←  John (11/21)  →
1. Mari le a zuorpuinu Martha hai khuo Bethania um mi pakhat, a hming Lazar chu a damnaw a.
2. Mari chu damnaw Lazar farnu a na, hriek rimtuia Lalpa chul a, a sama a ke hrutu kha a nih.
3. Chuongchun, a farnuhai chun Isu kuomah, "Lalpa, i hmangai kha a dam nawh" tiin thu an incha a.
4. Isun a lo hriet chun, "Hi natna hi thina ding a ni nawh, Pathien ropuina ding a ni lem. Hi lei hin Pathien Naupa hi chawimawiin a um ding a nih" a ta.
5. Martha le a a zuorpuinu le Lazar chu Isun a hmangai a,
6. sienkhom a damnaw ti a hriet hnung khomin a umna ngaiah ni hni zet a la cham a.
7. Chu hnung chun a zirtirhai kuomah, "Judai ramah fe nawk ei tiu" a ta.
8. Zirtirhai chun, "Zirtirtu, kha hma el khan Judahan lunga deng che an tum a, chuong sa khom chun i fe nawk ding maw?" an ta.
9. Isun a don a, "Sunah darkar sawmpahni a um naw am a ni? Sunah mi a leng chun, hi khawvel var hi hmanga a hmu fie thei leiin a'n sui ngai nawh.
10. Zanah a leng ruok chun, var a nei naw leiin a'n sui hlak" a ta.
11. Chuong thu a hril zo chun Isun, "Ei ruolpa Lazar kha a in tah a, sienkhom kei har dingin ka fe ding a nih" a ta.
12. A zirtirhai chun, "A in chun tha nawk el a tih" an ta.
13. A thi thu Isun a hrilna a nia chu a zirtirhai chun in pangngaia in a ni thu a hril an sawn a.
14. Chuongchun, Isun fie taka hrilin, "Lazar a thi a nih.
15. Nangni tieng ngaituona leiin, chu taka ka um naw chu ka lawm, in ring theina dingin. Sienkhom, a kuomah feng ei tiu" a ta.
16. Thoma, Didum (Phira) an ti bok chun zirtir danghai kawlah, "Ama leh thi ding khomin, fe veng ei tiu" a ta.
17. Isu a hang tlung chun Lazar chu ni li thlanah a lo zal tah ti a hriet a.
18. Bethani chu Jerusalema inthoka kilometer thum vela hla a nih.
19. Martha le Marin an tap� an sun lei chun khawsawt lengpui Juda mi tam tak an hung a.
20. Martha chun Isu a hung tlung ti a hriet charin a va tuok a, Mari ruok chun in a lo nghak a.
21. Martha chun Isu kuomah, "Lalpa, hi taka um ni la chu, ka tap� hi thi lo ding a na.
22. Tu khom hin Pathien kuoma i hni taphot chu peng a ti che ti ka hriet" a ta.
23. Isun a kuomah, "I tap� chu tho nawk a tih" a ta.
24. Martha chun, "Ni kin nia thonawknaa chun tho nawk a tih ti ka hriet" a ta.
25. Isun, "Kei hi thonawkna le hringna chu ka nih; tu khom a mi ring chu thi sienkhom hring zing a tih.
26. Tu khom chuong anga hring, mi ringtu taphot chu kumkhuoin thi naw nih. Chu chu i ring am?" a ta.
27. Martha chun, " Ring e, Lalpa, Krista Pathien Naupa, khawvela hung ding chu i nih ti ka ring" a ta.
28. Chu chu a hril zoin Martha chu a fe a, a zuorpuinu Mari chu a rukin a va ko a, "Zirtirtu hi taka hin a um a, a ko che" a ta.
29. Chu chu a hriet charin a tho vat a, Isu kuom tieng a pan ta nghal a.
30. Isu chun khuo la lut hman loin Marthain a va tuok laia a umna ngaiah a la um zing a.
31. Insunga khawsawt lengpui Judahaiin Mari a tho vat a, a suok an hmu phing leh, tap dinga thlan tienga fe an sawn a, an zui a.
32. Marin Isu umna a tlung a, ama a hmu charin a ke bulah a bokkhup a, "Lalpa, hi taka um ni la chu ka tap� hi a thi naw ding bah" a ta.
33. Mari tap le a hung zuitu Judahai tap Isun a hmuin lungril na takin a'n rum a,
34. "Khaw lam in phum a?" a ta. Anni chun, "Lalpa hung la, en rawh" an ta.
35. Isu a tap tah a.
36. Judahai chun, "En ta u, Lazar hi a lo va hmangai ngei de aw!" an ta.
37. Anni laia thenkhat chun, "Midel mit sukvartu hin hi pa khom hi an thi nawtir thei naw maw?" an ti bok a.
38. Isu chu hnuk ulh teu pumin thlan a tlung a. Chu thlan chu puk a na, a kot chu lungin an khar a.
39. Isun, "Lungkhar hi dom son ro" a ta. Lazar farnu Martha chun, " Lalpa tuhin chu thu tang a tih, a thina ni li a ni ta si a" a ta.
40. Isun a kuomah, "I ring chun Pathien ropuizie hmung i tih ka ti naw che am a ni?" a ta.
41. Chuongchun, lungkhar chu an dom son a, Isu chun van tieng nghain, "Pa, i mi ngaithlak leiin i chungah ka lawm.
42. I mi ngaithlak rop hlak ti ka hriet a, chu chu hi taka ngirhai hriet dinga ka hril a nih, nangin kei hi i mi tir a nih ti an ring theina dingin" a ta.
43. Chu chu a hril zoin rawl inring takin, "Lazar, hung suok rawh" a ta.
44. Mithi chu a kut le ke thlan puona inzem pumin a hung suok a, a hmai khom inhrukna puona tuom a nih. Isun an kuomah "A tuomna kha sut unla, infetir ro" a ta.
45. Mari lengpuitu, Isu thilthaw hmutu Judahai laia mi tam tak chun Isu an ring tah a.
46. Thenkhat ruok chu Farisaihai kuomah fein, Isu thilthaw chu an va hril a.
47. Thiempu lalhai le Farisaihai chun Sanhedrin inkhawm an ko a, "Hi mi hin inchikna thilmak tam tak a thaw ta si a, iengtin am ei thaw ta ding a na?
48. Hienga ei inthla zal chun mi po poin ama ring an ta, Roman sorkar hung inrol an ta, ei hmun thienghlim le ei hnam hi an hung suksiet vong ding a nih" an ta.
49. Anni laia pakhat, a hming Kaiafa, chu kuma thiempu laltak chun a hril ve a, "Thil ieng khom in hriet nawh.
50. Ei hnam pum ei chimit nawna dinga mipui aia mi pakhat a thi chu ei ta dingin a tha lem a nih ti in hriet phak teu nawh" a ta.
51. Chu chu ama lungril puok suoka a hril a ni nawh. Chu kum chun thiempu laltak a na, an hnam aia Isu thi ding a hril lawkna a ni lem.
52. An hnam ai chauh khom ni loin, khawvela indar tah Pathien nauhai chu thuoi khawm nawk a, pawl khata a'n din ding thu khom a hril a nih.
53. Chu nia inthok chun a sukhlum dan ding an phierruk ta a.
54. Chu chena inthok chun Isu chu Judahai lai a lengvak ta naw a, thlaler dep ram khaw pakhat Efraim an tia chun a fe a, chu khuoa chun a zirtirhai leh an inkulh ta zing a.
55. Judahai Fekan Kut a hnai tah a, thingtlanga inthokin mi tam tak Fekan Kut hmaa inthien dingin Jerusalemah an hang fe a.
56. Anni rawi chun Isu an zong a, tempul tuolzawlah ngir bumin, "Iengtin am i ngai ve? Kutah a hung naw top el ding maw?" tiin an indon tuo a.
57. Ama an man theina dingin tu khomin a umna an hriet chun thuneituhai kuoma ripawt dingin Thiempu lalhai le Farisaihai chun thupek an insuo ta si a.
←  John (11/21)  →