←  Jeremiah (42/52)  →
1. Chun, sipai pawl hotuhai le Karea naupa Johanan le Hosaia naupa Jezania le mipui po po, a chin taka inthoka a lien tak chenin zawlnei Jeremia chu an hung hnai a, a kuomah,
2. "I hmaa kan hnina hi lo pom la, hieng la dam sunhai po po ta ding hin LALPA i Pathien kuomah mi tongtaipek dingin kan ngen che a nih. I mi hmu ang hin, mi tam tak ni hlak kha tlawmte chauh hlain kan um ta hi.
3. Khaw tieng am kan pan ding a na, ieng am kan thaw ding a na ti mi hril dingin LALPA i Pathien kuoma chun mi hnipek rawh" an ta.
4. Zawlnei Jeremia chun, "In thu chu ka hriet. In hni angin LALPA Pathien kuoma chun tongtai mol ka tih. LALPAN a mi hril po pohai chu ip nei der loin hril vong ka ti cheu" a ta.
5. Anni chun Jeremia kuomah, "LALPA i Pathienin kan ta dinga thu a hril che ang peia kan thaw naw chun LALPA chu kan lakah thu hretu indik le ringum ni raw se.
6. Kan tirna che LALPA thu chu a sie a tha khom ni sien, LALPA kan Pathien thu chu awi ngei ngei kan tih; a thu awi chu kan ta dinga thatna ding a ni si a" an ta.
7. Ni sawm hnunga chun LALPA thu chu Jeremia kuomah a hung tlung a.
8. Chuongchun, Karea naupa Johanan le a kuoma um sipai pawl hotu po po le mipui, a chin taka inthoka a lien tak chenin, a ko khawm a.
9. An kuomah, "LALPA in Pathien, a hmaa in hnina intlun dinga in mi tirna khan hieng hin a tih:
10. Hi rama hin in um zing chun thiek loin tungding ka ti cheu a, phawi loin phun ka ti cheu; in chunga sietna ka'n tlungtir hin poi ka ti ve a nih.
11. Tuta in ti em em Babulon lal hi ti der naw ro. Ama chu ti naw ro, keima in kuomah ka um a, keiin a kuta inthokin san suok ka ti cheu.
12. In chungah zangaina insuo a, in ramah a'n kirtir nawk theina ding cheuin in chungah zangaina inentir ka tih' ti hi LALPA thu suok a nih.
13. "Amiruokchu, 'Hi rama hin um nawng kan tih' tia LALPA in Pathien rawl chu poisa loa in um a,
14. A teu nawh. Aigupta ramah fe lem kan tih. Chu taka chun indona tuok tah nawng kan ta, tawtawrawt ri hre tah naw bok kan ta, tam tuor khom um tah naw nih' in ti a ni ruok chun,
15. Aw Juda la um sunhai, LALPA thu chu hre ro khai, Iengkim LALPA, Israel Pathien chun hieng hin a tih: 'Aigupta rama lut ding le chu taka cheng dinga in ngha lui tlat a ni chun,
16. in ti ang ngeiin kawlhnamin Aigupta rama chun nangching a ti cheu a, in ti ang ngeiin tamin hnot zui pei bok a ti cheu a, chu taka chun thing in tih.
17. Aigupta rama cheng dinga ngha lui tlat po po chu chuong ang chun kawlhnam le tam le hripuiin thing an ta, an chunga sietna ka'n tlungtir ding laka chun tu khom himin suok naw ni hai.
18. "Iengkim LALPA, Israel Pathien chun hieng hin a tih: Jerusalema chenghai chunga ka lungsenna ka bun thlak ang bokin Aigupta rama in lut pha chun in chungah ka lungsenna bun thlang ka ta, tongse phur le mi makti huoi huoi, mi biek sisaw le hril siet ning in ta, hi hmun hi hmu nawk ta ngai naw ti niu.
19. Aw Juda la um sunhai, LALPA chun in chungthu ding a hril ta a, Aiguptaa chun lut naw ro. Voisuna chieng taka ka hril cheu hi hre mol ro.
20. LALPA kan Pathien kuomah mi tongtaipek la, LALPA kan Pathienin a ti taphot mi hril la, zawm pei kan tih' tia LALPA in Pathien kuoma in mi tir a ni leiin in thina ding thil chu thaw lul naw ro.
21. Voisuna in kuoma ka puong, LALPA in Pathien mi hril thu chu in awi nuom chuong si naw hi!
22. Chuongchun, hi hi hre ro: in cheng nuomna hmuna chun kawlhnam le tam le hripuiin thi ngei in tih" a ta.
←  Jeremiah (42/52)  →