←  John (10/21)  →
1. "Thu dik tak ka hril cheu hi, tu khom beram huong kotkhara lut loa hmun danga inthoka lawn lut chu rukru le suomhmang a nih.
2. Tu khom kotkhara lut ruok chu berampu a nih.
3. Kotkhar vengtuin ama chu kot a lo hongpek a, a beramhaiin a rawl an hriet a, a beramhai chu an hmingin a ko seng a, a thuoi suok hlak.
4. A beram po po a khal suok vong pha leh an hma a thuoi a, a beramhai chun an zui hlak, a rawl an hriet leiin.
5. Mi dang chu zui naw ni hai, tlan hmangsan lem an tih, a rawl an hriet naw leiin" a ta.
6. Hi tekhinthu hi Isun an kuomah a hril a, sienkhom a umzie an hriet si nawh.
7. Chuleiin, an kuomah Isun a hril nawk a. "Thu dik tak ka hril cheu hi.
8. Kei hi beram kotkhar chu ka nih. Ka hmaa hunghai po po kha rukru le suomhmang vong an nih; sienkhom beramhaiin an rawl an ngaithlak nawh.
9. "Kei hi kotkhar chu ka nih; tu khom keimaa lut taphot chu him a ta, lutin suok a ta, tlatna hmun tha hmu bok a tih.
10. Rukru chu inru ding dam, sukhlum ding dam le sukse ding dam chauin a hung a; kei ruok chu hringna an neina ding le tam tak an neina dinga hung ka nih.
11. "Kei hi berampu tha ka nih; berampu tha chun beramhai ta dingin a hringna a pek hlak.
12. Inhlawfa, berampu tak ni lo, beram neitu ni bok lo chun satene hung a hmu pha beramhai chu a tlansan a, satenein beramhai chu a se a, a sukdar hlak.
13. Inhlawfa a ni leiin a beramhai a ngaisak naw a, a tlansan hlak.
14. Kei chu berampu tha ka nih; ka beramhai chu ka hriet a, ka beramhai khomin an mi hriet,
15. Pain a mi hriet ang le keiin Pa ka hriet ang hin; chun, an ta dingin ka hringna ka pek bok.
16. Hi beram huonga mi naw khom hi beram dang ka nei. Anni khom la hung thuoi ngei ka tih. Ka rawl ngaithlang an ta, vengtu pakhat hnuoiah beram ruol khat ni tang an tih.
17. Lak nawk dinga ka hringna ka pek ding a ni lei hin Pain a mi hmangai a nih.
18. Tu khomin mi lapek naw nih, keima nuom thuin ka pek lem ding a nih. Pe thei ka na, la nawk thei khom ka nih; hi thupek hi ka Pa kuoma inthoka ka hmu a nih" a ta.
19. Chuong thu lei chun Judahai lai inthena a suok nawk a.
20. Anni laia mi tam takin, "Ama hi ramhuoi zawl, mi invet letder a ni hi; ieng dinga a thu in ngaithlak?" an ta.
21. Thenkhatin, "Hieng ang thu hi ramhuoi zawl thu ni thei naw nih. Ramhuoiin mitdel mit a sukvar thei am a ni?" an ta.
22. Thlasik lai, Jerusalemah Hlanthar Kuto an hmang laiin,
23. Isu chu tempula Solomon Tuolpuka chun a'n vak vel a.
24. Judahai chun an hung bawr a, "Ieng chen am lungawpinkaiin i mi sie ding a na? Krista i ni chun chieng takin mi hril el rawh" an ta.
25. Isun a don a, " Ka hril ta cheu a, in awi si nawh. Ka Pa hminga thilmak ka thawhai khan ka chanchin a'n hriettir a nih.
26. Nisienlakhom, in awi si nawh, ka beram laia mi in ni naw leiin.
27. Ka beramhai chun ka rawl an hriet a, an mi zui hlak;
28. an kuomah chatuon hringna ka pek a, kumkhuoin thi naw ni hai; tu khomin ka kuta inthokin inchu thla thei bok naw ni hai.
29. Anni mi petu ka Pa chu iengkim neka ropui lem a nih; ka Pa kuta um chu tu khomin an lak hmang thei bok nawh.
30. Kei le Pa chu pum khat kan ni si a" a ta.
31. Judahai chun ama dengna dingin lung an rut nawk a.
32. Isun an kuomah, "Paa inthoka suok thilmak ropui tak tak ka'n entir cheu a, a ieng lei tak khan am mi deng in tum a na?" a ta.
33. Judahai chun, "I thilmak thaw leiin lungin deng che kan tum nawh. Pathien i hrilsiet a, nang mihriem ve el bok si, Pathiena i'n sal lei lem a nih" an ta.
34. Isun a don a, "In Dan lekhabuah "Pathienhai in nih, ka tih" ti ziek a ni nawm a ni?
35. Pathien thu tlungnahai hman Pathienhai ti an ni chun (Pathien lekha thu chu hnawl thei a ni si naw a),
36. Pathienin a ser hrang, 'Pathien Naupa ka nih' ka ti leiin, khawvela Pathien mi tir kei hin 'Pathien a hrilsiet' in ti maw?
37. Ka Pa sin ka thaw naw a ni chun mi ring naw ro;
38. ka thaw ruok chun kei mi ring naw unla khom, ka sinthaw bek chu ring ro; Pa chu Keimaah a um a, kei Paah ka um ti in hriet a, in chieng theina dingin" a ta.
39. Chuongchun, ama chu man an tum nawk a, sienkhom an man phak lo dingin a'n rel hmang a,
40. Jordan ral, Johanin kha hmaa baptisma a'n changtirna hmuna khan a fe a, chu taka chun a um ta zing a.
41. Mi tam tak a kuomah an hung a, "Johanin inchikna thilmak ieng khom a thaw nawh, amiruokchu Johanin hi pa chungchang a hril taphot kha a lo indik vong a ni hi" an ta.
42. Chu hmuna chun mi tam takin ama chu an ring tah a.
←  John (10/21)  →