Job (1/42)  →
1. Uz ramah mi pakhat a hming Joba a um a. Ama chu dem kai lo, mi indik famkim, Pathien ti mi le thil suol laka inthier fihlim mi a nih.
2. Naupa pasari le naunu pathum a nei a.
3. Beram sangsari, sanghawngsei sangthum, bawngchal tuok zanga, sabengtung zanga le siehlaw tam tak a nei a, khawsak ram tienga mihai lai chu a neinung tak a nih.
4. A naupahai chun an pieng champhaah ruoi an the hlak a, an farnuhai an fiel a, fain an dawn tlang hlak a.
5. A changin an ruoi the chun ni iemani zat a aw hlak a, a tumtiek pha leh Joba chun, "Ka nauhai hin thil suol thawin Pathien lo hril se pal hlauh rawi an tih" a ta, zing inhma takin a tho a, an rengin a ko khawm a, inthienna dingin an hming kipin pumraw inthawina a'n hlan a, chu chu dana neiin a thaw ngei ngei hlak.
6. Ni khat chu Pathien hmaah vantirkohaia an hung inlang a, anni lai chun Setan khom a hung thang ve a.
7. LALPA chun Setan kuomah, "Khaw tienga inthoka hung am i na?" a ta. Setan chun, "Suk le tunga ka'n vak velna hnuoia inthokin" a ta.
8. LALPA chun Setan kuomah, "Ka siehlaw Joba hi i thlithlai hlak am? Ama anga dem kai lo, indik famkim, Pathien ti mi le suol laka inthier fihlim hi hnuoi chungah tu khom an um nawh" a ta.
9. Setan chun LALPA kuomah, "Ni e, Joba chun a san boa Pathien a ti ni lo a!
10. Ama le a sungkuo le a thil neihai po po kil tinah nangin i huol himpek a ni naw am a ni? A kut sinthaw mal i sawm a, a ram phekah a beram le bawng ruolhai i sukpung a.
11. Tu hin a chungah kut inletin, a nei po po chungah i kut thlak ta ngat la chu, hmai sanah hril se ngei ngei a ti che" a ta.
12. LALPA chun Setan kuomah, "Chuong a ni leh hang fie hrim ta la. A nei po po chungah i nuom ang angin thaw la, ama tak ruok chu tawk poi naw rawh" a ta. Chuongchun, Setan chu Pathien kuoma inthok chun a suok ta a.
13. Ni khat chu Joba nauhaiin an upa tak inah ruoi an kil a, fain an dawn tlang a.
14. Chuong lai chun Joba inah zuolko a hung a, "I bawngchal ruolin lo kei a, a bulah i sabengtung ruol an tlat laiin,
15. Sabe mihaiin an mi hung run a, ranhai an lak vong a, i siehlawhai khom an that a, keima chauh hi hung hril thei dinga tlan suok um sun chu ka nih" a ta.
16. A hril lai zing chun zuolko dang a hung tlung ve a, "Vana inthokin Pathien mei a hung tla a, i beram ruol le berampuhai a kang hlum vong a, keima chauh hi hung hril thei dinga tlan suok um sun chu ka nih" a hung ti nawk a.
17. A hril lai zing chun zuolko pathumna chu a hung tlung a, "Mi rok pawl Kaldai mi pawl thum an hung a, i sanghawngseihai an lak vong a, i siehlawhai an that a, keima chauh hi hung hril thei dinga tlan suok um sun chu ka nih" a ti a.
18. A hril lai zing chun zuolko dang a hung tlung a, "I naupahai le naunuhaiin an upa tak inah faa an dawn laiin,
19. thlalera inthokin thlipui hrat takin sir tinah an umna in chu a hung nuoi a, in chu a chim a, i nauhai a del hlum vong a, keima chauh hi hung hril thei dinga tlan suok um sun chu ka nih" a hung ti bok a.
20. Chuongchun, Joba chu a tho a, a puon a pot thler a, a lu a vaw kol a, Pathien hmaah hnuoiah a bokkhup a.
21. Joba chun,"Ka nu sula inthokin,Saruokin ka hung pieng a,Saruok boka kir ding ka nih;LALPAN iengkim a mi pek a,LALPAN a lak nawk vong a,A hming chu inpakin um raw se"a ta.
22. Chuong thil po poa chun Joba chun Pathien a mawsiet naw a, thil suol a thaw bok nawh.
      Job (1/42)  →