←  Job (5/42)  →
1. "I nuom leh hang ko hrim ta la,Tu'n am a don hrim ding che?Tu mi thienghlim kuom tieng am,I ngha hrim hrim ding a na?
2. Invet chu lungsen zingin a thi a,Mi mawl khom thik nei zingin a thi.
3. Invet zung kei ka hmu ta a,Sienkhom hun sawtnawteah,A in chu tongse phurin a um si.
4. A nauhai an him naw a,Kul tuolah an chil hlum a.Santu tu khom an nei nawh.
5. Hling le buor kara a lak,Bu thar a hlu luthai khom,Phingtamha'n an fak zo a,A hausaknahai khom chu,Dangcharhan an tlan lem hlak.
6. Tuorna hi pila inthoka Hung to suok a ni naw a,Buoina khom hnuoia inthoka,Hung inder suok a ni nawh.
7. Mei si a fe tung angin,Mihriem hi buoi dinga pieng a nih.
8. "I ngirhmuna um ni lang,Kei chun Pathien zong ka ta,Ka chungthu khom a kuomah,Inkoltir lem dai ka tih.
9. Thil mak sui suok ruol lo le Tiem seng ruol lo a thaw a.
10. Hnuoiah ruo a'n surtir a,Lohai tuiin a chawm a.
11. Mi hnuoihnunghai dom sangin,Lusunhai hmun himah a sie kai.
12. Mi vervekhai thil tum chu,A'n hlawsamtir hlak si a.
13. Vervek dawha a man nghal a,An thil phier a suktlol vat hlak.
14. Sun lai thimin a nang tawl a,Sun changah an zan inmai hlak.
15. Kawlhnama an that el ding,Retheihai chu san suokin,Mi hrathai kuta inthokin,Anni chu a pot thlak a,
16. Beiseina a pek tawl a,Rorelna indik naw chun,A bau a phong ngam ta nawh.
17. "LALPA zilna hlaw mi chu,Mi hamtha a va ni ngei!Iengkimthawthei thununna hi,Ngainep ngai hrim hrim naw rawh.
18. A vuok sil leh a tuompek a,A sukhliem leh a thawi dam hlak.
19. Sietna thuo ruka inthok khom,Ama chun a san suok hlak a,Thuo sari khom lo ni sien la,Suksiet ni ngai nawng i tih.
20. Tam tlakin thi nawng i ta,Indo pha kawlhnam lakah,Aman san suok a ti che.
21. Hrilsietna kawlhnam lakah,Aman humhim a ti che a,Sietna a hung tlung chang khom,Ti ding hrim nei naw ti nih.
22. Sietna le tamna hai chu,Nangin nuisan lem i ta,Hnuoia ram sakolhai khom,Ti ding hrim nei naw ti nih.
23. Lo le rama lunghai chenin,Inthuruolpui tang i ta,Ram hnuoia sakolhai leh,Inremin um tang in tih.
24. I puon in himzie hai dam,Chu chun hung hre tang i ta,I thil nei i tiem pha khom,A kim lo hrim um naw nih.
25. I thlahai tamzie ding khom,Chu chun hung hre tang i ta,Hlobet ang hiela tamin,An hung pung ding a ni si.
26. A huna bu an sik angin,Kum tling damin thlan pan i tih.
27. Hi thu hi kan sui chik ta a,A'n dik ngeizie khom kan hriet a,Ngaithla la, i nunah hmang rawh."Joba donna
←  Job (5/42)  →