←  Jeremiah (43/52)  →
1. LALPAN mipuihai kuoma LALPA an Pathien thuhai hril dinga Jeremia a tir anga a hril zo chun,
2. Hosaia naupa Azaria le Karea naupa Johanan le mi uongthuong po pohai chun Jeremia kuomah, "Nang hin khel i hril a nih. LALPA kan Pathien chun, 'Aigupta rama cheng dingin fe naw ro' ti hril dingin a tir hrep naw che.
3. Babulon mihai mi'n mantir a, an mi that amanih sala an mi thuoi theina dinga Neria naupa Barukin a hung infui por che a ni lem hi" an ta.
4. Chuongchun, Karea naupa Johanan le sipai pawl hotuhai le mipuihai chun Judai rama um zing dinga LALPA hril chu an awi nuom ta naw a.
5. Awi nek hmanin Karea naupa Johanan le sipai pawl hotuhai chun Juda la um sunhai, hnam danghai laia hnot dara um, sienkhom Judai rama cheng nawk dinga hung kirhai po po chu an thuoi a.
6. Babulon lal vengtu kawmandar Nebuzaradanin Safan naupa Ahikam naupa Gedalia le zawlnei Jeremia le Neria naupa Baruk hai kuoma mi a maksan, pasal le nu le nauhai le lal naunuhai po po chu an thuoi vong bok a.
7. Chuongchun, LALPA thu chu awi loin Aigupta rama chun an fe a, Tahpanhes khuo chen an zu tlung a.
8. Tahpanhes khuoa an um lai chun Jeremia kuomah LALPA thu a hung tlung a.
9. "Lung lien tak tak la khawm la, Tahpanhes-a Faraw in lutna kotsuoa lung rem kailawn sira chun pil hnakah Judahai mithmu lai ngeiin phum rawh.
10. Chun, an kuomah, "Israel Pathien, Iengkim LALPA chun hieng hin a tih: 'Ngai rawh, ka rongbawltu Babulon lal Nebukadnezzar chu incha suok ka ta, hieng lung phumhai chunga hin a lalthungpha chu innghat ka ta, a lal puon in zar khum a tih.
11. Ama chu hung a ta, Aigupta ram hung run a ta, thi dinga ruothai chungah thina, sala intang dinghai chungah saltangna, kawlhnama thi dinghai chunga kawlhnama thina hung intlun a tih.
12. Aigupta rama an pathien tempulhai chu rawng a ta, kang a ta, an pathienhai chu salah hawn a tih. Berampuin a silfena inthoka thil hrik a thin fai angin Aigupta ram chu thin fai vong a ta, ngaingam takin suoksan a tih.
13. Aigupta ram Heliopolis-a an nisa pathien tempula lung ban insanghai chu sukchim a ta, tempula Aigupta pathienhai chu meiin rawng a tih' ti rawh" a ta.
←  Jeremiah (43/52)  →