←  John (13/21)  →
1. Fekan Kut a tlung tep ta a, Isun hi khawvel suoksana Pa kuoma a kir hun a tlung tah ti a hriet a. Khawvela um, ama mihai chu a hmangai rop hlak a, chu chu a tawp chenin a'n langtir a.
2. Zanbu an kil mek lai chun diebolin Simon naupa Juda Iskariot lungrilah Isu a'n mantir dan ding a lo inphantir der tah a.
3. Pain a kutah thil iengkim a'n koltirzie le Pathien kuoma inthoka hung a na, Pathien kuoma bok a kir nawk ding a nih ti chu Isun a hriet a.
4. Bu an fak lai chun a tho a, a korfuol a hlip a, inhrukna puon a kawngah a vet a.
5. Maihunah tui a sung zo chun a zirtirhai ke a sawp tan a, a kawnga inhrukna puon a vet chun a hruk hul a.
6. Simon Peter kuom a hung tlung chun Peterin, "Lalpa, nang em chun ka ke i sawp dim a ni?" a ta.
7. Isun a kuomah, "Ka thilthaw hi tu hin i hriet nawh, sienkhom nakie chu la hung hrieng i tih" a ta.
8. Peter chun, "Nang meu chun ka ke sawp lul lo e" a ta. Isun, "Ka sawppek naw che chun keima le nangin ieng khom intawm thei naw mei nih" a ta.
9. Simon Peter chun, "Chuong an leh, ka ke chauh sawp loin ka kut le ka lu khom tie!" a ta.
10. Isun a kuomah, "Insil ta hnung chu ke naw chu sawp a ngai nawh, a fai vong annawm; nangni in fai, in reng ruok chun ni loin" a ta.
11. Ama inmantirtu ding chu Isun a hriet a, chuleiin "In reng chun in fai nawh" a ti a nih.
12. An ke a sawp zo chun a kawrfuol a hak a, a thungnaah a hung inthung nawk a, "In chunga ka thilthaw hi a umzie in hriet am?
13. Nangni chun Zirtirtu le Lalpa tiin in mi ko a, in ti dik hle, ka ni ngei hrim a.
14. Kei Lalpa le Zirtirtu hmanin in ke ka sawp chun, nangni khomin ke in insawppek ding a nih.
15. In chunga ka thaw anga nangni khoma in thaw vena dingin enton ding ka siempek cheu a ni hi.
16. Thu dik tak ka hril cheu hi, bawi chu a pu nekin a ropui nawh, tirko khom a tirtu nekin a ropui bok nawh.
17. Chuong thil chu hre a, thaw ve nachang in hriet chun lawm in tih. In renga thu ka hril nawh; ka thlanghai chu ka hriet.
18. Amiruokchu,Ka bei fatuin a kekhong,qKa chungah a'n let tahti Pathien lekha thu kha a hung tlung kim theina dingin a nih.
19. Hieng thil hi a hung tlung hmain ka hril cheu a ni hi, a hung tlung pha leh Keima chu ka nih ti in ring theina dingin.
20. Thu dik tak ka hril cheu hi, tu khom ka mi tir lo lawmtu chun a mi pom a nih; tu khom kei mi lawmtu chun a mi tirtu khom a pom a nih" a ta.
21. Isun chuong thuhai a hril zo chun namen loin a lungzing a, "Thudik ka hril cheu hi, nangni laia mi pakhatin mi'n mantir a tih" a ta.
22. Tu tak am a ti bik an hriet naw leiin an inen thap a.
23. Zirtir laia pakhat, Isun a hmangai chu a awm hneng deuthawin a'n thung a.
24. Simon Peter chun, "Tu'm a na a kawk bik indon rawh" tiin mitin a hei hril a.
25. Ama chu Isu awm sikin a thle phei a, "Lalpa, a tu hi'm ie?" a ta.
26. Isun a don a, "Thlenga bei hlek ka'n chie, ka pek chu ning a tih" a ta. Chuongchun, bei hlek chu a'n chie a, Simon naupa Juda Iskariot chu a pek a.
27. Bei hlek a pek hnungin a sungah Setan a lut nghal a. Isun a kuomah, "I thaw ding chu thaw vat rawh" a ta.
28. Dawkan kila thunghai lai tu khomin chu chu ieng leia a kuoma a hril am a na ti an hriet nawh.
29. Juda chu tangka ip koltu a ni leiin kut sunga thil mamaw inchaw ding amanih, annawleh retheihai kuoma thil pe dinga Isun a hrilna ni dingin thenkhat chun an ngai a.
30. Juda chun bei hlek chu a lak a, a suok ta nghal a, zan a ni ta hrim a.
31. A suok hnung chun Isun, "Tuhin chu Mihriem Naupa chawimawiin a um tah a, amaah Pathien khom chawimawiin a um tah.
32. Amaah Pathien chawimawia a um chun Pathienin ama khom chawimawi a ta, chawimawi nghal a tih.r
33. Nauhai, sawt naw te in kuomah la um ka tih. Nangnin mi zong in ta, Judahai kuoma ka hril tah ang khan, ka fena dinga chun in hung ve thei nawh ti tuhin ka hril cheu a nih.
34. Thupek thar ka pek cheu; inhmangai tuo ro; keiin ka hmangai ang cheuin nangni khom inhmangai tuo ro
35. In inhmangai tuo chun mi po poin ka zirtirhai in nih ti chu taka inthok chun hrieng an tih" a ta.
36. Simon Peterin a kuomah, "Lalpa, khaw lai am i fe ding a na" a ta. Isun, "Tu hin chu ka fena dingah mi zui thei naw ti niu, nakie pha ruok chu mi la zui in tih" a ta.
37. Peterin, "Lalpa, ieng leiin am tu khom hin ka zui thei naw ding che? I ta ding chun thi ka'n huom annawm" a ta.
38. Isun a don a, "Ka ta dingin thi i'n huom chie maw? Thu dik ka hril che hi, nangin ar khuong hmain voi thum mi'n phat i tih!" a ta.
←  John (13/21)  →