←  Joel (2/3)  →
1. In inralring theina dingin,Zion-ah tawtawrawt mut unla,Ka tlang thienghlima chun mut ro.LALPA ni chu a tlung mek a,Hnai tea um a ni ta a,A ram mi po po inthin raw se.
2. Chu ni chu pikin zing a ta,Sum inthimin bawm khum a tih.Khaw varin tlang a tuom angin,Kha hmaa in la hmu ngai lo,Sipaib honpui hung thlahai chun,A ram phekin hung tuom an ta,Chuong ang chu a hnung khomin,Hmu nawk ni ta ngai naw nih.
3. Meiin ram a kang hmang angin,An hma zawn fa zo pei an ta,An liem hnunga an hnuhma chu,Ringmu angin kol vung a tih.An tlung hma chun a ram chu,Eden huon ang el ning a ta,An pel hnung ruok chun ram chu,Thlaler ram fil ang ning a ta,Ieng khom hla nei naw ni hai.
4. Sakor angin an inlang a,Sakor chungchuong angin an tlan a.
5. Tawlailir anga thum chur churin,Tlang sipah an kat sup sup a,Bupawl kang intek ang el le,Indo dinga sipai tam tak,Inpuocha mup mup ang an nih.
6. Mihan an hmuin an thlaphang a,Mi tin hmel a dang hlawp hlawp a.
7. Ral hrat angin hma an nor a,Sipai angin bangah an lawn a.Mani zawn seng an pan a,Tu khom a pet buoi an um nawh.
8. Tu khom innek buoi loin,Ngil takin hma an pan a,Ral daihai an ner thleng a,Pet hmang tu khom an um nawh.
9. Khawpuiah an tlan lut a,Kul bang hrulah an tlan a.Mi inah an lawn kai a,Rukru angin tukverah an lut.
10. An fena tieng taphotah,Hnuoi inhningin van a'n thin a,Nisa le thlapa an inthim a,Arasi hrim hrim a de nawh.
11. A sipai ruolhai chu thuoiin,LALPA chun thu a pek a,Tiem seng lo sipai a nei a,A zuitu an tam em em.LALPA ni chu a ropui a,A rapum em em bok a,Tuin am dawl zo an ta?
12. "Chuong chu ni sien khom tu hin,Bu nghei le lungngaia tapin,Lungril po po leh hung kir nawk ro'Ti hi LALPA thu suok a nih.
13. In hak lai silfen ni loin,In lungril pot thler unla,LALPA in Pathien kuomah kir ro,Ama chu lunginsietna hau,Lainatnaa sip,Lung inuoi le hmangainaa sip,Sietna intlun ding a ti khom,Inlamlet hlak mi a ni si a.
14. Ama chu hung ngha letin,Lainata mal hung sawm cheuin,LALPA in Pathien ta dinga,Bu le dawn thilhlan dinghai,Hung pe nawk nawng a ti cheu ti,Tuin am hre thei a ta?
15. Zion-ah tawtawrawt mut unla,Umni khamin bu nghei unla,Inkhawmpui thienghlim ko ro.
16. Mipuihai chu ko khawm unla,Inkhawmpui chu inthien unla,Upahai ko khawm unla,Nene ne lai chen khawm ko ro.Moneitun a pindan suoksan sien,Mo khom hung suok bok raw se.
17. LALPA siehlaw thiempuhaiin,Tempul bathlar le maicham inkarah,Hieng hin tap hla inzawt raw se:"Aw LALPA, i mihai hi hum la,Hnam dang nuizatbur le bieksisawah,I rochan hnam hi phal lul naw rawh.Ieng leiin am hnam danghaiin,"Khaw lam an Pathien chu teh!" An mi tikhum ding a na? tiin.
18. LALPAN a ram chu invoi a ta,A mihai chu lunginsiet a tih.
19. Hieng hin LALPAN don a tih: "Bu le uoiin le hriek thar,In tlai hle khop peng ka ti cheu;Hnam danghai nuizatburah,Siem ta ngai nawng ka ti cheu.
20. "Hmar tienga in doralhai chu,Hla takah hnot hmang ka ta,Ram tawl le filah hnot lut ka ta,A hmasa pawl Tuipui Thi ruomah,A danghai Thlang Tuipui kamah.An rim chu thu vut vut a ta,Van ur tung a tih" tiin.LALPAN thil ropui a thaw ngei el!
21. Aw ram, ti der naw la,Hlimin lawm lem rawh khai,LALPAN thil ropui a thaw chieng si a.
22. Aw ramsahai, ti der naw ro,Ran tlatna hmunhai hring nawkin,Thinghan ra thar insuong an ta,Theichang kung le grep hruihan,Inbawr luoiin ra insuong an tih.
23. Aw Zion mihai, hlim ro,LALPA in Pathien chungah lawm ro,Favang ruoc khom a hun takah,A hung insurtir nawk a ni hih.A hma angin favang le thal ruo,A hun tawkin a pek cheu hi.
24. Hrizawlah bu vum thur a ta,Uoiin le hriek khurhai sip liem a tih.
25. "Nangni laia ka sipai hung tir,Khau honpui le khauthikthihai,Tuktulung le thil ngehaiin,An fak siet zat hu po po kha,A kum telin rul ka ti cheu.
26. Fak ding hauin tlai in ta,Thil mak thawpek hlaktu cheu,LALPA in Pathien hming chu,Inpakin chawimawi tang in ta,Ka mihai muolpho ta ngai naw nihai.
27. Israelhai lai ka um ti leLALPA in Pathien chu ka nizie,Tu khom dang an um nawzie,Chu pha chun hre tang in ta,Ka mihai chu sukmuolphoinUm tah ngai hrim hrim naw nih.
28. Chu hnunga chun keimain,Ka mihai po po chungah,Ka Thlarau buok khum ka ta,In naunuhai le naupahaiin,Ka thu dongin hril an ta,Upahan mangah mang an ta,Tlangvalhan inlarna hmung an tih.
29. Ka bawinu le bawipa chunga khom,Chu ni chun ka Thlarau buok ka tih.
30. Chung tieng vanah thilmakhai,Hnuoi chungah thisen le mei,Meikhu intur ngul el hai chu,Ka hung inlangtir ding a nih.
31. LALPA ni ropui tak lePangzatum tak tlung hmain,Nisa chu thimah inchang a ta,Thla khom thisenah inchang a tih.
32. LALPA hming lam taphot chu,Sandamin um an tih;LALPAN a lo hril tah ang khan,Zion tlang le Jerusalema,Dam khaw suokhai laia mi,LALPA kohai chu him an tih.
←  Joel (2/3)  →