←  Jeremiah (4/52)  →

---

1.

"Aw Israel, i lamlet ding a ni chun,Keima tieng hung kir nawk rawh"Ti hi LALPA thu suok a nih."I milem tirdakumhai,Ka hmu loah sie hmang a,I pet hmang ta naw ding chun,

2.

Thudik lampui chu hraw a,Indik tak le fel taka,Nun hmang dinga i'n tiem chun,Hring zing LALPA hming salin,Hnamhai chu malsawm ka ta,Annin mi chawimawi an tih."

3.

Judai rama mihai le Jerusalem mihai kuomah LALPA chun hieng hin a hril:"In hnuoihai inlet unla,Hling lai thlai chi thlak naw ro.

4.

Nangni Juda mihai leJerusalema chenghai,LALPA-ah ser tan unla,In lungril ser chu tan ro.In tan nuom naw a ni chun,Ka lungsenna chok a ta,Kang hmat tawl rawi a ti cheu,Tu khom thel ruol ni naw nih.

5.

"Judai ramah hril unla,Jerusalemah puong ro:Ram pumah tawtawrawt mutin,'Inrengin hung tlan khawm unla,Kul nei khuoah tlan lut ei tiu',Tiin inring takin khek ro.

6.

Zion tieng pan dingin hril ro,Himna hmun zongin tlan nghal ro!Hmar tienga inthokin sietna,Ka hung intlungtir ding a nih,Sietna rapthlak tak el chu."

7.

A buzawla inthokin,Sakeibaknei a hung suok,Hnamhai suksetu ding chu;A umna a suoksan tah,In ram sukram vong dingin.In khuohai tlu ram a ta,Hluotu tu khom nei naw nih.

8.

Chuleiin, saiip silin,Tap le inrumin khek ro.LALPA lungsenna rapthlak chun,Ami la'n kiengsan si naw a.

9.

LALPA chun hieng hin a tih: "Chu ni chun, lal le hotuhai lungril zam a ta, thiempuhai chu thlabar an ta, zawlneihai pang inzang a tih.

10.

Chun, kei chun LALPA kuomah, "Aw Chunghnungtak LALPA, hieng mihai le Jerusalema mihai hi i hlem letder a ni hi! 'Thlamuong takin um in tih' i ti a, kan ring le kawlhnam an inmat ta si hi" ka ta.

11.

Chu pha chun hieng mihai le Jerusalem mihai kuomah, "Thlaler tlang fila inthokin ka mihai tieng thli lum tak a hrang a, sienkhom ka mihai zap fai ding le mut fai dinga hrang a ni nawh.

12.

Thli na tak chu keimaa inthokin hung a tih. Tuhin an chungthu hi keiin rel ka tih" ti thu inhriettir ning an tih.

13.

Ngai ta, sumpui angin a hung a,A tawlailirhai khom chu,Thawngaleivir ang a na,A sakor thuoihai khom chu,Mupui vuong nekin an hrat lem.Ei chung a va hang pik de aw!Ei se let der an ta hi!

14.

Aw, nang Jerusalem,Sandam i ni theina dingin,I lungril suol sawp fai rawh.Ieng chen am lungril rilo,I la put pei ding a na?

15.

Dan le Efraim tlangramah,I siet tuok ding an puong tah.

16.

I vela hnamhai hril la,Jerusalemah puong rawh:'Ram hla taka inthokin,Mi'n huoltu ding an hung a,Judai ram khuo po poah,Indona thu an puong a,

17.

Lo vengtuhai ang elin,Jerusalem an inhuol,Ka chungah an hel leiin'Tiin LALPA chun a hril.

18.

I nungchang le thilthawin,Hieng thilhai hi i chungah, A hung intlun a ni hi.Hi hi i hremna tuor chu a na,Na khom i ti em em a,I lung a sun tlang a ni hih.

19.

Aw a na ngei, aw a na ngei!Na ti taluo'n ka'n kon a.Aw, ka lung a va hang dong de!Ka lung an inthumhron a,Ka'n rum naw thei naw a nih.Tawtawrawt ri chu ka hriet,Indo ralkhel rihai chu.

20.

Sietna chungah sietna a tlung,A ram pumin a tlu hmat a,Ka chengna puon in ngei khom,Thawk-le-khatin a tlu ram tah.

21.

Ieng chen am indo hi hmuin,Tawtawrawt ri ka ngaithlak ding?

22.

"Ka mihai an invet zo a,Tu am ka nih an mi hriet nawh;Naupang invet ang an na,Hriet thiemna an nei tlat nawh.Thil suol thaw tieng an balam a,Thil tha thaw an thiem si nawh."

23.

Leihnuoi hi ka zuk en a,Ruongam bo le ruok a na,Vanah var hrim a um nawh.

24.

Tlanghai chu ka hei thlir a,An inthin dur dur el a,Muolhai chu an inthen a.

25.

Ka ngha vel a, mi an um nawh,Chungleng vate po po khom,An vuong hmang zo vong ta si.

26.

Ka hang ngha vel a, ngai ta,Lo hmun thahai po po chu,Thlaler an inchang vong a,LALPA lungsenna hmaah,Khuohai an tlu ram vong si.

27.

LALPA chun hieng hin a tih:"A ram pumin sieng a ta,Sienkhom sukram vong naw ning.

28.

Chuleiin, hnuoi ngui a ta,Van khom inthim khup a tih;Ka hril tah chu sut naw ning,Ka rel tah chu hlen ka tih.

29.

Sakor chungchuong mihai leThalngul chawituhai ri hrie'n,Khaw tina mi tlan sieng an tih.A then ram hnuoiah tlan lutin,A then lungpuiah kai an ta,Khuohai rausan vong an ta,Hluotu tu khom um nawh.

30.

Aw, nang mi roka um nu,Ieng am a na i thaw kha?Puon senlara inthuomin,Rangkachak incheinahai,Ieng leia i'n bel am a na?Ieng leia i mit dam kha,I nal dum vel am a na?Inchei la khom a sawt nawh.I tlangvalhan an hnawl ta che,I hringna a nih lak an tum.

31.

Nau lutir hring ding nuhmei,Nau hase tuor inrum anga,Zion naunu inrum ri ka hriet;A kuthai chu phar velin,"Ka chung a va pik de aw!Tuolthattu kutah ka nun,Pekin a um ta si a"Tia a khek lai ri chu.

---

←  Jeremiah (4/52)  →