←  Job (21/42)  →
1. Chu zoah Joba chun hieng hin a don a:
2. "Ka thu hi ngun takin ngaithla un la,Chu chu in mi thlamuongna ni raw se.
3. Thu mi'n hriltir ve hram un la,Ka hril zo pha leh mi nuisaw lem ro.
4. "Mihriem chunga chier am ka ni?Ieng leiin am zai chu ka ngai ding?
5. Makti takin mi en unla,In kutin in bau hup ro.
6. Hi thil hi ka ngaituo changin,Pangzatin ka pumin ka'n thin hlak.
7. Ieng leiin am mi rilohai hi,Dam sawtin an hmuingil a na?
8. An vela an tu le tehai chu,An mithmua ngei an suknghet a.
9. An inhai chu a ralmuong a,Titna lakah an fihlim a,An chungah Pathien hmol a tla nawh.
10. An bawngchalhan an thla pung a,An bawngpuihan te an insiet ngai nawh.
11. Ran ruol angin nau an inpung a,Tuolah naupang an tuolchai a.
12. Perkhuong, tingtang, theihle remin,Hlim takin hla an sak a.
13. An dam sunga hmuingilin,Muong takin thlanah an liem a.
14. Chuong sa chun Pathien kuomah,"Makhatin mi fesan rawh. I lampui hriet kan chak nawh.
15. Iengkimthawthei chu tu'm a na?Ieng leiin am a rong kan bawl ding?A kuomah kan tongtai chun,Hlawkna iengam kan hmu ding?" an tih.
16. Sienkhom, an hmuingilna chu,An kutah um a ni si nawh.Mi rilohai remruotna lakah,Kei chu ka'n thier fihlim dai hlak.
17. "Mi rilohai khawnvar chu,Sukmitpekin a um rop a,Pathien lungsenin an chungah,Vangduoina an tlungtir rop a,Chu chu an chana a ruot a nih.
18. Thli len hmang bupawl ang leThlipui len dar favai ang el,An ni rop hlak naw am a ni?
19. A ritlona leiin Pathienin,A nauhai a hrem hlak' in tih.Ama chungah tla lem raw se chu,A hung inhriet suok theina dingin.
20. Mit ngeiin a siet tuok hmu sien,Iengkimthawthei lungsenna chu,Ama ngeiin dawn mol raw se.
21. A damsung ni a kin pha chun,A maksan a sungkuohai chu,Ieng leiin am a'n voi rak ding?
22. Insang tak chung chen khoma,Roreltu Pathien chu tuin am,Hrietna a zirtir thei ding?
23. Thenkhat chu an hrat lai hunaMuong le inhoi taka khawsa,
24. Taksa thau inmum puol el,An ru thlina hnaw sip chu,An vanglaiin an thi a.
25. Thenkhat chu rinum taka,Thil tha intem phak loa,Lungngaia thi an um bok.
26. Pilvutah an zal tlang a,A ngein an bawm sip ve ve.
27. "In ngaituohai ka hriet vong,Ka sietna dinga in phierhai khom.
28. Khaw lam mi rilopa chengna,Mi ropui pa in chu?' in tih.
29. Khuolzin fe le hunghai chu,In indon ngai naw a ni?An hril chu in awi naw maw ?
30. Vangduoina a hung tlungin,Mi suol chu hlain a um a, Lungsen niah san suokin a um.'
31. A khawsak dan chungthua,Hmaisana kawk an um am?A thilthaw tahai lakah,Tuin am a thungrul a?
32. Thlanah ama chu an vui a,A thlanah vengtu an sie a.
33. Pil khom a chungah a lo tha.A hmaah tiem seng lo an fe ta a,A hnungah mi tinin an zui.
34. "Thu hmang lohai in mi hril hin,Iengtin am mi thlamuong in ta?In mi donna thu po po hin,Khel naw chu fun a nei nawh."
←  Job (21/42)  →