←  Jeremiah (38/52)  →

---

1.

Chun, Matan naupa Sefatia le Pasur naupa Gedalia le Selemia naupa Jukal le Malkija naupa Pasur haiin mipuihai kuoma Jeremia'n,

2.

"LALPA chun hieng hin a tih: hi khawpuia um zinghai chu kawlhnam amanih, tam amanih, hripuiin amanih thing an ta, Babulonhai kuoma inpehai ruok chu an hringna sanhimin um an ta, dam an tih.

3.

Hi khawpui hi Babulon lal sipaihai kutah pek ning a ta, lang an tih, ti hi LALPA thu suok a nih" tia a hril chu an ngaithlak a.

4.

Chuongchun, hotuhai chun lal kuomah, "Hi mi hi sukhlum ni sien ti kan ngen che a nih. Ama hin hieng thu hi a hril leiin mipuihai le hi khawpuia la um sun sipaihai lungril khom a sukhnuol vong a nih. Hi mi hin hi mipuihai thatna hi a zong naw a, an sietna ding a zong lem a nih" an ta.

5.

Lal Zedekia chun, "Ngai ta u, ama chu in kuta um an nawm; lal hi in dit naw zawng thaw thei a ni lem" a ta.

6.

Chuongchun, Jeremia chu an thuoi a, vengtuhai inkulna huong sunga um lal naupa Malki in hnuoia rip inthuk taka chun hruiin an thlak thla a. Chu khur sung ripa chun chirdiek ngot naw chu tui a um naw a, Jeremia chu chirdieka chun an thlak thla a nih.

7.

Chun, Ethiopia mi, lal ina um hlak, mi tilre Ebedmelek chun chir khura Jeremia an thlak thu chu a lo hriet a, chuong lai chun lal chu Benjamin Kotkhar bula chun a'n thung a.

8.

Ebedmelek chu lal ina inthokin a suok a, lal kuoma chun,

9.

"Ka lalpa, hieng mihai hin zawlnei Jeremia chungah rilo takin thil an thaw a, hnuoi sung ripah zawlnei Jeremia an thlak thla a, chu taka chun phingtamin thi el a tih, khawpuia takngiel khom bei a um ta si naw a" a ta.

10.

Lal chun Ethiopia mi Ebedmelek chu thu a pek a, "Hi taka inthok hin mi sawmthum thuoi la, Jeremia chu a thi hma ngeiin khura inthok chun la suok ro" a ta.

11.

Ebedmelek chun mihai chu a thuoi a, lal tangka siena in hnuoia chun an lut a, zakuo tiek le silfen hluihai chu a chawi a, hnuoi sunga ripa chun Jeremia kuomah hruiin a thlak thla a.

12.

Ethiopia mi Ebedmelek chun Jeremia kuomah, "Hieng puon tiekhai hi i zak hnuoiah hrui hin thlung de rawh" a ta, chuong ang chun Jeremia chun a thaw a.

13.

Jeremia chu khura inthok chun an khai suok a. Jeremia chu vengtuhai inkulna huong sunga chun a um ta zing a.

14.

Lal Zedekia chun zawlnei Jeremia chu a ko a, LALPA tempul lutna kotkhar pathumnaa chun an hung thuoi a. Lal chun Jeremia kuomah, " Thil indon ka ti che a, ka lakah ieng khom ip nei naw rawh" a ta.

15.

Jeremia chun Zedekia kuomah, "Ka hril che chun i mi sukhlum ngei naw ding maw? Thurawn pe lang che khom i ngaithlak awm si naw a" a ta.

16.

Lal Zedekia chun Jeremia kuomah, "Ka hringna siemtu LALPA hringna salin thu ka'n tiem a, sukhlum naw top ka ti che a, i hringna lak tumtuhai kuoma khom pe bok nawng ka ti che" tiin a rukin thu a'n kham a.

17.

Jeremia chun Zedekia kuomah, "Iengkim LALPA, Israel Pathien chun hieng hin a tih: 'Babulon lal hotuhai kuomah in inpek chun him in ta, hi khawpui hi raw hmang ni naw ni a, nang le i sunghai khom hlain um an tih.

18.

Babulon lal kuoma in inpek naw ruok chun hi khawpui hi Babulonhai kuta pek ning a ta, rawng an ta, a kuta inthokin suok naw top i tih" a ta.

19.

Lal Zedekia chun Jeremia kuomah, "Babulonhai kuta lo inpe tah Judahai mi'n mantirin, nuizatburah mi siem an tih ti ka'n lau a nih" a ta.

20.

Jeremia chun, "Inmantir naw ni che, i kuoma ka hril hi LALPA rawl a na, awi el rawh. Chuongchun, i ta dingin thang a ta, dam bok i tih.

21.

Inpek i nuom naw chun hi hi LALPAN thu a mi hril chu a nih:

22.

Ngai rawh, Juda lal ina nuhmei la um po pohai chu Babulon lal hotuhai kuoma thuoiin um an ta, nuhmeihai chun,I ringsan i ruolhai ngei khan,Thuoi suolin an hne che a,Kemit tlumin chirdiek i pal a,I ruolhan an zamsan ta si chetiin hla sak khum an ti che.

23.

I nuhmeihai le nauhai po po chu Babulon mihai kuomah thuoi vong an ta, an kuta inthokin intal suok naw ti ni a, Babulon lal kutah manin um i ta, nangma leiin hi khawpui hi rawng a tih" a ta.

24.

Zedekia chun Jeremia kuomah, "Hieng thuhai hi tu khomin hre naw raw se, chuongchun thi naw ti nih.

25.

Nisienlakhom, hotuhan ka biek che hi an hriet a, i kuomah an hung a, 'Lal kuoma i hril chu mi hril ve rawh; kan lakah ieng khom ip nei naw la, chuong naw chun kan that ding che a nih' an ti chun,

26.

nangin an kuomah, 'Jonathan inah mi'n kirtir ta naw rawh, chuong naw chun ka thi el ding a nih' tiin hnina ka siem a nih' i ti ding a nih" a ta.

27.

Chun, hotuhai po po chu Jeremia kuomah an hung a, an hung indon ta ngei a, lalin thu a pek ang tak chun a lo hril a, tu khomin an indon sap ta nawh, lal le an inbiekna chu a hrie tu khom an um bok si nawh.

28.

Chuongchun, Jeremia chu Jerusalem an lak ni chenin vengtuhai inkulna huong sunga chun a um ta zing a.

---

←  Jeremiah (38/52)  →