←  Job (3/42)  →
1. Chu hnunga chun Joba chun a bau a phong a, a piengna ni chu tongsie a'n phur a.
2. Joba chun hieng hin a hril a:
3. "Ka piengna ni chun tongsie phur raw se,'Naupasal a pieng ie!' an ti zan chun.
4. Chu ni chu thimah inchang sien,Chung Pathien khomin hre fu naw sien,Thimin bawm khum tlat raw se.
5. Thim le thina hlimin chang hai sien,Sum inthimin bawm khum tlat sien,A var chu chim nel zing raw se.
6. Chu zan chu thai hmangin um sien,Ni le thla le kum tiemnaa khom,Chuong ta hrim hrim naw raw se.
7. Chu zan chu inrieng song sien,Hlimna ri hrim hre ta naw raw se.
8. Tongsie inphur thiema mi hril,Leviathan khom chok tho thiemha'n,Chu ni chu tongsie inphur raw hai se.
9. A sikhawvar chu inthimpek sien,Var chu nghak thlawn der hai sien,Ni eng hrim hmu naw raw hai se.
10. Ka nu sul mi lo kharpek lo a,Hieng ang buoina tuok dinga,A mi lo inpiengtir leiin,Chu zan chun tongsie phur raw se.
11. Sula inthoka ka suok ni khan,Ieng leia ka lo hlamzui naw'm a na?
12. Ka nu'n mal chungah mi chawi a,Ieng leia nenetuia a mi chawm am?
13. Ka pieng khan lo hlamzui lang,Inin chawl hadam tang ka tih.
14. Hnuoi lalhai le an khawnbawlhai,Hmun indin tlu ram hnunga chun,Z�l hmun rem tlang tang kan tih,
15. A nih, mi lien le lal hausahai,Rangkachak le tangkaruo a,An lal in sung siptuhai le chun.
16. Ieng leia ni eng hmu hman lo,Hlamzuia thi tahai ang el a,Phum hmanga ka lo um naw?
17. Thlana chun mi rilohaiin,Buoina an siem tah ngai naw a,Chauhai an chawl hadam tah.
18. Tanghai khom chawl hadamin,Vengtuhai vauh khawng rihai,Hriet ding hrim a um ta nawh.
19. Chu chun mi chin mi lienhai,An rengin an zal tlang a,Siehlawhai khom an pu lakah,An zalen fihlim ta si.
20. "Ieng leia rinum tuor kuomah,Var peka an um am a na?Ieng leia lungril beidong kuomah,Hringna peka an um am a na?
21. Thi chaka thi thei si lo,Ro phum ruk neka nasaa,Thina daptuhai kuomah?
22. Thlan muol an liem ni khuoa Hlim le lawma siphai kuomah?
23. Pathienin an lampui hrukpek a,Dai a'n huon khumhai kuomah?
24. "Bu hrim hrim fa thei loin,Tapin ka'n hniek hlop hlop a, Ka beidong inrum ri khom,Tui angin a'n baw hok hok.
25. Ka thil tuok inlau rop chu,Ka chungah a hung tlung a,Ka thil pangzat rop hlak chun,A mi hung nangching ta si.
26. Hadamna ka nei naw a,Ka um tok tok thei naw a,Chawl damna hrim hmu loin,Buoinain a mi nang vel."
←  Job (3/42)  →