Jeremiah (52/52)    

1. Zedekia a hung inlal chun kum sawmhni le kum khat mi a na, Jerusalemah kum sawm le kum khat a'n lal a. A nu hming chu Hamutal a na, Libna khuoa Jeremia naunu a nih.
2. Ama chun Jehoiakim thaw ang bokin thil suol a thaw a.
3. LALPA lung a sen em leiin hieng thilhai hi Jerusalem leh Judai ramah a hung tlung a, a tawpah a mithmua inthokin a pei suok a. Zedekia chu Babulon lal chunga chun a hung hel tah a nih.
4. Zedekia inlal kum kuona thla sawmna le ni sawmag chun Babulon lal Nebukadnezzar le a sipai ruol po po chu Jerusalem do dingin an hung inthok a, riebuk an khuor a, a velin kulin an inhuol khum a.
5. Lal Zedekia inlal kum sawmpakhatna chenin khawpui chu inhuolin an charchil a.
6. A kum sawmpakhatna thla lina ni kuonah chun khawpui chu an hung tam ta hle a, mipuiin fak ding ieng khom an nei ta nawh.
7. Chuongchun, khawpui kul bang chu an sut hong a, sipaihai po po chu an tlan suok a. Babulon mihai chun khuo chu inhuol vel vong hai sienkhom, lal huon bang pahni inkara lampuia chun zanah an inrel suok a, Araba lampuia chun an fe a.
8. Amiruokchu, Babulon sipaihai chun Zedekia chu an hnot zui a, Jeriko phaizawlah an zu nang a. A sipaihai chu an tlan dar vong a,
9. ama chu an man a, Hamat rama Ribla khuoa chun Babulon lal kuomah an thuoi a, ama chun a chungthu chu a rel a.
10. Babulon lal chun Zedekia naupa chu a mithmu ngeiah a that a, Riblaa chun Juda mi lienhai po po khom a that bok a.
11. Chu zoah Zedekia mit chu a khel dokpek a, dar kol a'n buntir a, Babulon tieng a thuoi a, chu taka chun a thi chenin lung inah a sie a.
12. Babulon lal Nebukadnezzar inlala inthoka kum sawm le kum kuona, thla ngana ni sawmi chun lal vengtu pawl kawmandar, Babulon lal hmaa ngir hlak, Nebuzaradan chu Jerusalemah a lut a.
13. LALPA tempul le lal in le Jerusalema in po po chu a raw a; Jerusalema in poimaw taphot chu hla a nei nawh.
14. Babulon lal vengtu pawl sipai kawmandar hnuoia sipaihai chun Jerusalem kul bang chu an sukchim vong a.
15. Vengtu pawl kawmandar Nebuzaradan chun mipuihai laia mi rethei tak tak, khawpuia an maksanhai, a hmaa Babulon lal kuoma lo inpe tahai le themthiem la um sunhai chu salah a thuoi vong a.
16. Sienkhom, a rama mi rethei mongtol thenkhat ruok chu grep huon enkoltu ding le loa sinthaw dingin Nebuzaradan chun a maksan a.
17. LALPA tempula dar banhai le dar tuizeng inthutnahai chu a vuok chim a, a darhai chu Babulon tieng a hawn vong a.
18. Tempula an hmang bur le belhai, vutluohai, khawnvar phita chep ruolnahai, maihunhai, thleng le dar hmangruo po po, tempula rongbawlnaa an hmang hlakhai chu a lak vong a.
19. Chun, maihun hai, mei lakna berbu hai, thil thena maihunte hai, bel hai, khawnvar siena hai, dawn ding inhlan changa hmang hlak thleng le thlengkum, rangkachak le tangruoa siem po po chu kawmandar chun a lak vong a.
20. Dar ban pahnihai le dar tuizeng le a thut, son thei le dara siem bawngchal lim sawmpahni, Solomonin LALPA tempula dinga a'n siemtir rikzie chu buk zo ruol a ni nawh.
21. Ban pakhat insangzie chu meter riet, a lienzie meter nga le centimeter li vel tuok a na, a sa zawng chu centimeter riet a na, a lai chu a kawrong a.
22. A ban hmawra dar lu bawk chu meter khat le centimeter thuma insang a na, a lu bawk vel tuoka chun dara mawi taka siem theibufai lim a'n tlar suok a, dar ban pakhat dang, chuong ang boka theibufai lim chuongna chu, inang chara siema nih.
23. Chun, a panga chun theibufai lim sawmkuo paruk a um a, a vela cheimawina theibufai lim um zat chu zakhat a nih.
24. Kawmandar Nebuzaradan chun thiempu lal Seraia le a dota mi thiempu Zefania le kotkhar vengtu pathumhai chu a man a.
25. Khawpuia la um sipai hotu hai, lal khawnbawl mi pasari, a rama sipai latu lu tak le a mihai sawmruk, khawpuia la umhai chu a thuoi tawl bok a.
26. Kawmandar Nebuzaradan chun anni chu Riblaa um Babulon lal kuoma chun a thuoi a.
27. Hamat ram Riblaa chun Babulon lal chun anni chu a'n thattir a. Chuongchun, Juda hnam chu an rama inthokin sala thuoiin an um ta a.
28. Nebukadnezzarin sala a thuoihai chu: a kum sarinaahj Juda mi sangthum le sawmhni le pathum an na;
29. Nebukadnezzar kum sawm le kum riet a'n lal kumah,k Jerusalem mi zariet le sawmthum le pahnih an na;
30. kum sawmhni le kum thum a'n lal kuml a lal vengtu pawl kawmandar Nebuzaradan-in a hung thuoi po Juda mi zasari le sawmli le panga an na, an rengin sangli le zaruk an nih.
31. Sala Juda lal Jehoiachin kum sawmthum le kum sari a'n tang kum, Babulon lal Evil-Merodakm inlala inthoka kum khatnaa chun Juda lal Jehoiachin chu saltangnaa inthokin Babulon lal chun a'n suo ta a.
32. Jehoiachin chu hoihawm takin a biek a, a kuoma um ve lal danghai neka insang lemah a sie a.
33. Chuongchun a saltangna zakuo chu hlipin, a dam sung hun po lal dawkanah fain a dawn ve ta a.
34. A thi chena ama inphuhrukna dingin Babulon lal chun Jehoiachin chu sum le pai a pek thlar bok a nih.

  Jeremiah (52/52)