←  Job (20/42)  →
1. Naamat mi Zofar chun hieng ang hin a don a:
2. "Ka lung a khei tlat leiin,Chu chun don dingin a mi mor a.
3. Mi sukzaktu kawkna ri chu ka hrietin,Don dingin ka lungin a mi tur a nih.
4. Tiena tlanga inthok ta khan,Hnuoia mihriem an chenga inthokin,Hieng hi a nih ti i hriet chieng:
5. Mi rilo hlimna chu a tawi a,Pathien hre lo mi hlimna chun,Mit khap kar chauh a daih, ti hi.
6. Van tongin ropui sien khom,A luin sum tong phak sien khom,
7. A ek angin kumkhuon bohmang a ta,Ama hmu hlaktuhai khomin,"Khaw lai am a um ta a?" ting an tih.
8. Mang angin tham ral a ta,Tu khomin hmu ta naw ni hai a,Zan inlarna angin ral a tih.
9. Mita hmutuin hmu ta naw ni a,A hmun khomin hre fu ta naw nih.
10. A nauhan mi retheihai kuomah,Ditsakna hniin dawvan kai an ta,Ama kut ngeiin a hausakna chu,Retheihai kuomah pe kir a tih.
11. Thalai tha hrat a ni lai zingin,A ruhai leh pilvutah zal a tih.
12. "A bauah suol chu thlumin,A lei hnuoiah thup sien khom,
13. A baua inthoka pei suok rinin,Hmuom zing khom ni sien la,
14. A phing sungah hung thur a ta,Rul turin inchang a tih.
15. Hausakna a dol tah po po,Hung luok suok nawk vong a ta,Pathienin inluok suoktir a tih.
16. Rul tur hrat chu dawk a ta,Rulriel tur chun that a tih.
17. Khuoizu le nenetuia luong,Vadunga chun cheng hlim naw nih.
18. A thawsuokhai chu pe kir a ta,Hnuk tlainain hmang naw ni a,Sumdawngnaa a hlawkhai chu,Inhoi takin chen ngai naw nih.
19. Pasiehai sir sopin a nghatsan a,Ama bawl khom ni hrim hrim lo,An inhai chu a lakpek hlak si a.
20. "A duamnan khop tik a nei naw a,Fak mahla a hla ngai naw a,
21. A dolin a dol thlak zung zung a,A hausakna'n a tuor zo nawh.
22. A hausak vang lai takin,Buoinain hung nang a ta,Retheina honpuiin bawm an tih.
23. A phing a khop lai takin,Pathien lungsenna phuba chu,A chungah hung tlung a ta,Kut tum insurtir a tih.
24. Thir hriemhrei pumpel sien khom,Dar thal chun kap tlang a tih.
25. A hnunga thal chu phawi a ta,Dar thal hmor zum tle tak el chu,A thina inthokin pot suok a tih.
26. A ro ding chu thim sa tak a na,Mut lo meiin kang hmang a ta,A ina a nei po po lem zo a tih.
27. Vanha'n a suolna puong an ta,Hnuoiin ama chu do a tih.
28. A ina a thil nei po po chu,Pathien lungsenna nia chun,Tui lienin len hmang a tih.
29. Chuong chu mi rilo chan dinga,Pathien ruot a ni si a."
←  Job (20/42)  →