←  Job (2/42)  →
1. Ni khat dang chu Pathien hmaah vantirkohai an hung inlang nawk a, Setan khom chu LALPA hmaa inlang dingin anni lai chun a hung ve a.
2. LALPA chun Setan kuomah, "Khaw tienga inthoka hung am i na?" a ta. Setan chun, "Suk le tunga ka'n vak velna hnuoia inthokin" a ta.
3. LALPA chun Setan kuomah, "Ka siehlaw Joba hi i thlithlai hlak am? Ama anga dem kai lo, indik famkim, Pathien ti mi le suol laka inthier fihlim hi hnuoi chungah tu khom an um nawh. A san boa suksie a, ka laka hel dinga i cho phawk hnung khomin a ringumna a la vong tlat a nih" a ta.
4. Setan chun, " 'Vun aia vun' ti a ni hlak reng annawm. Mi tu khomin hringna ta ding chun nei po po khom pe phal ngei naw ni hai!
5. Tu hin a chungah i kut thlak la, a taksa le ru le changhai ngei hang tawkpek ngat rawh, i hmaisanah hril se nghal a ti che" a ta.
6. LALPA chun Setan kuomah, "Chuong an leh, a tha, ama chu i kutah ka pek che. A hringna ruok chu hla rawh" a ta.
7. Chuongchun, Setan chu LALPA kuoma inthokin a suok a, Joba chu a lua inthoka a kepha chenin pansie na takin a'n bawmtir a.
8. A pang huotna dingin bel koi har a lak a, vut lai a thung a.
9. A nuhmei chun a kuomah, "I ringumna chu chel tlat i la tum a ni? Pathien hril se la, thi law law la a ni el annawm" a ta.
10. Sienkhom, Joba chun a kuomah, "Nanga nu hi nuhmei intlaw, Pathien inzana hrim nei lo tongin i tong a ni hi tie! Pathiena inthokin thil tha ei hmu ang bokin thil tha lo khom ei hmu sa ve naw ding am a ni? " a ta. Hieng po poa hin Joba chun thu indik lo a hril nawh.
11. Joba chunga thil tha lo a tlung thu a ruolhai Teman mi Elifaz hai, Suha mi Bildad hai le Naamat mi Zofar haiin an lo hriet chun tuorpui ding le thlamuong dingin an in senga inthokin a ruolin an hung pan khawm a.
12. Rala inthoka an hei hmu chun Joba a nih ti khom an hriet el thei ta naw a. Inring takin an tap a, an puonhai an pot thler a, an luah pilvut an phul a.
13. A natna chu a'n rim ema an hriet leiin, to tokin ni sari le zan sari hnuoia chun an inthungpui a.
←  Job (2/42)  →