←  Job (10/42)  →
1. "Ka nun hi ka nghok tah leiin,Ka thla nuor ngawi ngawi pumin,Insum loin ka hril ding a nih.
2. Hieng hin ka nuor thusim chu,Pathien kuomah intlun ka tih:Thiem naw mi'n changtir el loin,I mi salna thu mi hril rawh.
3. Kei hi i kutsuok ni siin,Hmusitin i mi sawr de a,Mi suol remruot lawmpui lem hi,Inhoi i ti zawng a ni maw?
4. Mihriem mit ang hi put vein,An hmu angin i hmu ve am?
5. I ni chu mihriem ni ang,I kum khom anni kum ang,A lo ni ve am a ni?
6. Ka khawhlonahai chu dapin,Ieng leia ka suolnahai chu,Hmu tuma i melkai zing am?
7. Ka suol nawzie ka hriet chieng a,Sienkhom i kuta inthoka,Mi la suok thei an um si nawh.
8. "I kuta indinin i mi siem a,Tu hin nang hung ngha letin,I mi suksiet nawk el ding maw?
9. Pila inthokin i mi siem ti,Ieng lai khom theinghil naw rawh.Tuhin nangman pila bok,I mi'n kirtir nawk el ding maw?
10. Sulah bawngnene angin,Nangin i mi bun thlak a,Bawngnene khal ang elin,Nangin i mi hmet hlawm a,
11. Vun le taksaa mi tuomin,Ru le thain i mi phier khawm.
12. Nangin hringna i mi pek a,Lunginsietnan i mi vur a,I pathienna chun ka thla,Vengin i enkai zing hlak si.
13. Sienkhom, i lungrila i thup,I tum ruk chu hi hi a nih:
14. Ieng lai khom mi enthlak a,Ka suol chun ngaidam lo ding.
15. Suol lang ka va dok awm de!Poi ka tawk naw sa hman hin,Ka hmai khom dak tha ngam loin,Inzaknan ka sip a ni hi.
16. Lo meng insang lang lem chu,Keipui angin mi veng i ta,I hratnan mi rikrap i tih.
17. Ka chungah thu thar i rol pei a,I lungsenna a zuol deu deu a,A honpuiin an mi hung bei a nih.
18. "Ieng leia sula inthok khan, I mi lo lak suok hrim am a na?Tu khomin an mi hmu hma khan,Lo thi dai ta lang ni ding bah.
19. Lo pieng naw lang ni ding maw!Sula inthok khan hlamzuiin,Thlanah lo liem lang ni ta ding!
20. Ka damlai ni hi a liem tep ta a,Tawite bek ka hadam theina dingin,Mi'n kiengsan hram el raw khai,
21. Kir nawk ta lona hmun thim,Thina deihlim ram ka pan hma hin.
22. Chu ram chu thim sa mup bawm,Buoina inlalna, thina hlim ram,Var khom thima a'n changna ram a nih."
←  Job (10/42)  →