←  Jeremiah (49/52)  →

---

1.

Amon chungthua chun LALPAN hieng ang hin a hril:"Israelin nau a nei naw maw?Rohluotu ding a nei naw a ni?Iengti leia Gad-hai ram chu,Molekinb a chang am a na?Ieng leia a mihaiin,An khuohai an hluo am a na?

2.

Sienkhom indona rihai,Amon khawpui Raba-ahAn hriet hun la tlung a ta,A khuo tlu ram vong a ta,A sevel khuohai khom chu,A rengin raw fai an tih.Ama hnot suoktuhai chu,Israelin hnot suok a tih"Ti hi LALPA thu suok a nih.

3.

Aw Hesbon, tap rak rak rawh,Ai khuo suksiet a ni ta si a!Nangni Raba khaw mihai,Inring takin tap rak rak ro!Saiip silin sun unla,Kul sungah tlan vel ruoi ro,Molek le a thiempuhai,A rongbawltu po po leh,Salah an thuoi ding a ni si.

4.

Aw naunu ringumlonu,Ieng leia i phairuom thahai,I suong bek bek am a na?I hausaknahai chu suongin,'Tuin am a mi bei ngam ding?'Tiin i tong hlak a ni kha.

5.

I vel tina inthokin,I chungah thlabarnahai,Ka hung intlun ding a nih.Hnot hmang vong an ti cheu a,Tlansehai huikhawmtu ding,Tu khom um ta naw ni hai"Lalpa, Iengkim LALPAN a tih.

6.

Nisienlakhom chu hnungah,Amon thlahai vangneina chu,Ka tungding nawk ding a nih'Ti hi LALPA thu suok a nih.

7.

Edom chungthua chun Iengkim LALPA chun hieng hin a hril:Teman-ahc mi var hrim hrim,An um der ta naw a ni?Thurawn pe theitu rem hrie,An bo der el am an ta?An varna a thing zo maw?

8.

Nangni Dedana chenghai,Ngha kirin tlansie unla,Puk rilah inbi hmang ro,Esau ka hrem huna chun,Sietna hung intlun ka tih.

9.

Grep lotuhai an hung pha,Hla tawk an nei naw ding maw?Zanah rukru an hungin,An dit bak an lak hlak maw?

10.

Kei chun Edom innam ka ta,A'n bikna hai lang ka ta,Inbi hmang thei ta naw nih.A nauhai le laichinhai,A tuolbawmhai bo an ta,Hmu ding hrim um ta naw nih.

11.

I fahrahai chu maksan la,Keiman lo hum him ka tih;I hmeithaihai chen khomin,Kei hi mi ring raw hai se."

12.

LALPA chun hieng hin a tih: No chu a dawn naw dinghai hman an indawntir si chun, hrem lo topin i suok thei ding am a ni? Hrem loin suok naw top i tih, no chu i dawn ngei ding a nih.

13.

Bozra chu tlu ramin, mi pangzat, diriem le tongsie inphur huoi huoi hung ning a ta, a khuohai chu kumkhuoin tlu ram a tih" ti hi LALPA thu suok chu a nih.

14.

LALPA thucha ka hriethai chu:Hnam tinhai kuomah hi thu hi,Hril dingin palai an tir a:"Pung khawm unla, bei ro,Indo puongin khek suok ro!" tiin

15.

"Ngaita, nang chu hnamhai lai,Ka sukchin ding che a na,Mihai endong ning i tih.

16.

I'n sukparapnahai kha,Lungrila i chaponain,A dawi vet lei che a nih.Aw nang rawl lung kara cheng,Tlang sipa umhmun khuortu,Mupui bu sepna angaInsangah bu sep la khom,Chu hmun sanga inthok chun,Hnuk thla tho tho ka ti che,"Ti hi LALPA thu suok a nih.

17.

"Edom chu pangzat an ta,Mi inlon vel taphotin,A hliemnahai chu hmuin,Maktiin nuisawng an tih.

18.

Sodom le Gomorra khuo leAn kawl vela khuo po po,Suksieta a um ang khan,Tu khom cheng ta naw ni a,Tu khomin hluo ta naw nih,"Ti hi LALPA thu suok a nih.

19.

Jordan ram pik a'nthok a,Ran tlatna hmun phulzawlaSakeibaknei hung angin,Ama rama inthokin,Edom chu hnot thlur ka ta,A chunga thuneitu ding,Ka nuom taphot ruot ka tih.Keima ang tu'm an um a?Mi cho thei ding tu'm an um?Berampu tu am mi kal thei?

20.

Edom chunga thaw dingaLALPA ruot chu ngaithla ro,Teman mihai chunga a ruot khom.An ran tehruoi fen hmang an ta,Anni leiin ran tlatnahai,A rengin suksieng a tih.

21.

An tluksiet ri a hriet pha,Hnuoi inthin dur dur a ta,An beidong khek thangkhawk chun,Tuipui Sen ruom khawk a tih.

22.

En ta, mupui vuong tung khi,A hung bir thla ding a na,Bozra chungah thla zar a ta,Chu ni a hung tlung pha chun,Moab mihranghai lungril chu,Nuhmei nau hase lai angin,Thlaphangnain sip a tih.

23.

Damaska chungthua chun:"Hamat le Arpad an chi-ai,Thu tha lo an hriet leiin.An lungril a zam hle a,Tuifawn insawk zing angin,An lungril a chawmchawrok.

24.

Damaska chu zoi thlain,Tlan hmang di'n a'n singsa a,Thlabarnan a man khong a,Nuhmei nau hase angin,Lungngaina tuorin a'n kon.

25.

Khaw inlar le hlim thei chu,Rausanin a lo um tah.

26.

Chu taka thalaihai chu,Kotthlerah tlu phung an ta,A sipaihai chimit an tih,"Iengkim LALPA chun a tih.

27.

"Damaska kul chu rawng ka ta,Ben-Hadad kulpui chu kang hmang a tih."

28.

Kedarhai le Hazor ramhai Babulon lal Nebukadnezzarin a hung bei ding thua LALPA thu suok chu:"Tho unla, Kedar hai bei unla,Khawsak mihai chu nuoi bo ro.

29.

An puon in le ran ruolhai,An puonzar le hmangruohai,Iengkim lakpek vong unla,An sanghawngseihai hawn ro."Sir tinah titnan a'n huol cheu"Tiin mihan khek khum an tih.

30.

"Nangni Hazora chenghai,Inhmaw takin tlan hmang ro!Puk rila hai chun inbi hmang ro.Babulon lal Nebukadnezzar chun,Do ding che'n thu a phierruk a,Suksiet a tum che a nih"Ti hi LALPA thu suok a nih.

31.

"Nuoma ngai sukngam ringot,Kul le kotkhar khom nei lo,Kot kalna tluon khom nei lo,Thlalera khawsahai chu,Tho unla, va bei tawl ro,"Ti hi LALPA thu suok a nih.

32.

"An sabengtung ruolhai leAn ran ruolhai po po chu,Ralin lakpek vong an ta,Lu ziet kawng hlak hnamhai chu,Thli angin len dar ka ta,Kil tin a'nthokin sietna,An chungah bun thlang ka tih,"Ti hi LALPA thu suok a nih.

33.

"Hazor chu sihal ruolhai,Cheng khawmna hmun ning a ta,Rausan hmun ni kumkhuoin,Tu khom cheng ta naw ni a,Tu khomin hluo ta naw nih."

34.

Juda lal Zedekia inlal tan tira Elam chungthua LALPA thu, zawlnei Jeremia kuoma hung tlung chu:

35.

LALPA Iengkimthawthei chun hieng hin a tih:"En ta, Elamhai suongtawlol tak,An thalngul ul tliek ka tih.

36.

Kawl kil lia inthokin,Thli thuong li hung tir ka ta,Elam chungah hrang a ta,Thli thuong li chun len dar a ta,A len dar nawna hnam le,An tlan dar nawna hmun hrim,Khaw lai hmun khom um naw nih.

37.

That tuma anni zongtu,An hmelmahai hmaa chun,Anni chu vaw dar ka ta,An chungah sietna buok ka tih,Ka lungsenna inling ngei chu;Ka sukchimit vong hma khat,Kawlhnamin hnot thlur ka tih.

38.

An lal le hotuhai suksein,Elama chun ka lalthungpha,Ka hung innghat ding a nih,"Ti hi LALPA thu suok a nih.

39.

"Sienkhom Elam vangneina,Ka tungdingpek nawk hun chu,A la hung tlung ding a nih,"Ti hi LALPA thu suok a nih.

---

←  Jeremiah (49/52)  →