←  John (14/21)  →
1. "In lungril lungzing naw raw se. Pathien ring unla, kei khom mi ring ro.
2. Ka Pa inah chengna hmun tam tak a um. Chuong chu ni naw sien, ka hril ta ding cheu an nawm. Chu taka chun in ta dinga hmun buotsai dingin ka fe ding a nih
3. In ta dinga hmun buotsaia ka fe chu hung kir nawk ka ta, ka kuomah thuoi ka ti cheu, ka chengnaah in cheng ve theina dingin.
4. Ka fena ding lampui khom in hriet" a ta.
5. Thoman a kuomah, "Lalpa, i fena ding chin kan hriet naw a, iengtin am a lampui lem chu hrieng kan ta?" a ta.
6. Isun a don a, "Kei hi lampui le thutak le hringna chu ka nih; keimaa fe naw chu tu khom Pa kuom an tlung ngai nawh.
7. Kei mi hrie ni unla chu ka Pa khom hrieng in tih. Tuhin chu in hriet tah a, ama khom in hmu ta bok" a ta.
8. Filip chun, "Lalpa, Pa chu mi'n hmutir la, kan ta dingin a hun" a ta.
9. Isun a don a, "Filip, hi chen rauh hi in kuomah ka um tah a, chuong sa khom chun tu'm ka nih ti i la hriet naw rop a ni maw? Tu khom a mi hmu chu Pa hmu a nih. Ieng leia 'Pa chu mi'n hmutir rawh' i la ti rop?
10. Kei Paah ka um a, Pa keimaah a um ti hi in ring naw a ni? In kuoma thu ka hrilhai hi keima phuokfawm a ni nawh. Keimaa um zing Pa chun ama sin a thaw a ni lem.
11. Kei Paah ka um a, Pa keimaah a um ka ti hi ring ro; annawleh ka thilthaw lei bek hin mi ring ro.
12. Thu dik tak ka hril cheu hi, tu khom a mi ring chun thil ka thawhai hi ama khomin thaw veng a tih, hieng neka thil ropui lem khom hi la thawng a tih, Pa kuoma fe ding ka ni leiin.
13. Ka hminga in hni taphot chu thaw pei ka tih, Pa chu Naupa leia chawimawia a um theina dingin.
14. Ka hminga inhni taphot chu thaw pei ka tih.
15. "In mi hmangai chun ka thupek zawm in tih.
16. Chun, keiin Pa hning ka ta, ama chun Thlamuongtu dang, kumkhuoa umpuitu ding peng a ti cheu.
17. Chu chu Thlarau indik tak, khawvelin a hmu thei naw le hriet thei naw leia a chang thei naw chu a nih. Nangni ruok chun ama chu in hriet a, in kuomah a cheng a, nangniah hring zing a tih.
18. Fahrain maksan naw ning cheu, in kuomah hung nawk ka tih.
19. Sawt naw te hnungah khawvelin mi hmu nawk ta naw nih. Nangni ruok chun mi hmung in ta, kei ka hring leiin nangni khom hring veng in tih.
20. Chu huna chun kei Paa ka um dam, nangni keimaah in um dam, kei nangniah ka um dam la hrieng in tih.
21. Tu khom ka thupek poma zawmtu chu mi hmangaitu a nih; mi hmangaitu chu ka Pain hmangai a ta, kei khomin hmangai ka ta, a kuomah inlar bok kan tih" a ta.
22. Juda, Iskariot an ti naw lem chun a kuomah, "Lalpa, kan kuomah inlar a, khawvel kuomah i'n lar si naw ding chu iengti lei am a na?" tiin a'n don a.
23. Isun a don a, "Mi'n a mi hmangai chun ka thu zawm a tih, ka Pain ama chu hmangai a ta, a kuomah hung kan ta, a kuomah um zing kan tih.
24. A mi hmangai nawtu chun ka thu a zawm nawh. Thu in hriet hi keima thu a ni nawh, mi tirtu Pa thu a ni lem.
25. In kuoma ka la um sung hin hieng thu hi ka hril cheu a nih.
26. Thlamuongtu Thlarau Thienghlim, ka hminga Pain a hung tir ding chun iengkim zirtir a ti cheu a, in kuoma ka hril ta po po hai kha inhriet suoktir nawk a ti cheu.
27. Thlamuongna ka maksanpek cheu, keima thlamuongna ka pek cheu, khawvelin a pek ang ni lo ka pek cheu hi. In lungril lungzing naw raw se; ti khom ti bok naw raw se.
28. Ka fe hmang ding a na, in kuomah hung kir nawk ka tih ka ti kha in hriet. In mi hmangai chun Pa kuoma ka fe ding hi lawm in tih: Pa chu keia nekin a ropui lem si a.
29. Chu chu a hung tlung pha in ring theina dingin, tuhin a hung tlung hmain ka hril cheu a nih.
30. In kuomah thu hril tam ta naw ning, hi khawvel lal hi a hung ding a ni leiin. Thu ruok chu ka chungah ieng khom a nei nawh.
31. Nisienlakhom, keiin Pa ka hmangai a, Pain thu a mi pek ang peiin thil ka thaw lem hlak ti khawvelin an hriet theina ding a nih. Thaw ro, hi taka inthok hin suok ei tiu.
←  John (14/21)  →