←  Jeremiah (44/52)  →
1. Aigupta chuonhnuoia khuo Migdol hai, Tahpanhes hai le Memfis hai le Aigupta chuonchung a Juda chenghai po po chungthua Jeremia kuoma thu hung tlung chu:
2. Iengkim LALPA, Israel Pathien chun hieng hin a tih: 'Jerusalem le Juda khawpui po po chunga sietna ka hung intlun tahai chu in hmu a, an thil suol thaw leiin chuonghai chu tuhin an ram ta vong a, hluotu an um ta nawh.
3. Ka lungsenna chok tho dinga anni khomin, nangni khomin, in thlatuhai khomin in hriet ngai lo pathien danghai rong bawl a, an kuomah rimtui an inhlan lei a nih.
4. Chuong sa khom chun keiman, 'Hieng thil tirdakum, ka theida zawng hi chu thaw lul naw ro' ti hril dingin ka rongbawltu zawlneihai ka hung tir ka hung tir a.
5. Sienkhom, an ritlona chu nghatsan a, pathien danghai kuoma rimtui inhlan lo dinga ka hril chu an ngaithlak nuom chuong nawh.
6. Chuleiin ka lungsenna le lung inlingna chu an chungah ka bun thlak a, Judai ram khawpuihai le Jerusalem kotthlerhai chu a kang a, voisun hin an ram der a, rausanin an um tah a nih.
7. "Chuleiin, tu hin LALPA, Iengkim Pathien, Israel Pathien chun hieng hin a tih: Nangni laia a nuhmei a pasal, naupang le naute chen khom hla um der loa rawt chimit vong tum ang hrimin ieng leia hieng thil suol hi in hringna chungah in thaw am a na?
8. In va chengna Aigupta pathienhai kuomah rimtui rawin, in kuta siem thil ngei chun ieng leia lungsen dinga in mi cho phawk am a na? Nangni le nangni insuksieng in ta, hnuoia hnam tin tongsie phurin, mi biek sisaw hung ning in tih.
9. In thlatuhai, Juda lalhai le lalnuhai, nangni le in nuhmeihaiin Judai ram le Jerusalem kotthlera ritlona thil in thaw zozaihai kha in theinghil ta'm a ni?
10. Voisun ni chen hin inpha hnuoiin in mi la'n za chuong naw a, in thlatuhai le nangni kuoma ka pek, ka dan le thu suokhai chu in la zawm chuong bok nawh.
11. "Chuleiin, Iengkim LALPA, Israel Pathien chun hieng hin a tih: 'Ngai ro, in chungah sietna hung intlungtir ding le Judahai po po rawt chimit vong dingin lungril ka siem tah a nih.
12. Juda mi la um sun, Aigupta rama cheng lui tumhai chu la hmang tawl ka tih. An rengin Aigupta ramah bohmang an ta, kawlhnam an naw leh tamin bohmang an tih. A nih, a chin taka inthoka a lien tak chenin kawlhnam an naw leh tamin thing an tih. Mihaiin tongsie inphurin pangzat an ta, demin hril sieng an tih.
13. Jerusalem ka hrem ang bokin Aigupta rama chenghai chu kawlhnam le tam le hripuiin ka hrem ding a nih.
14. Chuongchun, Aigupta rama cheng dinga fe Juda la um sunhai chun Judai rama kir nawk nuom em em hai sien khom, a ruka inrel suok tihai chauh naw chu, tu khom kir dinga dam khawsuok um naw ni hai.
15. Chuongchun, pasal po po, an nuhmeihaiin pathien danghai kuomah rimtui an inhlan ti hretuhai le chu taka um nuhmeihai le mipui tam tak, Aigupta chuonhnuoi le chuonchunga um hai chun Jeremia kuomah,
16. "LALPA hminga kan kuoma thu i hrilhai hi ngaithla nawng kan tih.
17. Keini le kan thlatuhai, kan lalhai le kan hotuhaiin Judai ram khawpuia le Jerusalem kotthlera hai an lo thaw ta hlak ang khan van lalnu kuomah rimtui rawin, a kuomah dawn ding uoiin bun suok kan ta, kan hril ang char khan thawng kan tih. Khang lai huna khan fak le dawn thilah kan hnienghnar a, kan tha a, sietna hrim kan hriet nawh.
18. Amiruokchu, van lalnu kuomah rimtui raw lo a, dawn thil kan inhlan ta nawa inthokin iengkim kan tlasam a, kawlhnam le tama sukbohmangin kan um ta lem a nih" an ta.
19. Chun, nuhmei ruol chun, "Van lalnu kuomah rimtui raw a, dawn ding kan bun suok lai khan, ama limin bei dam siemin, a kuomah dawn thil kan bun suok hlak ti kan pasalhaiin an hriet nawa i ngai am a ni?" an lo ti ve a.
20. Jeremia chun ama dontu po po, nuhmeihai le pasalhai kuomah,
21. "Judai ram khawpuia hai le Jerusalem kotthlera hai, nangni le in thlatuhai, in lalhai le hotuhai le a ram mipuihaiin rimtui an rawhai chu LALPAN hre zingin, a lungrilah a pai zing naw am a ni?
22. Thil suol le tirdakum in thawhai chu LALPAN a tuor zo ta naw a, in ram chu mi diriem le rausan hung niin, hluotu khom a nei ta naw a ni hi.
23. Rimtui in raw a, LALPA chungah in suol a, LALPA thu awi nuom loin, a dan hai, thupek hai le bitukhai in zawm nuom naw leiin tuta in hmu zing sietna hi in chungah a hung tlung a nih" a ta.
24. Chu bakah mi po po le nuhmeihai hrietah Jeremia chun, "Nangni Juda mi Aiguptaa chenghai, LALPA thu hi lo ngaithla ro.
25. Iengkim LALPA, Israel Pathien chun hieng hin a tih: Van lalnu kuoma rimtui raw le dawn thil bun suok dinga in lo intiem tah ang ngeiin nangni le in nuhmeihaiin a takin, thilthawin in inentir tah a. In thu tiem ang ngei chun thaw mol ro! In thu inkhamna chu vong tlat ro!
26. Amiruokchu, nangni Aigupta rama um Juda mihai, LALPA thu hi ngaithla ro. Kei LALPA Chunghnung tak hin ka hming ropui tak salin thu ka'n tiemkam a, Aigupta rama cheng Juda mi tu khomin, 'Iengkim LALPA hringna salin' tiin ka hming hmangin thu intiemkam ta naw ni hai ti hi LALPA thu suok a nih.
27. Ngai ro, an thatna ding ni loin an sietna dingin inchan zing tawl ka ta; suksiet vong an ni chenin Aigupta rama Judahai chu kawlhnam le tamin rawt ka tih.
28. Kawlhnama sukhlum mahla tlawmte chu Aigupta rama inthoka suokin Judai ramah lut an ta; chu pha chun Juda dang po po, Aiguptaa cheng dinga luthai chun tu thu am a dingchang lem, anni thu am ka thu, ti la hrieng an tih.
29. "Chun, ka thu chu ngirin, ka lo zilhau tah cheu anga hi hmuna hin ka hrem ngei dingzie cheu inchikna chu hi hi ning a tih:
30. Faraw Hofra,w Aigupta lal chu a hmelma, a hringna lak tuma zongtu Babulon lal Nebukadnezzar kutah Juda lal Zedekia ka pek ang bok khan pe suok ka tih' ti hi LALPA thu suok a nih" a ta.
←  Jeremiah (44/52)  →