←  Job (4/42)  →

---

1.

Chuongchun, Teman mi Elifaz

2.

"I kuomah bau khat hril lang,Mi ngaithlapek pei i tim?Tu'm insumin to zing thei an ta?

3.

Mi tam tak i zirtir tah hlakzie,Kut zoihai i sukhrat hlakzie dam kha,Hang ngaituo kir hram raw khai.

4.

I bau suokin tlu tahai i tungding a,Khup zoihai i sukhrat hlak kha.

5.

Tu hin buoinan a nang che a,I bei i sukdong nghal a;A hang tlak buok meu che chun,I chi-ai el ta si hi.

6.

Pathien ti chu i'n nghatna tak,Nun ngil hraw chu i beisei san,A ni lem naw ding am a ni?

7.

"Hang inngaituo vang vang la,Poi tawk lo tu'm an bohmang hlak?Khaw lai am mi ngilhai chu,Sat thlakin an um hlak a?

8.

Ka hmu dan chu hieng hi a nih:Suolna leilet inlettu le, Buoina chi tutuhai chun,An tu ra charh an sik hlak.

9.

Pathien thuokin a mut hmang a,A lungsenin a kang hmang hlak.

10.

Sakeibaknei chu inrumin,Inhuk dum dum hlak sien khom,A h� tlam hun a hung tlung hlak.

11.

Sakeibaknei hrat tak el khom,Se ding invaiin a boral a,A te thruoihai an indar hlak.

12.

"A ruktein ka naa hin,Thuin a mi biekruk a,

13.

Zan reah mihai in innghil lai,Zan mang an intuo laiin,

14.

Titna le inthinin a mi man a,Ka ru le chang a'n thin hlop hlop.

15.

Ka hmaah thlarauin a mi pel a,Ka hmulthi an ding uoi uoi a.

16.

Chuongchun ngirin a chawl a,A hmel awm ka siem thei naw a,Ka hmaah ruongthla chu a ngir a,Rawl damte'n a mi biek a:

17.

Hringmi lai hin Pathien neka,Indik le ngil an um thei am?Hringmi lai hin Siemtu nekaThienghlim lem an um thei am?

18.

A vantirkohai hman ring lo a,Thaw suola intum lemtu chun,

19.

Pil ina cheng mihriem lem chu,A va ring zo naw zuol awm de!Pilvut thuta innghat el a ni a,Bangthak neka ongrop a nih.

20.

Zing le zan kar a boral a,Tu khaw ngaisak hlaw loin,Kumkhuoin a tham ral a,

21.

A puon in hrui sut a ni pha,Var chuong loin a thi hlak.

---

←  Job (4/42)  →