←  Job (16/42)  →

---

1.

Chuongchun, Joba chun hieng hin a don a:

2.

"Chuong thil chu ka hriet rawn tah. Hnemtu nghokum in va ni ngei!

3.

In thu sep kawi sei tak tak hin,Tawp zai a rel naw di'm a ni?Ieng hri am in invoi tawl a,Hienga in mi sel tlut tlut hi?

4.

Ka ngirhmuna um ni unla,Nangni ang boka tong vein,Thu mawi tak tak inzawtin,Lu ka lei khum ve thei cheu.

5.

Sienkhom, chuong chu thaw loin,In tangkaipui ding chauh hrilin,In nat tuor hnem tum lem ka tih.

6.

"Amiruokchu ka hang tongin,Ka nat a re chuong naw a,Ka to a, a re chuong bok nawh.

7.

Pathien in a mi sukchau der a,Ka sungkuo a sukram vong bok a.

8.

A vun khat chauh ka ni ta a,Chu chun a mi sukhmelhem a,Ka cherna chu a mi khingtu niin,Hmai sana mi kawktu a nih.

9.

Pathienin a mi soisak a,Lungsenin a mi pot nawi a,A ha a mi rawt khum a,Mi khingtu chun a mi mel rum.

10.

Mihan bau mi phong khumin,Hmusitin biengah an mi ben a,Mi do dingin an pung khawm.

11.

Pathienin mi suol kutah mi'n hlanin,Mi rilohai kutah a mi pei lut a.

12.

Hadam taka ka um laiin, Aman a mi vuok dar a,Ka ringah a mi rek a,A mi pot nawi ta vong a. Ama chun mi thlur bingin,

13.

A thal kaptuhan mi'n huolin,Indoina hrim mi nei der loin,Ka kalhai a phor suok a,Hnuoiah ka mit a bun dok a.

14.

Voi tam tak a mi chil sop a,Ka chungah a nunrawng a nih.

15.

"Ka vunah saiip ka thui de a,Pilvutah ka hmai ka phum a.

16.

Hmai sen rak khopin ka tap a,Ka mit vun a duk vong a.

17.

Sienkhom, poi ka tawk naw a,Ka tongtaina khom a thienghlim.

18.

"Aw hnuoi, ka thisen inkhum naw la,Ka tap ri khom chawl naw raw se.

19.

Tu ngei el khom hin chieng takin,Ka thu hretu vanah a um a,Mi hrilpuitu van sangah a um.

20.

Mi hrilpuitu chu ka ruol a na,cKa mitthli Pathien hmaah a sur.

21.

Miin a tuolbawm ta dinga thu,A hrilpui hlak ang el hin,Mihriem aiawin Pathien hmaah,Ama chun a hrilpui hlak.

22.

"Kum sawt nawte hnungah,Kir nawk ta ngai nawna lam chu,Ka hraw ta ding a ni si a.

---

←  Job (16/42)  →