Job (18/42)  

1. Suha mi Bildad chun hieng hin a don a:
2. "Ieng tik am i to ding a na? Hang inngaituo phot la, Chu zoah inbieng ei tih.
3. Ieng leia ran anga ngai kan ni?Ieng leia intlawa i mi hmu tawl?
4. Lungsena puok koi nang lei hin,Hnuoi hi rausanin a um ding maw?Lungpui khom a hmuna inthokin,Son hmang a ni ding am a ni?
5. "Mi rilo khawnvar a sukmit a,A chok lai chu a her hlum hlak.
6. A puon ina var chu inthimin,A bula khawnvar chu a mit hlak.
7. A kal pen inrang chu a zuoi a,Ama remruotin a kei thluk a.
8. Len changah ke a rol lut a,Tlakpuma chun a fen lut a.
9. A keringah a phi awk a,Len changa chun a'n tang a.
10. A awkna dingin a lampuiah,Chang kamin val an phum ruk.
11. Sir tinah titnan a'n huol a,Man tumin a hnot thlur zing a.
12. Tam leiin a tha a hung chuoi a,A lampuiah sietna a'n khang a,
13. Panin a vun a fak siet a,Thina nau lutirin a kefuhai.
14. A muongpui puon ina inthokin,Titna lal kutah a fen lut a.
15. A puon in a ruok vong a,A chengna hmun katin a tuom a.
16. A zung tieng a hung tlol a,A kauhai an hung vuoi a.
17. Hnuoiah tu hriet loin a bo a,A hming chawi kotthler a um nawh.
18. Vara inthoka thima hnaw lutin,Hnuoia inthokin an hnot suok a.
19. A mihai an suonmong vong a,A ramah chithla a maksan nawh.
20. Khawthlang tienga chenghaiin,A chan chu an pangzat a,Sak tieng mihan an pangzat bok.
21. Mi rilohai chengna hmun chu,Chuong ang chu a ni ngei ngei,Pathien hre lohai chengna chu."

  Job (18/42)