Jeremiah (7/52)  

1. LALPA thu chu Jeremia kuomah a hung tlung a:
2. "LALPA in kotkhara chun ngir la, hi thu hi puong rawh: 'Nangni Juda mi, LALPA chawibiek dinga kotkhar sunga hung luthai, LALPA thu hi ngaithla ro.
3. Iengkim LALPA, Israelhai Pathien chun hieng hin a tih: In um dan le in thilthaw danah insiemtha unla, hi hmuna hin inchengtir ka ti cheu.
4. Hi hi LALPA tempul, LALPA tempul, LALPA tempul' in ti lei ringota him dinga in inring a ni chun chu chu khel a nih.
5. "In um dan le thilthaw danhai in insiem tha takzet a, indik taka indawr tuo a,
6. hnam dang mihai, fahrahai le hmeithaihai poi tawk lo a, hi hmuna hin thisen in insuo naw a, in sietna ding pathien dang in zui naw phot chun,
7. hi ram, tiena tlanga inthoka in thlatuhai kuoma ka peka hin, kumkhuoin inchengtir ka ti cheu.
8. Sienkhom en ta u, khel thu, thu hmang lo chu in ringsan lem si.
9. "Ruk inruin, tuol thatin, uirein, pathien danghai hming sala inkhamin, Baal hmaah rimtui rawin, in hriet ngai lo pathienhai chu zui zing siin,
10. tu hin hi tempul, keima hming ngei chawitua hin in hung a, ka hmaah ngirin, 'Ei him tah ie!' in ti hin, hieng thil tirdakum po po hi thaw thei dinga him taa inngai in ni?
11. Hi tempul, ka hming chawitu hi suomhmang puka in ngai am a ni? Ka bithlak zing cheu a nih" ti hi LALPA thu suok a nih.
12. "Ka hming chengnaa ka hmang hmasak Siloa chun fe unla, ka mi Israelhai ritlona leia ka thilthaw chu va en ro.
13. Hieng thil in thaw zing pum khomin, kei chun ka la biek tawk tawk cheu a, sienkhom in mi ngaithlak naw a, ka ko cheu a, in mi don bok nawh, LALPA chun a tih.
14. Silo chunga ka thaw ang khan, hi tempul, ka hming chawitu, nangni le in thlahai kuoma ka hmun pek, in ringsan hlak chunga khom hin ka thaw ve ding a nih.
15. Efraim thla, in unauhai ka hnot suok vong ang khan, nangni khom ka kuoma inthokin hnot suok veng ka ti cheu, ti hi LALPA thu suok a nih.
16. "Chuleiin, hieng mihai hi hung tongtaipek naw la, an ta dingin ka kuomah dawvan hung kai naw la, hung hnipek naw bok rawh, ka ngaithlak naw ding che a ni leiin.
17. Judai ram khuoa hai le Jerusalem kotthlera an thilthawhai hi i hmu naw am a ni?
18. Naupanghan thing an fom a, pahaiin mei an sem a, nuhaiin bei tlang an hmet a, van lalnu kuoma inhlan dingin bei an siem a, pathien danghai kuomah dawn thilhlan uoiin an bun suok a, ka lungsen cho phawk dingin.
19. Kei hi a ni an cho phawk chu? Anni sietna ding le muolphona ding an thaw lem an naw maw?" ti hi LALPA thu suok a nih.
20. Chuleiin, Chunghnungtak Pathien chun hieng hin a tih: "Ngai ta u, hi hmun chunga dam, mihriem le sahai chunga dam, rama thing le hnuoia thei rahai chunga dam ka lungsenna le lung inlingna chu hrik thlang ka ta, kang a ta, mit naw nih" tiin.
21. Hi hi Iengkim LALPA, Israelhai Pathien chun a hril: "Fe unla, pumraw thilhlan chu inthawina pangngaiah bel sa unla, a sa khom chu fa law law ro.
22. Aiguptaa inthoka in thlatuhai ka hung thuoi suok khan, pumraw thilhlan le inthawina thilhlan chungchangah in thlatuhai kuomah ieng khom ka phut nawh.
23. Hi thu hi a nih ka pek lem chu: 'Ka thupek zawm unla, in Pathien ning ka ta, ka mihai ning in tih. Ka thupek ang taka in khawsa chun, in ta dingin thang a tih,' tiin.
24. Nisienlakhom, an ngaithlak naw a, an uksak bok nawh; chuong nek hmanin, an lungril tha naw tieng chu awnin tuklul an insuo a, hma tieng pan nekin an hnungtol ta lem a.
25. In thlatuhaiin Aigupta an suoksana inthoka voisun chen hin ka rongbawltu zawlneihai chu in kuomah ka tir ni tin hlak a.
26. Nisienlakhom, an ngaithlak naw a, an bengkhon bok nawh. Lululin ring an sukkhong a, an thlatuhai nekin thil tha lo an thaw nasa lem.
27. "Chun, hieng thu po po hi an kuomah hril la khom ngaithla naw ni hai che a, ko la khom don naw bok an ti che.
28. An kuomah hieng hin hril rawh: Hi hnam hin LALPA an Pathien thu an ngaithlak naw a, a keithuoina an zawm bok nawh. Thudik a bo ta a, an baua inthokin a suok ta nawh.
29. I sam tan la, peihawn rawh. Tlang sang kol vula chun lusun angin um rawh. Hi suonhai chunga hin kei LALPA hi ka lungsen a, peithlain ka hnungson tawl ta si a.
30. "Judai rama chenghai chun ka mithmuah thil suol an thaw a. Ka hming chawitu ina chun an thil tirdakum milemhai siein an sukporche a.
31. Meia an naupa le naunuhai rawna dingin Hinom Ruoma chun Tofet bawlhmunhai an siem a, chuong chu ka thupek a ni naw a, ka ngaituonaa khom a lut ngai nawh.
32. Chuleiin, fimkhur ro, nihai chu a hung tlung ding a ni tah, LALPA chun a tih. Chu pha chun mihaiin 'Tofet' amanih 'Hinom Ruom' ti ta loin 'Insamna Ruom' ti ta lem an tih, a ruoma phum seng naw khop Tofeta chun mithi ruong zal a tih.
33. Ruonghai chu chungleng vatehai le ram sahaiin tlan an ta, tu khomin hnot zam naw ni hai.
34. Judai rama khawpuihai le Jerusalem kotthlera hai chun lawmna le hlimna ri hrim hrim, mo le moneitu rawlhai khom sukre vong ka ta, rausan ram inchang tang a tih.

  Jeremiah (7/52)