←  Jeremiah (46/52)  →
1. Hnamhai chungchang thua zawlnei Jeremia kuoma LALPA thu hung tlung chu hi hi a nih:
2. Aigupta chungchang thu: Juda lal Josia naupa Jehoiakim inlala inthoka a kum linaa Eufretis vadung kama khuo Karkhemis hmunax Babulon lal Nebukadnezzarin Aigupta lal Faraw Neko sipaihai a hne chungchang thua chun:
3. "Phaw chin le lienhai chawiin,Hma tieng norin ral tawn ro!
4. In sakorhai buotsai unla,Sakor chungah chuong unla,In thir lukhum khum unla,Mani hmun sengah inring ro!In feihai kha tat ngei unla,In thir zakuohai kha hak ro.
5. Iem a na ka thil hmu hi?An thlabar tawl hle a ni saw!An pasalthahai an tlawm a,Tukkhum sonin an zam sie!Bak lengin an tlansie a,Hnung tieng ngha kir an um nawh,Sir tinah titna a hrang si"Ti hi LALPA thu suok a nih.
6. "Tuon tha an tlanse hman nawh,Ralhrathai an suok thei bok nawh.Eufretis vadung hmar tieng chun,An inpal tlu rem rum el a.
7. Nile anga hung lien hi tu am?Tuifawn sang anga hung lien hi?
8. Nile angin Aigupta a hung lien,Tuipui lien insang ang elin;"Hnuoi hi chim khum vong ka ta,Khawpuihai le a hluotuhai,Chim hlum vong ka tih" a tih.
9. Aw sakorhai, hma tawn ro!Aw tawlailirhai, tlan hrat ro,Ethiopia le Libya mihai chu,Phaw chawiin an hung inthok a,Thalkaptu chu Lydiay mihai an nih.
10. Sienkhom chu chu LALPA ni,Iengkim LALPA ni,Phuba a lakna ni a ni si a.Hmelma chungah phuba lain,Kawlhnam chun mawl rak khopin,Thisen liek ngat ngat a ta,Thisen inrui bur a tih.Lalpa, Iengkim LALPA chun,Hmar tieng Eufretis vela chun,Inthawina a hmang ding a nih.
11. Aw Aigupta naunu thienglam,Gilead tlangah hang kai la,Thing hnai damdawi hang la rawh;Damdawi i seng thlawn rawn tah,Sienkhom i dam pha si nawh.
12. I muolphona rihau chu,Hnam tinin hung hrieng an ta,I tap ri'n hnuoi sip a tih.Ral hrat ve ve insut an ta,An pahniin tlu ruol an tih" tiin.
13. Babulon lal Nebukadnezzar hung ding thu le Aigupta a run ding thua LALPAN zawlnei Jeremia kuoma a hril chu:
14. Aigupta ramah puong dar unla,Migdol-ah tlang insam unla,Memfis le Tahpanhes-ah puong ro:Thanghmun khawin inralring ro,In vela mihai po po hlak chu,Kawlhnamin a lem zo ta si.
15. Ieng leia i mi huoisenhai,An che ngam naw am a na?LALPAN a nam tlum tawl a,Ngir suok ngam ding an ni nawh.
16. An sir inphet zing a ta,Indel tlu rem rum an tih."Neksawrtu kawlhnam tlansanin,Ei pieng le murna ramah,Thaw ro, fe kir nawk ei tiu"Tiin inhril tuong an tih.
17. "Aigupta lal Faraw hin,A ri chauh a sukna a,A huna hlak hung inlang si lo"Tiin makti tawl an tih.
18. "Ka hringna salin ka hril:Tlang laia Tabor tlang ang el,Tuipui bula Karmel tlang ang,Mi lien a hung ding a nih"Tiin Laltak chun a hril,A hming Iengkim LALPA chun.
19. Nangni Aiguptaa chenghai,Saltang dingin insiem ro;Memfis chu la rausan an ta,Hluotu boin tlu ram a tih.
20. Aigupta chu bawng la nal a na,Sienkhom hmar tienga inthokin,A setu ding tlip a hung.
21. A sipai ruoi khawmhai chu,Bawng tuoi thau ang el an na;Sienkhom thanghmun khaw loin,Anni khom tlansieng an tih,An chungah sietna ni leHremna ni a tlung pha chun.
22. Hmelmahan an hung hnai pha,Rulpui tlansie ang elin,Aigupta chu insuk a ta,Hreipui leh hung inthok an ta,Thing angin phur thlung an tih.
23. Ieng anga pik ni sien khom,A ramngaw chu thiek an tih,Ti hi LALPA thu suok a nih.Khau ruol neka tam an na,Tiem seng ruol an ni nawh.
24. Aigupta naunu muolpho a ta,Hmar tieng mihai kutah peng an tih."
25. Iengkim LALPA, Israel Pathien chun hieng hin a tih: "Ngai ta u, Thebes-a Amonhai pathien hai, Faraw hai, Aiguptaa an pathienhai le an lalhai le Farawa innghattu po pohai chungah hremna ka hung intlungtir ding a nih.
26. Anni that tuma zongtuhai le Babulon lal Nebukadnezzar le a rongbawltuhai kutah pe suok ka tih. Amiruokchu, a hnungin Aigupta ram chu kha hma ang bok khan hluoin hung um nawk a tih" ti hi LALPA thu suok a nih.
27. Aw, ka siehlaw Jakob, ti naw,Aw Israel, zam der naw rawh.Ram hla taka inthok khomin,San suok ngei ka ti che a,Saltangnaa inthokin,I thlahai san suok ka tih. Tu khom sukbuoi ta loin, Him tak le thlamuong takin,Jakob chu la um a tih.
28. Aw, ka siehlaw Jakob, ti naw,I kuomah ka um si a. Ka hnot darna cheu hnamhai,Ka suksiet vong khom ni sien,Sukse vong nawng ka ti cheu.Hrem chu hrem ka ti cheu a,Indik takin thawng ka tih,Hremna pumpel naw ti niu"Ti hi LALPA thu suok a nih.
←  Jeremiah (46/52)  →