←  Jeremiah (40/52)  →
1. Lal vengtu sipai kawmandar Nebuzaradanin Rama khuoa Jeremia a'n suo hnung chun LALPA thu chu Jeremia kuomah a hung tlung a. A'n suo hma chun Jeremia chu Judai ram le Jerusalema um hai, Babulon tienga sala an thuoi mekhai lai chun khaidiet bunin a lo um ve a.
2. Vengtu kawmandarin Jeremia a hmu chun a kuomah, "LALPA i Pathien chun hi hmuna sietna hung tlung ding hi a lo puong tah a.
3. Tu hin LALPA chun a hung intlungtir ta a, thaw dinga a hril ang takin a thaw ta ngei a. Hieng po po hi a hung tlungna san chu LALPA thu zawm loa a lakah an suol lei a nih.
4. Nisienlakhom, nang chu voisuna inthok hin i khaidiet bun chu ka sutpek che a, Babulon tieng ka kuoma hung i nuom leh hung la, lo enkol ka ti che a, i nuom naw leh i nuomna tieng tieng fe la, ram po po i hmaah a'n zar duoi hih.
5. I nuom leh Babulon lalin Juda khuohai optu dinga a sie Safan naupa Ahikam naupa Gedalia kuomah kir la, an naw leh fe i nuomna tieng tieng fe rawh" a ta.
6. Vengtu kawmandar chun fak ding le thilpek a pek a, a'n fetir ta a. Jeremia chu Ahikam naupa Gedalia kuomah Mizpa khuoa chun a fe a, a kuoma chun a rama mi la um sunhai lai a um ve ta a.
7. Chun, ram hnuoia um sipai hotuhai po po le an rawihaiin Ahikam naupa Gedalia chu ram optu ding le a rama mi rethei tak tak, sala thuoi ve lohai enkoltu dingin Babulon lalin a ruot ti an hriet phing leh,
8. Gidelia kuomah Mizpaa chun an hung a, chuonghai chu Nethania naupa Ismael hai, Karea naupa Johanan le Jonathan hai, Tanhumet naupa Seraia hai, Netofat mi Efai naupa hai, Makat naupa Jaazania hai le an mihai an nih.
9. Safan naupa Ahikam naupa Gedalia chun anni le an mihai kuomah, "Babulon mihai rongbawla um hi ti naw ro. Hi rama hin um inla, Babulon lal rong bawl unla, in ta dingin thang a tih.
10. Kei ruok chu nangni aiawa Babulon mihai hmaa ngir dingin Mizpa khuoa hin um ka ta, nangni ruok chun uoiin hai, nipuia ra theihai le hriekhai chu la khawm unla, in belpuia hai chun sie khawm unla, khawpui in hluo tah haia chun cheng ro" tiin a lo hril a.
11. Chuong ang bokin, Moab rama chenghai, Amon mihai laia chenghai, Edom rama chenghai le ram danga Juda um haiin Babulon lalin Judai ramah mi tlawmte a maksan ti le roreltu dingin Safan naupa Ahikam naupa Gedalia chu a siem ti an hriet chun,
12. Judai ramah, Mizpa khuoa Gedalia kuoma chun an tlan darna hmun hrang hranga inthokin an hung kir a, uoiin le nipuia ra thei an hung chawipek teu a.
13. Chuonghai baka chun Karea naupa Johanan le sipai pawl hotu, rama umhai po po chu Mizpa khuoah Gedalia kuoma chun an hung a,
14. a kuomah, "Amon mihai lal Baalis chun i hringna la dingin Nethania naupa Ismael a hung tir ti i hriet naw a ni maw?" an ta. Ahikam naupa Gedalia ruok chun an thu hril chu a ring nawh.
15. Karea naupa Johanan chun arukin Mizpa khuoa Gedalia chu a'n biekpui a, "Arukin mi'n fetir la, Nethania naupa Ismael chu va that ka ta, chu chu tu khomin hre naw ni hai. Ieng leiin am ama chun i hringna lain, i kuoma um Juda mihai po po le Judai rama la um sunhai hi indarin an bohmang ding a na?" a ta.
16. Ahikam naupa Gedalia ruok chun Karea naupa Johanan kuomah, "Chuong thil chu thaw hrim hrim naw rawh! Ismael chungchang thu i hril hi khel a nih" a ta.
←  Jeremiah (40/52)  →