←  Job (13/42)  →
1. "Ngai ta u, in thil hrilhai po po hi,Mita hmuin nain ka hriet a,A umziehai khom ka hriet thiem.
2. In hriet ang hi ka hriet ve a,Nangni nekin ka neu bik nawh.
3. Sienkhom kei ka nuom tak chu,Iengkimthawthei inbiekpui a,Pathien kuoma ka chungthu hril a nih.
4. Nangni chun khelin in mi chirthe a,Hmangna bo daktor ang in nih.
5. To tok tok ni unla chu,Var in hlaw lem awm vei leh!
6. Ka thu hi lo ngaithla unla,Ka kam suokhai hi bengkhon ro.
7. Pathien aia rilo taka tongin,Thu khelhlip in hril ding maw?
8. Ama tan zawnga thu hrilin,In hlei neizie in tar lang ding maw?
9. Man suok sien cheu a tha ding maw?Mihriem in hlem hlak angin,Hlem ve el thei in inring maw?
10. A ruka hlei in nei khomin,Ama chun kawk a ti cheu.
11. A ropuinan a rap naw ding cheu maw?A tibaiumnan a del naw ding cheu maw?
12. In thusim le thuvarhai hi,Vut lak voi thuvar ang chauh a na,In thiem thu hril derdepzie khom,Pil bel anga dawrawm a nih.
13. "Tongna ding mi'n ken unla,A ni ding ang ang ni raw se.
14. Ka taksa hi se put ka ta,Ka kutah ka nun thap ka tih.
15. Mi that ding khom ni sienla,Ama chu beisei tlat ka ta,A hmaah ka thiem thu hril ka tih.
16. Hi hin mi san him a tih:Pathien hre mi nawhai chu,A hmaah inlang ngam naw nih.
17. Ka hril hi ngaithla ngun ro,Ka thu hi in naah lut raw se.
18. Hril dingin ka'n buotsai ta a,Thiem chang ka tih ti ka hriet.
19. Tu am mi sel ding an um a?Ka suolna hril thei an um chun,Thi chenin to song tang ka tih.
20. "Hi thil pahnihai bek hi,Aw Pathien mi phalpek la,I hmel hmu ngam tang ka tih:
21. Ka laka inthok hin i kut,Hla takah mi la sonpek la,I rapumnan mi sukthlabarin,Mi rikrap ta naw hram rawh.
22. Chun, mi ko la, don ka che a,An naw leh kei tong ka ta,Nangin mi hung don rawh.
23. Ka bawsiet le ka suol thawhai,Ieng ang hiela tam am a na?Ka bawsietna le suolnahai chu,Nangmain mi'n hriettir rawh.
24. Ieng leiin am i hmel thup a,Hmelmaa i mi ngai ding chu?
25. Thli mut leng hnatawng el hi,I sukthlabar zing ding maw?Bupawl inleng ang mei mei hi,I hnot thlur zing ding am a ni?
26. Ka chung thu na taka ziekin,Ka tleirawl lai suol mi'n phurtirin,
27. Ka keah kol i mi'n buntir a,Ka fena taphotah mi bithlain,Ka hniekhnung i sui ngat ngat a.
28. Thil hmon angin ka zur thla a,Hangthim fak siet silfen angin.
←  Job (13/42)  →