John (1/21)  →
1. A tirin Thu chu a um, Thu chu Pathien kuomah a um, Thu chu Pathien a nih.
2. Ama chu a tira inthokin Pathien kuomah a um.
3. Iengkim ama hmangaa siem a nih; thilsiem po po hi ama hmanga siem naw hrim a um nawh.
4. Amaa chun hringna a um; chu hringna chu mihriemhai var a nih.
5. Var chu inthim lai a hung var a, sienkhom inthimin a ngam nawh.b
6. Pathien mi tir pakhat a um a, a hming chu Johan a nih.
7. Ama chu var thu inhriettir dingin a hung a, ama hmanga mi po poin an ring theina dingin.
8. Ama chu var chu a ni nawh, var thu inhriettir dinga hung a ni lem.
9. Var tak tak, mi tin sukvartu chu khawvelah a hung ta zing a nih.
10. Ama chu khawvela um tah le ama hmanga khawvel hung um ni sienkhom khawvelin ama chu a hriet si nawh.
11. Ama rama ngei a hung a, a mihaiin an lo lawm si nawh.
12. Nisienlakhom, ama lawmtu le a hming ringtu taphot chu Pathien nau ni theina a pek.
13. Chuonghai chu chi inthla dan pangngaia insieng ni loin, tisa ditzawng le pasal ditzawnga insieng khom ni bok loin, Pathiena inthoka insieng an ni lem.
14. Thu chu taksainc a hung inchang a, eini lai a hung cheng a, a ropuizie khom ei hmuh, lunginsietna le thutaka sip, Pa Naupa nei sun ropuina chu.
15. A chanchin chu Johanin khekpuiin, "Ka hnunga mi hung zuitu ding ka ti khan a mi lekhel tah a, ka hmaah a um ta zing a nih tia ka hril kha ama hi a nih" tiin a'n hriettir a.
16. A famkimnaa inthoka ei dong seng chu lunginsietna ngot lunginsietna ngot a nih.
17. Dan chu Mosie hmanga pek a na, lunginsietna le thutak ruok chu Isu Krista zara hung tlung a nih.
18. Tu khomin Pathien an hmu ngai nawh, Pa angsunga cheng Pathien Naupa nei sun chu a chanchin inhriettirtu a nih.
19. Ama chu tu am a nih ti indon dingin Jerusalema Judahai chun thiempuhai le Levi chia mihai chu Johan kuomah an tir a.
20. Johan chun tlang takin, "Krista chu ka ni nawh" tiin a lo inpuong a.
21. "An leh tu am i ni leh ? Elija i ni?" an ta. "Ka ni nawh" tiin a don a. "Zawlnei chu i ni?" an ti nawk a, "Ni lo e" a ta.
22. "Anleh tu am i ni hrim leh? A mi tirtuhai kan don theina dingin mi hril rawh. Tu'm i nih i'n ti reng reng a?" an ta.
23. Johan chun, "Zawlnei Isaiin a hril ang a, 'Lalpa lampui sukruol ro' tia thlalera khektu rawl chu ka nih" a ta.
24. Mi an hung tir laia Farisai thenkhat chun, "Krista amanih, Elija amanih,
25. Zawlnei amanih i'n ti si naw chun ieng leia i baptis am a na?" an ta.
26. Johan chun, "Keiin tuiin ka baptis a, sienkhom hi taka ngir lai hin in hriet naw mi pakhat a um.
27. Ama chu ka hnunga hung ni sienkhom a pheikhok hrui sut tlak khom ka ni nawh" tiin a don a.
28. Hieng thil hi Jordan ral Bethani khuoa Johanin baptisma a'n changtirna hmuna tlung a nih.
29. A zinga chun Johanin ama tieng pana hung Isu chu a hmu a, "En ta u, Pathien Beramte, khawvel suol phur hmangtu ding saw!
30. Ama hi a nih ka hnunga hung, ami lekhel tah tia ka hril cheu kha, a san chu ka hmaa lo um tah a ni leiin.
31. Ama chu lo hre naw lang khom, Israelhai kuoma tarlang a ni theina dinga tuia baptis dinga hung ka nih" a ta.
32. Chu zoah Johanin hieng hin a thil hmu a hril a: "Vathu anga vana inthoka Thlarau hung tum chu a chungah a fu zing ka hmu a.
33. Tuia baptis dinga mi tirtu khan, 'A chunga Thlarau tum le fu zing i hmu pa ngei chu Thlarau Thienghlima baptistu ding chu ning a tih' ti mi lo hril naw sien chu Ama chu hre lo ding ka ni a.
34. Chu thil chu ka hmu tah a, ama hi Pathien Naupa a nih ti ka puong" tiin.
35. A zinga chun Johan chu a zirtirhai pahni leh a ngir a.
36. Isun anni a hung fe khel lai chun, "En ta u, Pathien Beramte saw!" a ta.
37. A zirtir pahnihai chun a thu hril chu an hriet a, Isu an zui tah a.
38. Isu chu a ngha vel a, an hung zui a hmu chun, "Ieng am in zong a?" a ta. Anni chun, "Rabbi (chu chu Zirtirtu tina a nih), khawlam i tlung a?" an ta.
39. "Hung unla, hmung in tih" a ta. Chuongchun an zui a, a tlungna chu an hmu a, chu ni chun a kuomah an um a. Chawhnung dar li vel a nih.
40. Johan thu hril hrea Isu zuitu pahnihai laia pakhat chu Simon Peter unaupa Andri a nih.
41. Ama chun ahmasatakin a unaupa Simon a zong suok a, "Mesia (chu chu Krista tina a nih) kan hmu tah" tiin a hril a.
42. Simon chu Isu kuomah a hung thuoi a, Isun ama chu a en a, "Nang hi Johan naupa Simon i nih. Kifa ti tang an ti che" a ta (Kifa chu Peter tina a nih).
43. A zinga chun Isu chu Galili ram tieng fe a tum a. Filip a hmu a, "Mi zui rawh" a ta.
44. Andri le Peter ang bokin Filip chu Bethesaida khaw mi a nih.
45. Filip chun Nathanael a hmu a, "Mosien Dan lekhabua a chanchin a lo ziek le zawlneihaiin a chanchin an lo ziek, Nazaret Isu, Josefa naupa ngei chu kan hmu tah" tiin a hril a.
46. Nathanael chun, "Nazaret khuoah thil tha a suok thei am a ni?" a ta. Filip chun, "Hung la, hung hmu ve rawh" a ta.
47. Isun a kuom tienga hung Nathanael a hmu chun, "En ta u, Israel mi indik tak, hlemna dawha hrim hrim pai lo saw" tiin a chanchin a lo hril a.
48. Nathanael chun, "Nangin ieng tin am i mi hriet a?" a ta. Isu chun, "Filipin a ko hma chea theichang kung bula i um lai khan ka hmu che annawm" a ta.
49. Nathanael chun, "Zirtirtu, Pathien Naupa chu i nih; Israel Laltak chu i nih" tiin a puong a.
50. Isun, "Theichang bula i um lai ka hmu che ti ka hril lei elin i ring a ni maw? Hieng neka thil ropui lem hi la hmung i tih" a ta.
51. A hril zom pei a, "Thutak tak ka hril cheu hi. Van inhongah a suk a tunga Pathien vantirkohai Mihriem Naupa chunga inlon la hmung in tih" tiin.
      John (1/21)  →