←  Jeremiah (39/52)  →
1. Jerusalem lak a ni dan chu hieng ang hi a nih: Judai lal Zedekia inlala inthoka kum kuona thla sawmnaav chun Babulon lal Nebukadnezzar le a sipai po po chun Jerusalem an hung bei a, an inhuol a.
2. Zedekia inlal kum sawm le pakhatna, thla lina ni kuoa chun khawpui kul chu an sut tlang a.
3. Chuongchun, Babulon lal hnuoia hotu Samgar mi Nergal Sarezer hai, an hotu lu tak Nebo-Sarsekim hai, lal mi rawn tak Nergal-Sarezer hai le hotu dang tam tak an hung lut a, kotkhar lailung taka chun umhmun an rem a.
4. Juda lal Zedekia le a sipaihaiin an hmu chun an tlansie a, zana chun lal huon tienga kul bang pahni inkara lama chun an inrel a, Arabia panna tieng chun an suok a.
5. Amiruokchu, Babulon sipaihai chun an hnot a, Jeriko phaizawlah Zedekia chu an hnot phak a, an man a, Babulon lal Nebukadnezzar kuomah Hamat ram Ribla khuoa chun an thuoi a, ama chun a chungthu chu a lo rel a.
6. Riblaa chun Zedekia mithmu ngeiah a naupahai chu Babulon lal chun a that a, Juda mi tha tam tak a that bok a.
7. Chu zoah Zedekia mit chu a khel dokpek a, dar kol a'n buntir a, Babulon tieng a thuoi a.
8. Babulon mihai chun lal in le mi dang in po po chu an raw a, Jerusalem kul bang chu an sukchim vong a.
9. Lal vengtuhai kawmandar Nebuzaradan chun khawpuia mipui la umhai le a kuoma mania hung inpehai chu Babulon tieng salin a thuoi a.
10. A bang la um sun, mi rethei ruol ieng khom nei lohai chu Judai ramah Nebuzaradan chun a maksan a, grep -huon le lohai a pek tawl a.
11. Jeremia chungthua ruok chu Babulon lal Nebukadnezzar chun vengtu kawmandar Nebuzaradan kuomah,
12. "Ama hi thuoi la, a chungah tha takin thaw la, sukna naw la, i kuoma a hril ang peiin thaw lem rawh" tiin thu a pek a.
13. Vengtu hotu Nebuzaradan chun an hotu lu tak Nebusazban hai, Nergal-Sarezer le Babulon lal hnuoia ofisar lienhai chu a ko khawm a,
14. Jeremia chu vengtuhai inkulna huong sunga inthok chun an ko suok a, Safan naupa Ahikam naupa Gedalia kuta chun a in tienga fepui dingin a'n koltir a, chuongchun ama mihai lai chun a khawsa ve nawk ta a.
15. Vengtuhai inkulna huong sunga Jeremia an khum lai chun a kuomah LALPA thu a hung tlung a:
16. "Ethiopia mi Ebedmelek kuomah Iengkim LALPA, Israel Pathien thu chu hieng hin hril rawh: 'Ngai rawh, hi khawpui laka ka thuhai chu i mithmu ngeiah ka hlen tep a, thatna ni loin sietna ka hung intlungtir ding a nih.
17. Chu ni chun nang ruok chu san suok ka ti che a, i mi tihai kutah pek lut ni ve naw ti nih ti hi LALPA thu suok a nih.
18. Kei i mi ring tlat leiin hum ka ti che a, kawlhnamin thi naw ti ni a, i hringna chu san himin um ngei a tih' ti hi LALPA thu suok a nih' tiin va hril rawh" a ta.
←  Jeremiah (39/52)  →