←  Jeremiah (37/52)  →
1. Josia naupa Zedekia chu Juda lal dingin Babulon lal Nebukadnezzar chun a ruot a, Jehoiakim naupa Jehoiachin aiin a hung inlal ta a.
2. Nisienlakhom ama le a rongbawltuhai le a rama mihai chun LALPA thu zawlnei Jeremia hril chu an poisa nawh.
3. Chun, lal Zedekia chun Selemai naupa Jehukal le Maaseia naupa thiempu Zefania hai pahni chu zawlnei Jeremia kuomah, "LALPA, ei Pathien kuomah mi tongtaipek rawh" tia ngen dingin a tir a.
4. Chuong lai chun Jeremia chu lung inah an la khum hri naw leiin mipuihai lai a nuom nuomin a la leng thei a.
5. Faraw sipaihai chu Aiguptaa inthokin an hung inthok suok a, an hung ti Jerusalem inhuoltu Babulon sipaihaiin an hriet chun Jerusalema inthokin an inhnuk suok a.
6. Chuongchun LALPA thu chu zawlnei Jeremia kuomah a hung tlung a,
7. "LALPA Israel Pathien chun hieng hin a tih: Juda lal, mi rawn dinga mi hung tirtu kuoma chun hieng hin hril rawh: Ngai ta, Faraw sipai ruol, nangma santu dinga hunghai chu an ram tieng kir nawk an tih.
8. Chu zoah Babulon sipaihai chu hung kir an ta, khawpui hi hung bei an ta, lang an ta, raw hmang an tih.
9. LALPA chun hieng hin a hril: 'Babulonhai chun mi'n kiengsan ngei an tih' ti lungril neiin nang le nang inhlem naw rawh. Inkiengsan teu naw ni hai!
10. A hung beitu che Babulon sipaihai hi hne vongin, a hliemhai chauh an puon inah maksan khom ni la, chuonghai chu hung suokin khawpui hi raw hmang tho an tih" tiin.
11. Faraw sipaihai leia Babulon sipaihaiin Jerusalema inthoka an inhnuk dok hnung chun,
12. Jeremia chun Benjamin rama a chanvo ram la dingin khawpuia inthok chun a'n thok suok a.
13. Sienkhom Benjamin Kotkhar a tlung chun vengtuhai kapten, Hanani naupa Selemia naupa a hming Irija chun, "Babulonhai tieng inpek i tum a nih" tiin a lo man a.
14. Jeremia chun, "Ni hlak a tim ie! Babulonhai tieng inpe naw ning" a ta, sienkhom a ngaithlak naw a, a man a, hotuhai kuomah a thuoi a.
15. Hotuhai chu Jeremia chunga chun an lung a sen hle a, an vuok a, ziektu Jonathan ina chun an intangtir a, chu chu tang ina an hmang a nih.
16. Jeremia chu in hnuoi ripa chun an khum a, chu taka chun hun sawt tak an intangtir a.
17. Chun, lal Zedekia chun a ko suok a, arukin "LALPA kuoma inthokin thu iemani bek a um am?' tiin a'n don a. Jeremia chun, "Um e. Babulon lal kuta inmantirin um i tih.
18. Nangma chunga le i thoktuhai le i mipui hai chungah ieng am ka suksuol a, hienga lung ina i mi khum el hi?
19. I kuoma, 'Babulon lalin hung bei naw ni che' tia hriltu che i zawlneihai kha khaw lai am an um zo ta a?
20. Aw ka pu, lal tak, ka hnina hi ngaithlaa mi pompek dingin ka ngen che a nih; ziektu Jonathan ina chu mi'n kirtir ta lul naw rawh, chuong naw chun thi el ka tih" a ta.
21. Lal Zedekia chun thu a pek a, vengtuhai inkulna sunga chun a'n tangtir a, ni tin bei siemtuhai bei tlang khat, khawpuia bei a um sung phot chu a pek a, chuong ang chun Jeremia chu vengtuhai inkulna sunga chun a um ta zing a.
←  Jeremiah (37/52)  →