←  Job (15/42)  →
1. Teman mi Elifaz chun hieng hin a don a:
2. "Mi var chun thu takbo hmangin,Mi a don hlak am a ni?A phingpui chu sak thli lumin,A hnaw puom hlak am a ni?
3. Tongkam tlaktlai reng reng lo,Hlutna nei lo thu hmangin,Thu a hril ding am a ni?
4. Pathien tina hrim i nei naw a,A kuoma inhlan i nuom der nawh.
5. I suolna chun i bau a mor a,Mi vervek lei hmangin i tong a.
6. I bau ngeiin, keima bau ni loin,Thiem naw a'n changtir che a,I hmur ngeiin a hek che a nih.
7. Pieng hmasa taka inngai i ni? Tlanghai um hmain i pienga maw?
8. Pathien rorelnaah i thang tah maw? Varna chu pumbil bika inngai i ni?
9. Kan hriet bak iem i hriet bik? Kan hmu bak iem i hmu bik a?
10. Lu-a kelsam to tah upahai,Kan kuoma hin an um ve a,I p� neka upa lem dam an nih.
11. Pathien thlamuongna che le Zainem taka a tina che hi,Hun tawk i la ti naw rop a ni?
12. Ieng dinga i lungril ditzawngin,A thuoi hmang che am a na?Iengti leia i mit dam phiel a,
13. Pathien lakah meng inrum a,Chuong thu dam chu i hril a na?
14. "Mihriem an inthieng thei maw?Nuhmei hring mihriemhai lai,Mi fel an um theia maw?
15. Pathien chun angelhai khom,Ring tlakah a ngai naw a,Van khom ama mithmuah,Inthieng tawk a ti naw chun,
16. Tirdakum le porche ta sa, Tui anga suolna dawn hlaktu,Mihriem lem chu ti nawzuol a tih.
17. "Mi ngaithla la, hril ka ti che,Ka thil hmuhai hril ka ti che,
18. Pi le pua inthoka an donghai,Ip loa mi varhan an lo hril hlak chu.
19. Anni chauh chu ram a pek a,Hnam danghai an thang ve nawh.
20. Mi rilo chu a dam sungin,Natna tuorin a'n kon hlak a,Mi nunrawng khomin a chana ruot,Kumkhawtluongin a tuor hlak.
21. Titna ri a hriet zing hlak a,Muong huna mi ngai lai khom,Roktuin an hung nang hlak.
22. Thim a suoksan ngam naw a,A hmabak chu kawlhnam a nih.
23. Mulukol bu inchang dingin,Ama chu a'n vak vel a,Inthimna chun a hung nang tahTi khom a hriet vong sa a nih.
24. Mangangna le lungngainahan,An sukthlabar zing zing hlak a,Ral bei ding nei lal ang a nih.
25. Pathien chungah kut a'n let a,Iengkimthawthei chu a kal a,
26. A phaw lai pawng tieng hmasonin,Lulul takin a bei hlak si.
27. "A hmai thau puom cher churin,A kawng inchuor hnur sienkhom,
28. Khawpui ram hnung hluong a ta,In tawp rausanah cheng a tih.
29. Hausa zom zing naw ni a,Sum le paiin tinsan an ta,A hausakna chu kawl kil tinah,Inzar dar ta bok naw nih.
30. Thima inthok suok naw ni a,A kauhai meiin hlieu tawl a ta,Pathien thuokin len hmang a tih.
31. Hausakna teploa innghatin,Mani inhlem naw raw se,Ieng khom hlaw suok nei naw nih.
32. A thi hma'n a chan hmung a ta,A kauhai tawl bor bor an tih.
33. A ra hmin hmaa sawi til,Grep kung ang el ning a ta,A par vul laia sawi til vong,Oliv thing ang el ning a tih.
34. Pathien ngaisak lo mi chu tawl an ta,Thamna ngainatu puon in chu,Meiin lem hmang vong a tih.
35. Buoina nauin an pai a, Nauah suol an hring suok a,An sul ra chu inhlemna a nih."
←  Job (15/42)  →