←  Job (6/42)  →
1. Chuongchun, Joba chun hieng hin a don a:
2. "Ka lungzingna le siettuokhai hi,Phahlaa buk thei ni sien chu aw!
3. Tuipuia tieu nekin rik lem a tih. Chuleiin ka tong hi a bul a nih.
4. Iengkimthawthei thalhai chu,Ka sunga hin an inbur a,A tur chun ka thlarau a fang a,Pathien tibaiumnan a mi'n huol.
5. Ram sabengtung hlo pet lai,A'n hram ngai hlak am a ni?Bawngchal khom bupawl chungah,A'n bu ngai hlak am a ni?
6. Hangna nei lo thil fak ding,Chi boin an fak hlak maw?Artui vara hin hangna,A um hrim hrim am a ni?
7. Ka enin ka phingtam a sukbo a,Ka ngaituon ka luok a suksuok.
8. "Aw, ka dit ang hni thei ni lang,Pathienin ka ti tak mi pe sien chu:
9. Pathienin mi rawt nawi sien,A kut hlangin mi sat nawi raw se.
10. Chuong ang khom chu lo ni sien la,Natna re lo tuor zing lang khom,Inhnemna ding ka nei tlat si:Mi Thienghlim thuhai hrim hrim,Pakhat khom ka'n phatsan nawh.
11. "Beiseina leh tuor thleng pei di'n,Hratna ka nei hrim am a ni?Teirei taka tuor thleng dingin,Beisei ding ka neia maw?
12. Lung anga chang le sakhat,Hratna ka nei hrim am a ni?Ka taksa hi dar tum am a ni?
13. Hlawtlingna i mi lakpek a,Mani hang inthangpui dingin,Theina ieng khom ka nei ta nawh.
14. "Chaua tlep tah ruolhai chu,Thangpui hlak a ni ngai a,Sienkhom Iengkimthawthei khom ti loin,Thiem naw in mi'n changtir a.
15. Vadungte hung lien thut a,A kuong luong liem ang el hin,Ka unauhai chu in um si a-
16. Vur khal zopin vadungte kuong,Dum kula a hnaw liem ang hin.
17. Sienkhom thal hun a tlung pha,Vadung chu a kang chat a,Thal rumah a'n hil rawt hlak.
18. Sumdawnghan tui zong dingin,Vadung chu an petsan a,Thlalerah an thi zo a.
19. Tema le Seba a'nthoka hung,Sumdawnghai khomin tui chu,Beiseiin an hung pan a,
20. Tui hrim a hmu naw leiin,An beisei a tawp der a.
21. Chuong ang char chu in ni ve-Ka siet tuok in hung hmu a,Pangzat cheiin in mi chei hi.
22. Ieng tik am nangni kuomah,Thilpek ka hni hlak hrim a?Ka ta dingin sum le pai,Seng di'n ka hni hlak cheu maw?
23. Hmelma laka mi san dingin,Ka hni hlak reng reng cheu maw?Tawrothai laka mi'n tlan dingin,Ka ngen hlak cheu am a ni?
24. "Mi hril unla, chun to ka tih;Ka suksuolna mi kawkhmu ro.
25. Thudik chun a deng na hle a,In thu chun kawk a nei nawh.
26. Ka beidong khek in ngaitha chun,In thu hi pom tlak a ni ding maw?
27. Fahrahai chunga chen khom,Sumdawngnan thum in vawr a,Ruolhai khom sumdawngnaa,Zor hmang hlaktuhai in ni kha.
28. Tu hin mi hang en hrim ta u,In hmaah khel hril naw ning.
29. Nangnin thiem chang lo anga,In mi ngai hi bansan unla,Hlei nei takin um ta naw ro.
30. Ka hmurah ritlona hrim,A kai ti in hriet hlaka maw?Ka bauin suol le thahai,Thlier thei lo dingin in ring maw?"
←  Job (6/42)  →