Job (19/42)  

1. Joba chun hieng hin a don a:
2. "Ieng chen am mi nghaisain,Tong bauin in mi sop ding a na?
3. Voi sawm zet in mi kawk ta a,Inzak hre der loin in mi bei a.
4. Ka thaw suol khom lo ni sien,Keima mawphurna a nih.
5. Ka chungah hin insuklien a,Ka muolphona remchanga laa,Ka suolna tar lang tum in ni chun,
6. Ka chunga thawtu chu Pathien a na,A lenin a mi tuom ti hi hre ro.
7. "Ka poi an tawk" ti'n ka khek a,Donna hrim ka hmu naw a,Thangpuitu ding ka ko khek a,Indika relpek ka ni chuong nawh.
8. Suok thei lo di'n ka lam a khar a, Ka lampui thimin a'n bawmtir a.
9. Ka ropuina a mi hlippek a,Ka lallukhum a lak hmang a.
10. Ka siet lailet der chenin, Sir tinah a mi pot chen a.Ka beiseina po po khom,Thing angin a mi phawipek a.
11. A lungsenna chun a mi hlieu a,Hmelma angin a mi en a.
12. A sipaihai a hung tir a,Kul dai an mi bawl khum a,Ka puon in velah hmun an khuor.
13. "Ka unauhai a sukhel a,Ka hmelhriethai po po khom,Hmel hriet lo an inchang tah.
14. Ka laibunghan an mi zamsan a,Ka ruolhan an mi thlauthlak a.
15. Ka mikhuolhan an mi theinghil a,Ka siehlawnuha'n mikhuolah mi ngaiin,Ram dang mi angin an mi en a.
16. Ka siehlaw ka ko, a mi don nawh,Bau ngeia ka ngen hram khomin.
17. Ka nuhmeiin rimsie a mi ti a,Ka unauha'n an mi tirdak a.
18. Naupang chenin mi hmusitin,Ka hmel hmuin an mi deusaw.
19. Ka ruol bulhaiin an mi ten a,Ka hmangaihan hnung an mi'n nghat.
20. Vun le ru khat chauh ka ni ta a,Ka hani chu ka la chang hram a.e
21. "Aw ruolhai, mi lunginsiet ro,Pathien kutin a mi tawk a ni hi!
22. Ieng leia Pathien ang ziezanga,In mi hnot thlur zing am a na?Taksaa ka tuorna po po hi,Hun tawk in la ti naw a ni maw?
23. "Aw, ka thuhai hi zieka umin,Lekhabuah chuong sien ka va nuom ngei!
24. Thir le suon ziekfunga hmangin,Kumkhuoa din lungpuiah ker inla chu aw!
25. Ka Tlantuf chu a hring ti ka hriet a,A tawpah hnuoiah la ngir a tih.
26. Ka vun hi a siet vong hnungin,Taksa ngeiin Pathien la hmung ka tih.
27. Keima ngeiin, ka mit ngeiin,Mi dang mit ni loin la hmung ka tih,Ka lungrilin a va nghakhla de aw!
28. " 'Iengtin am soisak ei ta?Ama hi buoina bul chu a nih'In mi ti khom a ni el thei.
29. Sienkhom kawlhnam chu ti ro,Kawlhnama inhremna hi,Pathien lungsen inlangna a nih.Chu hun chu a tlung pha chun,Roreltu a um ti hung hre tang in tih."

  Job (19/42)