3. Chuongchun, sipai hon khat le thiempu lalhai le Farisaihai tir tempul vengtuhai chu Juda chun a hung thuoi a, khawnvar dam, meiser dam le hriemhrei dam an chawi a.
4. A chunga thil hung tlung ding po po chu Isun a hriet vong a; a va suok a, "Tu am in zong?" a ta.
5. Anni chun, "Nazaret Isu" an ta.
6. Isun, "Keima hi ka nih" a ta. An mantirtu Juda khom chu anni lai a ngir a. "Keima hi ka nih" a ti charin hnung tieng an intawl a, hnuoiah an tlu phung a.
7. "Tu am in zong?" tiin a'n don nawk a, "Nazaret Isu" an ta.
8. "Kei ka ni thu ka hril ta cheu kha. Kei mi zong in ni chun mi dang po hi chu lo inkieng raw hai se" a ta.
9. A hmaa "Nangin i mi pekhai kha pakhat khom ka'n hmang nawh" a ti kha a hung tlung kim theina dingin hi thu hi a hril a nih.
10. Simon Peter chun a kawlhnam pai chu a phawi a, Thiempu laltak siehlaw chu a sat a, a nakawr chang tieng a fik thlak a (Siehlaw hming chu Malka a nih).
11. Isu chun Peter kuomah, "I kawlhnam kha a paiah thun rawh. Pain dawn dinga no a mi pek chu ka dawn naw ding maw?" a ta.
12. Chuongchun, sipai ruol le an hotu le tempul vengtu Judahai chun Isu chu an man a, an khuop a,
13. Anna kuomah an thuoi hmasa phot a. Anna chu chu kuma thiempu laltak Kaiafa tarpu a nih.
14. Kaiafa hi a nih, "Mipui aia mi pakhat thi a tha lem" tia thurawn Judahai kuoma petu kha.
15. Simon Peter le zirtir dang pakhatin Isu chu an zui a. Chu zirtir chu Thiempu laltak hmelhriet a na, thiempu laltak tuol zawla chun Isu leh a ruolin a lut ve a.
16. Peter ruok chun tuolah a lo nghak a. Thiempu hmelhriet, zirtir kha a hung kir nawk a, kotkhar vengtu nunghak chu a biek a, Peter chu a thuoi lut a.
17. Kotkhar vengtu nunghak chun Peter kuomah, "Nang khom hi pa zirtir laia mi i ni ve an naw maw?" a ta. Ama chun, "Ni lo e!" a ta.
18. Siehlawhai le sipaihai chu chu taka chun an ngir a, a dei leiin mei an sem a, an awi a, anni lai ngir vein Peter khomin mei lum chu a awi ve a.
19. Thiempu laltak chun Isu chu a zirtirhai chanchin le a thu zirtir chungchang thu chik takin a'n don a.
20. Isun, "A'n langin vantlang hmaah thu ka hril hlak. Sunagoga hai, tempula hai le Judahai pung khawmnaa hai ka zirtir rop hlak a, a rukin ieng khom ka hril ngai nawh.
21. Ieng leia kei i mi'n don? Ka thu hril ngaithlatuhai kuomah ieng am ka hril indon lem ta la, iem ka hril ti an hriet annawm" a ta.
22. A hril zo chun vengtu sipai ngirhai laia pakhat chun, "Thiempu laltak chuongchun i don let ngam maw!" tiin Isu hmai a ben a.
23. Isun a kuomah, "Thu indik lo ka hril a ni chun hril suok la, ka hril si naw chun ieng dinga i mi ben am?" a ta.
24. Anna chun Isu chu khuop pumin Thiempu laltak Kaiafa kuoma chun a'n thuoitir a.
25. Ngir puma Peterin mei a awi ve lai chun, "Nang khom a zirtirhai laia thang ve i ni maw?" an ta. Peter chun, "Ni lo e" tiin a'n phat a.
26. Thiempu laltak siehlawhai laia pakhat, Peterin a nakawr a satthlak laibungpa chun, "Huona khan a kuomah ka hmu che an naw maw?" a ta.
27. Peter chun a'n phat nawk a, chu lai tak chun ar a hung khuong ta nghal a.
28. Kaiafa ina inthok chun Isu chu Roman larsap in Praitorianaht an thuoi a. Zingkar inhma tak a la ni a, Judahai chun inthieng nawna kai loa Fekan Kut ruoi kil thei an nuom leiin lal in sunga chun an lut nawh.
29. Chuongchun, Pilat chu a va suok a, "Hi mi hin ieng am a suksuol leia in hek a na?" tiin a'n don a.
30. Anni chun, "Hi mi hin thil suol thaw naw sien i kuomah hung thuoi naw ning ungah" an ta.
31. Pilat chun, "Nangnin thuoi unla, in dan angin a chungthu rel ro" a ta. Judahai chun, "Keini chun mi sukhlum theina thu kan nei nawh" an ta.
32. Chu chu ieng anga thi ding am a na ti Isun a lo hril kha a hung tlungna dingin a nih.
33. Chuongchun, Pilat chu in sungah a lut nawk a, Isu a koa, "Judahai lal i ni maw?" tiin a'n don a.
34. Isun, "Chu chu nanga lungril puok suoka i hril a ni, annawleh mi dangin ka chungchang an hril lei chea i mi'n don?" a ta.
35. Pilat chun, "Juda mi i mi sawn ve a ni? I chipuihai le thiempu lalhaiin ka kutah an hung pek lut che a ni hi. Ieng poi am i thaw hrim leh?" a ta.
36. Isun a don a, "Ka ram chu hi khawvela mi hi a ni nawh; ni sien chu Judahai kuta inmantira ka um nawna dingin a mi zuituhaiin bei an tih, nisienlakhom ka ram chu hi taka mi hi a ni si nawh" a ta.
37. Pilat chun, "Chu, lal i ni chu tie maw?" a ta. Isun, "Lal ka ni thu i hril indik ngot el. Thutak inhriettir hi ka pieng san le khawvela ka hung san a ni hrim a nih. Tu khom thutaka um chun ka thu an ngaithlak hlak" a ta.
38. Pilat chun, " Thutak chu iem a na?" a ta.Chu chu a hril zoin Judahai kuomah a va suok nawk a, "A chungah thu poi ieng khom ka hmu nawh.
39. Amiruokchu, in thaw dan pangngaiin, Fekan Kutah tang pakhat ka'n suopek ding cheu a na, Judahai lal hi insuopek lang cheu in nuom am?" a ta.
40. Anni chun inring taka kh�kin, "Hi pa hi ni loin Baraba kha ni lem raw se" an ta. Baraba chu suomhmang a nih.
←  John (18/21)  →