←  Job (31/42)  →

---

1.

"Nunghak ngaimel lo dingin,Ka mit thu ka thlungpui a.

2.

Chung Pathiena inthoka,Ka chan chu iem ning a ta?Chunga Iengkimthawthei laka,Ka rochan chu iem ning a ta?

3.

Mi rilohai chan chu sietna,Suol thawtuhai chan ding khom,Vangduoina a ni naw maw?

4.

Ka lampuihai hmu fai vongin,Ka kal pen tin a tiem naw am a ni?

5.

"Thukhel lampui ka lo hraw a,Hlemna thu hnota ka tlan chun,

6.

Pathienin mi buk sien la,Poi ka tawk nawzie hre el a tih.

7.

Lam indik ka lo petsan a,Ka mitin ka lungril a thuoi a,Ka kut ka lo sukporche chun,

8.

Ka tu ra mi dangin fa sien la,Ka thlai ching phawi vong raw se.

9.

"Nuhmeiin ka lungril lem hne a, Ka tuolbawm nuhmei ka beisei chun,

10.

Ka nuhmeiin mi b� suk sien,Mi dangin zalpui raw hai se.

11.

Chu chu suol thlak tak a na,Hrem ngei ngei hlak chi suol a nih.

12.

Mi kang hmang theitu mei a na,Ka nei po khom kang ram a tih.

13.

Ka siehlawpa le siehlawnu haiin,Ka chungah nuorna thu an hril a,Ka lo ngaisak naw a ni chun,

14.

Pathien leh kan inhmason pha,Iengtin am thaw tang ka ta?A hung indon chieng pha leh,Iengtin am hril tang ka ta?

15.

Sula kei mi siemtu khan,Anni khom a siem naw maw?Nu phing sunga mi'n dintu chu,Thuhmun zing a ni naw maw?

16.

"Pasiehai mamaw somdawl lo a,Hmeithaihai ka sukbeidong a,

17.

Keima chauin bu ka fak a,Fahrahai ka sem ve naw chun-

18.

Ka chintea inthokin,Pain nau a enkol angin,Fahrahai enkol tleiin,Hmeithaihai ka somdawl hlak-

19.

Tu khom silfen boa boral,Sil le bil nei lo rethei hmu a,

20.

Ka beram hmula tuom lum lo a,Lungrilin a mi'n pak naw chun,

21.

Roreltuhai ka thuhne lei a,Fahrahai chunga kut ka'n let chun,

22.

Ka liengko hi ka darah khok sien,Ka ban hi a bulah tlam hmok raw se.

23.

Pathien hremna chu pangzat a,A ropuina chu ka ti em leiin,Chuong thil chu ka thaw ngam nawh.

24.

"Rangkachak inhnemnaa hmanga,Rangkachak hlir kuoma chun,"Nang hi ka ringsan i nih" ka lo ti chun,

25.

Ka hausak chu ka lawmna san ni a,Ka kuta sum inhnempui ka ni chun,

26.

Nisa var ropui khi ngaisang a,Thla var mawi tieng khi ngha a,

27.

Ka lungril hi a ruktea hip a,Kut phara ka lo biek a ni chun,

28.

Ka suolnaa tiem sa ni raw se,Chung Pathien laka uiretna a ni si a.

29.

"Ka hmelma sietna chungah lawm a,A siet tuok ka hlimpui a lo ni chun-

30.

Ama chu tongsie inphur dingin,Ka bau hrim ka phong ngai nawh-

31.

'Joba hrai tlai lo tu'm an um a?'Tia ka siehlawhan an hril naw chun-

32.

Tuolah mikhuol ka'n riektir ngai naw a,Khuolzin ta din kot ka hong zing hlak-

33.

Mihai anga ka suolna thup ruk a,Ka khawhlonahai ka ip ruk ve chun,

34.

Mipuihai ka ti dor dor lei le,Ka chipuihai hmusit ka'n lau leia,To toka tuol suok ngam lo ka ni chun,

35.

(Aw, bengkhontu nei lang chu maw!Ka chungthu chu ka hril zo ta a,Iengkimthawthei chun mi don raw se;Ka khingpui chun a mi hekna thu chu,Ziek ngeiin tar lang raw se.

36.

Chu thu chu ka liengkoah put ka ta,Lallukhum angin khum ka tih.

37.

Ka kalchawi tin chu hril ka ta,Mi lien angin ama chu pan ka tih.

38.

"Ka ramin mi dit loa a tap khek a,Changkuong tin mitthli'n a sip a ni chun,

39.

Man pe loa a tharsuokhai fa a,A santuhai ka suknuor a lo ni chun,

40.

Huit nekin hling to lem sien la,Barli nekin hlo intak to lem raw se."Chuong ang chun Joba chun thu a khar a.

---

←  Job (31/42)  →